Modimo o Nthušitše go Fenya Diteko

Bjalo ka ge go anega Vazir Asanov

Ke ile ka tšwa ka dikobong ka bjako, ka tlemelela Beibele lethekeng gomme ka apara ka go akgofa. Pele ke e-tšwa ka lefasetere, ke ile ka tšea diaparo tša-ka, ka di bea ka malaong gomme ka di apeša dikobo gore go bonale eka ke sa robetše. Ke moka, ke ile ka kitimela Holong ya Mmušo ke rapela gore Modimo a nthekge. Tiragalo ye e diregile ka 1991 ge ke be ke e-na le nywaga e 14.

KE BELEGETŠWE lapeng la ma-Kurd motseng o lego karolong ya ka borwa yeo ga bjale e lego Kazakhstan, yeo ka nako yeo e bego e le e nngwe ya diripabliki tše 15 tša Soviet Union. Batswadi ba-ka le ba leloko ba nkgodišitše gore ke dumele gore ke tla ba moetapele nakong e tlago le gore ke tla ba molopolodi wa setšhaba sa gešo. Ke ile ka thoma go hloya manaba a ma-Kurd kudu mo ke bego ke ikemišeditše go bolaya e le gore ke lokolle setšhaba sa gešo kgatelelong.

Mafelelong a bo-1980, nna, mma le moratho’a-ka re ile ra thoma go ithuta Beibele le Dihlatse tša Jehofa. Lega go le bjalo, tate o be a re thibela go kopanela le Dihlatse. Go sa šetšwe seo, ke ile ka tšwela pele ke ithuta. Lapeng la ma-Kurd, ga se gwa tlwaelega gore motho a se kwe hlogo ya lapa. Ke be ke rata tate, eupša ke be ke rata le ditherešo tša Beibele tšeo ke bego ke ithuta tšona.

Kganetšo ka Gae le Sekolong

Ka letšatši le lengwe, morutiši o ile a bona kopi ya makasine wa Morokami ka mokotleng wa-ka wa dipuku tša sekolo gomme a botša batswadi ba-ka. A galefile, tate o ile a mpetha o šoro mo ke ilego ka tšwa madi ka dinko. O ile a goeletša ka gore: “Na o sa dutše o le bodumeding bjo?”

Ka morago ga moo, tate o ile tsebiša ba lapa gore ga a sa ntšea bjalo ka morwa wa gagwe. Ruri seo se ile sa nkweša bohloko kudu! Ka nako e swanago, bontši bja bana bao ke tsenago le bona ka klaseng bo be bo phema go ba le nna gomme ba bangwe ba be ba bile ba nthoga phatlalatša. Barutiši ba-ka ba be ba fokotša dintlha tša-ka gomme ba nkwera ka baka la tumelo ya-ka nakong ya ge ba ruta, maitekong a bona a gore ke amogele pono ya bona ya gore Modimo ga a gona.

Go sa šetšwe kganetšo yeo, ke ile ka tšwela pele ke e-ba gona dibokeng tša Bokriste le go bolela le ba bangwe ka tumelo yeo ke sa tšwago go e hwetša. Ka morago ga nako, tate o ile a kwa gore ke sa tšwela pele go kopanela le Dihlatse le go bala Beibele. Ka Sontaga se sengwe ke ile ka thoma go nyaka lebaka la gore ke tšwe ka gae ke ye dibokeng. Gatee-tee tate o ile a re ke yo robala. O ile a bolela a tiišitše gore: “Sontaga se sengwe le se sengwe ka nako ye o swanetše go ba o robetše.” O ile a ntšhošetša ka gore go tla ba le ditla-morago tše šoro ge e ba ke sa mo theetše gomme ke be ke kgodišegile gore go tla ba bjalo.

Ke ile ka rapela Jehofa, Modimo wa therešo, ke lla gomme ka mo kgopela gore a nolofatše pelo ya tate, eupša o ile a tšwela pele a sa fetoge.  Ke ile ka gopola kgatelelo ya Baisiraele kua Egipita. Boitshwaro bja tate bo be bo nkgopotša Farao yo a bego a gana go lokolla Baisiraele gore ba yo rapela Jehofa.—Ekisodo 5:1, 2.

Go Dira Diphetho

Ka Sontaga se sengwe ke ile ka dira phetho ya go ya dibokeng. Ke be ke tswhenyegile ge ke be ke le malaong gomme ke rapela Jehofa ka setu. Ge batswadi ba-ka ba tsena ka phapošing ya-ka, ke ile ka itira eka ke robetše. Tate o ile a bolela ka boikgantšho gore: “Bona gore ke na le morwa yo a kwago bjang.” O ile a nkatla gomme ba tšwa ka setu. Ke ile ka tšwela pele go rapela ka phišego.

Kapejana ka morago ga ge batswadi ba-ka ba tšwile ka phapošing ya-ka, ke ile ka tsoga, ka ntšha dieta ka fase ga malao gomme ka tšwa ka lefasetere go etša ge go boletšwe matsenong. Diiri tše pedi di ile tša feta ka pela ge ke be ke le dibokeng gomme ke ile ka ipotšiša gore go tla direga eng ge ke fihla gae. Lega go le bjalo, ke ile ka thabišwa ke gore mma o be a bone gore ga se nna ke lego malaong eupša ke diaparo tša-ka gomme a se botše tate. Lega go le bjalo, o ile a ntemoša gore o be a ka se sa utela tate ditiro tše bjalo.

Ka 1992 ke ile ka botša batswadi ba-ka gore mogwera wa-ka o be a e-ya moketeng o kgethegilego le gore ke be ke laleditšwe go ya le yena. Ge e le gabotse, tiragalo yeo e kgethegilego yeo ke bego ke rulagantše go ya go yona e be e le kopano ya Dihlatse tša Jehofa kua motseng wa Taraz, woo o lego bokgole bja dikhilomithara tše 100 go tloga legaeng la gešo kua Karatau. Ke be ke tlo kolobetšwa kopanong yeo e le pontšho ya boineelo bja-ka go Jehofa. Ke ile ka kgopela mma gore a nnee kgamelo e tletšego dipeu tša sonopolomo yeo e lego ka ngwakong wa bobolokelo. Ke ile ka gadika dipeu tšeo gomme ka di rekiša mmarakeng, e lego kamoo ke ilego ka kgona go hwetša tšhelete e lekanego ya go ya kopanong.

Ge ke boa, tate o ile a mpotšiša ge e ba ke ile ka ipshina le mogwera wa-ka. Ke ile ka mo kgonthišetša gore go bile bjalo. Ke ile ka kwa gore Jehofa o be a nthekga, ka gobane tate ga se a ka a tšwela pele go mpotšiša ka taba yeo. Ke be ke tloga ke rata mantšu a Diema 3:5, 6 a rego: “Bôʹta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.”

Go Fokola Moyeng

Kganetšo ya tate ga se ya kgaotša ge ke be ke kolobetšwa. Ge ke dutše ke tšwela pele go kopanela le Dihlatse, tate o be a mpetha o šoro ge ditho tše dingwe tša lapa di le gona le ge di be di se gona. Mo e ka bago letšatši le lengwe le le lengwe ke be ke gobošwa e bile ke gateletšwa gomme ka dinako tše dingwe ke be ke lla. Ka nako yeo Kazakhstan e be e hwetša tokologo go Soviet Union gomme batswadi ba-ka le ba leloko ba ile ba leka go mphegelela gore ke fihlelele dipakane tše dibotse ke le ra-dipolitiki. Ba be ba nagana gore ke fetwa ke sebaka se sebotse.

Mogolo’a-ka o be a fihleletše dipakane tše dintši go tša dipapadi gomme gantši tate o be a nkgothaletša gore ke latele mohlala wa gagwe. Go ya bofelong bja 1994, le nna ke ile ka thoma go tšea karolo dipapading. Ka ge ke be ke e-na le bokgoni bja tlhago, go se go ye kae ke be ke thopa difoka gomme ke retwa ka baka la bokgoni bja-ka papading ya kgwele ya maoto le gymnastics. Le gona, ke ile ka thoma go ithuta molao e le gore nka kgona go šireletša dikgahlego tša ma-Kurd. Ke ile ka ba ka rata dipolitiki gomme ka nagana ka go thoma mokgatlo wa bafsa wa ma-Kurd. Ga bjale, tate o ile a thoma go ntheta.

“O Fentše Tate”

Ke be ke šetše ke fokola moyeng gomme ke kgaoditše go bala Beibele le go ya dibokeng tša Dihlatse tša Jehofa. Ke be ke ikhomotša ka gore ke tla hlankela Jehofa gape ge ke šetše ke godile. Ka nako e nngwe tate o ile a mpotšiša ge e ba ke kopanela le Dihlatse. Ke ile ka mo araba ka gore: “Aowa. O fentše tate. Na seo ga se go thabiše?” Tate o ile a thaba kudu ge a e-kwa seo. O ile a bolela ka boikgantšho gore: “Mafelelong bjale o morwa wa-ka!”

Go ile gwa feta nywaga e mebedi ke sa ye dibokeng,  gaešita le ge ka dinako tše dingwe ke be ke nyaka go ya. Eupša go nyama go be go dira gore ke se ke ka ya. Ke be ke nagana gore bao ba lego ka phuthegong ba be ba ka se kwešiše boemo bja-ka.

Ka nako e swanago, ke be ke kgodišegile gore ga go selo se sekaone go feta go hlankela Jehofa. Gantši ke be ke ipotša gore, ‘Ge e le gabotse, ke rata Jehofa!’ Ke moka, tate o ile a thoma go nkgapeletša gore ke hwetše thuto ya yunibesithing. Ke ile ka ineela kgateletšong ya gagwe gomme ka ba ka mo holofetša gore ke tla fetša sekolo ke hweditše dintlha tša godimo kudu. Lega go le bjalo, ka pelong ke be ke holofetše gore gatee-tee ge ke fihla yunibesithing kua Almaty, e lego motse wa sebjale-bjale wo o lego ka borwa bja Kazakhstan, ke tla nyaka Dihlatse.

Phetogo e Thabišago ya Maemo

Nakwana ka morago ga ge ke thomile go ithuta yunibesithing ke ile ka kopana le Dihlatse tše pedi tšeo di bego di tšea karolo bodireding bja setarateng mo Almaty. Ba ile ba mpotšiša gore, “O nagana gore ke mang yo a bušago lefase?”

Ke ile ka araba ka gore, “Sathane Diabolo, lenaba la Jehofa le la batho ka moka.” (2 Bakorinthe 4:3, 4) Ke ile ka hlalosa gore ke Hlatse e kolobedišwego eupša ke tapile.

Go ya bofelong bja 1996 ke ile ka thoma go ithuta Beibele le Dihlatse gape. Ka morago ga go ithuta ka makga a mmalwa, kganyogo ya-ka ya go hlankela Jehofa e ile ya boa ka matla gomme ka thoma go tšea karolo medirong ka moka ya Dihlatse mo Almaty. Ka September 1997, ke ile ka thoma go hlankela bjalo ka mmulamadibogo goba modiredi wa ka mehla.

Ka morago ga ngwaga tate o ile a tla go nketela. Ke ile ka mo kitimela gomme ka mo gokarela. O ile a kgopela gore ke mo lebalele bakeng sa tsela yeo a ilego a itshwara ka yona nywageng ka moka e fetilego. O ile a re o be a sa nkwešiše gaešita le go se kwešiše tumelo ya-ka. Ke ile ka re go yena: “Tate, ke go rata kudu.”

Ruri ke ile ka thaba ge tate a amogela dikgatišo tšeo di theilwego Beibeleng gomme a kgopela Beibele, a bolela gore o nyaka go e bala ka moka! Ngwageng o latelago o ile a nketela gape gomme ka lekga le a e-na le mma. Ge re be re le Holong ya Mmušo, batho ba merafo e fapa-fapanego ba be ba ba dumediša ka go tla go bona gomme ba itsebiša. Se se ile sa kgoma tate kudu gomme o ile a thoma go bala dikgatišo tša Dihlatse ka kgahlego e kgolo.

Ditšhegofatšo tše Dintši

Ka September 2001, ke ile ka nyala kgarebe e kgahlišago ya mo-Russia e bitšwago Yelena. E bile Hlatse go tloga ka 1997 gomme o thomile go bula madibogo ka May 2003. Re ile ra thaba kudu ge re e-kwa gore batswadi ba-ka ba thomile go ithuta Beibele le Dihlatse le gore ba be ba dira tšwelopele moyeng. Ge e le gabotse, ga se ka ka ka dumela ge ke be ke e-kwa ditaba tšeo, go fihlela ge ke di kwa go tate ka boyena. Ge re be re bolela mogaleng, o ile a mpotša gore Jehofa ke Modimo a nnoši wa therešo!

Ke thaba kudu gore mo Almaty ke bile le sebaka sa go swara dithuto tša Beibele le batho ba tšwago dinageng tše dintši go akaretša China, Iran, Pakistan, Siria le Turkey. Morago bjale, moruti wa Iran o ile a nkgopela gore ke ithute Beibele le yena ka leleme la gagwe la setlogo la se-Persia. Monna yo e kilego ya ba molaodi wa mašole yo a tšwago Afghanistan o ile a thabela go ithuta ka Jehofa kudu. Le gona, ke ile ka thabela go ithuta le motho yo a tšwago Siria ka leleme la gešo la setlogo la se-Kurd gaešita le go ithuta le batho bao ba bolelago se-Kazakh le se-Russia gotee le maleme a mangwe ao ke ithutilego ona bjaneng.

Ga bjale, ke e-na le Yelena, ke hlankela phuthegong yeo e bolelago leleme la se-Kazakh—e nngwe ya diphuthego tša Dihlatse tša Jehofa tše fetago 35 mo Almaty. Ngwageng o fetilego, nna le Yelena re bile le tokelo ya go hlankela ka nakwana ofising ya lekala ya Dihlatse tša Jehofa yeo e sa tšwago go fetšwa go agwa yeo e lego kgaufsi le Almaty.

Ka nako e nngwe ke ile ka rutwa go hloya batho, eupša Jehofa o nthutile go ba rata. Ke kgodišegile gore le ka mohla ga se ra swanela go tutuetšwa gore re kgaotše go hlankela Jehofa, gaešita le ge re gateletšwa ke bagwera le ba leloko bao ba nago le boikemišetšo bjo bobotse. (Bagalatia 6:9) Ga bjale ke thabišwa kudu ke gore nna le mosadi wa-ka re na le “go gontši mo [re] go dirago modirong wa Morena.”—1 Bakorinthe 15:58.

[Ntlhakgolo go letlakala 28]

Mma o ile a ntemoša gore o be a ka se sa utela tate ditiro tše bjalo

 [Seswantšho go letlakala 30]

Holo ya Mmušo ya kua Karatau yeo ke bego ke kopanela go yona ge ke be ke sa le mofsa

[Seswantšho go letlakala 30]

Batswadi ba-ka, bao ga bjale ba sa ganetšego modiro wa rena

[Seswantšho go letlakala 30]

Nna le Yelena letšatšing la lenyalo la rena

[Seswantšho go letlakala 30]

Ke e-na le Yelena ofising e mpsha ya lekala kgaufsi le Almaty