Go ya ka pego ya morago yeo e dirilwego lefaseng ka moka, a motho yo tee go ba bane o ikwa a lewa ke bodutu.

•   “Batho ba mengwaga ka moka mafelong a mantšhi ba ka lewa ke bodutu.”​—Chido Mpemba,e lego o mongwe wa badulasetulo wa World Health Organization’s Commission on Social Connection.

 Go fapana le seo batho ba bantšhi ba se naganago, go lewa ke bodutu ga go ame feela batho bao ba godilego goba bao ba dulago ba nnoši eupša go ama le baswa, bao ba phetšego gabotse mmeleng, bao ba atlegilego bophelong le bao ba lego lenyalong.Go phela o nnoši le go lewa ke bodutu go ka ama bophelo bja motho mmeleng le maikwelong.

•   Ngaka ya go buwa e lego Vivek Murthy wa kua U.S o re: “Go lewa ke bodutu go feta kgole go no ikwa o se gabotse.” O oketša ka gore: “Lehu leo le bakwago ke go lewa ke bodutu le swana le lehu leo le bakwago ke go kgoga disekerete tše e ka bago tše 15 ka letšatši.”

 Mmopi wa rena ga a nyake gore re phele re le nnoši. Morero wa Modimo e be e dutše e le gore batho ba thabele bogwera bjo bo kgotsofatšago.

•   Molao wa motheo wa Beibele: “Modimo o itše: ‘Ga go botse gore monna a tšwele pele a phela a nnoši.’”​—Genesi 2:18.

 Modimo o nyaka gore re be bagwera ba gagwe. O tshepiša go batamela kgauswi le rena ge re dira maiteko a go batamela kgauswi le yena​—Jakobo 4:8.

•   Molao wa motheo wa Beibele: “Go thaba bao ba lemogago gore ba nyaka dilo tša moya, ka ge Mmušo wa magodimo e le wa bona.”​—Mateo 5:3

 Modimo o nyaka re mo rapela re e na le batho ba bangwe. Ge re dira se re tlo thaba.

•   Molao wa motheo wa Beibele: “A re hlokomelaneng gore re hlohleletšaneng leratong le medirong e mebotse,re sa tlogele go bokana ga rena gotee, , . . . eupša re kgothatšana.”​—Baheberu 10:24, 25.

 Go hwetša boitsebišo bjo bo oketšegilego bja gore ke ka baka la eng go le bohlokwa go phema go phela o nnoši, bala sehlogo seo se rego “Go Lewa ke Bodutu Lefaseng Leo le Nago le Mekgwa e Mentši ya Poledišano..”