Puku ya Kutullo ge e hlalosa Babilona o Mogolo e re ke mokgatlo wa lefase ka bophara wa madumedi a maaka ao Modimo a sa a amogelego. a (Kutollo 14:8; 17:5; 18:21) Le ge madumedi ao a sa swane, ka moka ga ona a aroša batho gore ba se ke ba rapela Modimo wa therešo Jehofa.—Doiteronomio 4:35.

Kamoo re ka tsebago Babilona o Mogolo

1.   Babilona o Mogolo ke seswanšhetšo. Beibele e hlalosa Babilona o Mogolo e le “mosadi” le “mogweba-ka-mmele yo mogolo,” yo a nago le “leina leo e lego sephiri: ‘Babilona o Mogolo.’” (Kutollo 17:1, 3, 5) Puku ya Kutullo e bolela ka “diswantšho,” ka gona go molaleng gore Babilona o Mogolo ke seswantšhetšo, e sego mosadi wa kgonthe. (Kutollo 1:1) Go oketša moo, o ‘dutše godimo ga meetse a mantši,’ ao a swantšhetšago “merafo, mašaba, ditšhaba le maleme.” (Kutollo 17:1, 15) Mosadi wa kgonthe o be a ka se kgone go dira seo.

2.   Babilona o Mogolo o emela mokgatlo wa lefase ka bophara. O bitšwa “motse o mogolo woo o nago le mmušo o bušago dikgoši tša lefase.” (Kutollo 17:18) Ka gona Babilona o Mogolo o na le matla a taolo a lefase ka bophara le tutuetšo ditšhabeng.

3.   Babilona o Mogolo ke mokgatlo wa bodumedi e sego wa dipolotiki goba wa kgwebo. Motse wa Babilona ya bogologolo o be o tumile ka bodumedi ebile o tsebega ka go diriša “maleatlana” le “boloi.” (Jesaya 47:1, 12, 13; Jeremia 50:1, 2, 38) Ge e le gabotse bodumedi bja maaka bjo bo ganetšanago le Modimo wa therešo e lego Jehofa, bo be bo tumile motseng wa Babilona. (Genesi 10:8, 9; 11:2-4, 8) Babuši ba Babilona ba be ba ikgogomoša le go iphagamišetša Jehofa le borapedi bja gagwe. (Jesaya 14:4, 13, 14; Daniele 5:2-4, 23) Ka mo go swanago, Babilona o Mogolo o tumile ka go “dirišana le meoya e mebe.” Seo se bontšha gore ke mokgatlo wa bodumedi.—Kutollo 18:23.

    Babilona o Mogolo ga se mokgatlo wa dipolotiki ka baka la gore “dikgoši tša lefase” di a mo llela ge a fedišwa. (Kutollo 17:1, 2; 18:9) Ga se kgwebo, ka baka la gore Beibele e mo hlaola go “babapatši ba lefase.”—Kutollo 18:11, 15.

4.   Bodumedi bja maaka bo swana tlwaa le motse wa Babilona ya Bogologolo. Go e na le gore bo rute batho go batamela kgauswi le Modimo wa therešo e lego Jehofa, bodumedi bja maaka bo dira gore batho ba rapele medimo e šele. Beibele e re seo ke ‘bootswa bja moya.’ (Lefitiko 20:6; Ekisodo 34:15, 16) Ditumelo tše bjalo ka thuto ya Boraro Botee, go se hwe ga moya le go diriša diswantšho borapeding di thomile kgale motseng wa Babilona ya bogologolo gomme ditumelo tše di tšwela pele di ata borapeding bja maaka. Madumedi a a tswakanya borapedi bja wona le go rata lefase. Beibele e hlalosa tsela ye ya go se botege e le bootswa bja moya.—Jakobo 4:4.

    Lehumo le boikgantšho bja bodumedi bja maaka di swana tlwaa le seo Beibele e se bolelago ka Babilona o Mogolo gore o “apere seaparo sa mmala o mophepolo le o mohwibiduhwibidu” gape o “ikgabišitše ka gauta le leswika le bohlokwa le diperela.” (Kutollo 17:4) Babilona o Mogolo ke mothopo wa “makgapha a lefase,” goba wa dithuto le mekgwa yeo e sa hlomphego Modimo. (Kutollo 17:5) Ditho tša bodumedi bja maaka ke “merafo, mašaba, ditšhaba le maleme” ao a thekgago Babilona o Mogolo.—Kutollo 17:15.

 Babilona o Mogolo o ikarabela ka mahu a “bao ka moka ba bolailwego lefaseng.” (Kutollo 18:24) Ka mengwaga e mentši, bodumedi bja maaka bo be bo dutše bo hlohleletša dintwa le botšhošetši eupša se sebe le go feta ke gore bo paletšwe ke go ruta batho therešo ka Jehofa, Modimo wa lerato. (1 Johane 4:8) Go palelwa ke go dira se go dirile gore go be le tšhollo e ntši ya madi. Bao ba ratago go thabiša Jehofa ba swanetše go ‘tšwa go yena,’ ba ikarole bodumeding bja maaka.—Kutollo 18:4; 2 Bakorinthe 6:14-17.