Ko e falu mena tutupu mai i Peritania ka lagomatai a koe ke kitia e kakano kua nakai lata a koe ke galo e amaamanakiaga. To kitia foki e koe e mena haau ka liga taute ke “liti a hāu a tau mena kai ki luga he vai,” he puhala fakatai ke lagomatai falu ne nakaila talia e kupu mooli.​​—Fakama. 11:1

Taha aga kua aoga lahi mai ia koe ko e fakamakamaka. Kua lata ia koe ke tapiki ke he kupu mooli mo e pipiki ki a Iehova. (Teu. 10:20) Ko e mena ia ne taute e Georgina. He magaaho ne kamata a ia ke fakaako e Tohi Tapu mo e Tau Fakamoli a Iehova he 1970, ne ita lahi e taane haana, ko Kyriacos. Ne lali a ia ke taofi e fakaako ha Georgina, ai fakaatā e Tau Fakamoli ki loto he fale, mo e utakehe ha tohi he Tau Fakamoli a Iehova ka moua e ia.

Magaaho ne kamata a Georgina ke fakalataha atu ke he tau feleveiaaga he fakapotopotoaga, ne holo ki mua e ita ha Kyriacos. Taha e aho ne fano a ia ke he Fale he Kautu ke taufetoko. He mailoga kua mahomo hake e vagahau Heleni ha Kyriacos ke he faka-Peritania, ne hea telefoni e matakainaga fifine ke he matakainaga taane Heleni he taha fakapotopotoaga ke hau ke lagomatai. Ne fiafia e tali ha Kyriacos ha ko e mahani totonu he matakainaga, ti gahoa ni e mahina, ne fakaako tokoua a laua ke he Tohi Tapu. Ka kua fakaoti e fakaako ha Kyriacos.

Ke he tolu foki e tau, ne matutaki a Georgina ke fehagai mo e totokoaga. Ne pehē a Kyriacos to tiaki e ia a Georgina ka papatiso. He aho ne papatiso a Georgina ne liogi fakamakamaka a ia ki a Iehova ke ua tiaki e Kyriacos a ia. Magaaho ne hohoko mai e Tau Fakamoli ke uta a Georgina ke he toloaga, ne tala age a Kyriacos ki ai: “Mumua atu a mutolu. To mumui atu a maua he motokā ha maua.” Ne fina atu a Kyriacos ke he fakaholoaga he magaaho pogipogi mo e kitekite ke he hoana haana he papatiso!

He mole ai, ne tote hifo e totokoaga ha Kyriacos, ti taute fakahaga e ia e tau hikihikiaga lalahi. Teitei 40 e tau he mole e feleveia fakamua mo e Tau Fakamoli, ne kitia e Georgina e taane haana he papatiso! Ko e heigoa ne lagomatai a Kyriacos? Pehē a ia: “Ne fiafia lahi au ki a Georgina ha ko e aga fakamakamaka haana.” Pehē a Georgina: “Pete e totoko e taane haaku, to ai fakaoti e au e tapuaki ke he Atua haaku. He tau magaaho oti, ne fakatumau au ke liogi ki a Iehova, ti nakai galo e amaamanakiaga haaku.”

Taha mena foki ke lagomatai e hoa haau ko e feaki e koe e aga faka-Kerisiano. Ne tomatoma he aposetolo ko Peteru e tau hoana Kerisiano: “Kia omaoma ke he tau tane ha mutolu ni, kaeke foki kua faliuliu falu ke he kupu, kia moua a lautolu he mahani mitaki he tau hoana ha lautolu, ka e nakai vagahau.” (1 Pete. 3:1) Ne moui fakatatau a Christine ke he fakatonuaga ia, pete he loga e tau ato talia ai he taane haana. Magaaho ne eke a ia mo Kerisiano he molea e 20 e tau kua mole, ne logona hifo he taane haana ko John, kua nakai lata a ia ke iloa e Atua. Nakai manako a John ke fakalataha ke he lotu, ka kua maeke a ia ke kitia kua uho lahi e tua foou ha Christine ki a ia ni. “Maeke ia au ke kitia kua fakafiafia he mena ia a ia,” he talahau e John. “Ne feaki e ia e loto malolō mo e mauokafua mooli, ti lagomatai he mena nei au ke fahia ke he loga e tau tuaga uka.”

Nakai fakaohooho e Christine e lotu haana ke he taane haana, ati pehē e taane: “Ne mailoga e Christine he kamataaga kua mitaki lahi ni ke toka fakatekiteki au, ti fakauka a ia he fakaatā au ke fakaako ke he malolō ni haaku mo e puhala ni haaku.” Ka kitia e Christine e tau vala tala i loto he The Watchtower po ke Awake! ke he tau mena ne iloa e ia na fiafia a John ki ai, tuga ke he fakasaiene mo e tau mena momoui, ne fakakite age ai ki a ia, ti pehē, “Liga fiafia a koe ka totou e tala nei.”

Fai magaaho he mole, ne litaea a John ti taute falu gahua katene. Ha kua atā e loto haana ke manamanatu ke he tau mena hokulo lahi he moui, ne kamata a ia ke manamanatu, ‘Kua ha ha hinei kia a tautolu ha ko e tau mena tutupu mai noa, po ke fai kakano aoga ati tufugatia ai a tautolu?’ He taha aho, ne hūhū e matakainaga taane ne tutala mo John, “Ka e kua e fakaako?” “Ha kua kamata au mogonei ke talitonu ke he Atua,” he ui e John, “ne talia e au e ole haana.”

Ko e aoga ha ia he nakai galo ia Christine e amaamanakiaga! He mole e liogi haana ke he 20 e tau tau ke liga talia e John e kupu mooli, ne papatiso a ia. Kua fekafekau fakamakutu tokoua a laua mogonei ki a Iehova. Ne pehē a John: “Ua e mena pauaki ati talia ai e au​​—ko e mahani totonu mo e aga kapitiga he Tau Fakamoli. Ti ka mau a koe ke he taha he Tau Fakamoli a Iehova, kua moua e koe e hoa fakamooli, kua falanaki ki ai, mo e aga foaki noa.” Ē, ne fakagahua e Christine e tau kupu he 1 Peteru 3:1, ti gahua mooli ai!

Ka e kua e tau tagata fakaako Tohi Tapu ne fai kakano ati galo e fiafia fakamua? “Kia gana e koe hāu a tau fua saito ke he magaaho pogipogi, ti aua neke okioki ai hāu a lima ke he afiafi,” he tohia he Patuiki ko Solomona, “he nakai iloa po ke mena fe ke monuina, po ke mena nai, po ke mena na, po ke fakatau mitaki ai e na mena ua ia.” (Fakama. 11:6) He falu magaaho na leva to tuputupu e tau tega he kupu mooli. Pete ia, to liga mailoga fakahaga he tagata e aoga he fakatata ke he Atua. (Iako. 4:8) Ē, he taha aho to liga ofo a koe he fiafia.

Manamanatu ki a Alice, ne hiki mai i Initia ki Igilani. He 1974 ne kamata a ia ke fakaako e Tohi Tapu. Na vagahau Hinitī a ia ka kua manako ke fakaholo ki mua e vagahau Peritania haana. Ne fai tau ne fakaako ai, ti fakalataha atu a Alice ke he falu feleveiaaga he fakapotopotoaga vagahau Peritania. Iloa e ia ko e tau mena ne fakaako e ia ko e kupu mooli ka kua taute e ia tuga ko e feua. Lafi ki ai, ne hagaaki a ia ke he tau tupe ti fiafia ke fano ke he tau patī. Fakahiku ai, ne fakaoti e Alice e fakaako haana.

Teitei 30 e tau he mole ai, ko Stella ne fakaako mo Alice, ne moua e ia e tohi mai ia Alice. Ne pehē: “Mauokafua au to fiafia lahi a koe ke iloa ko e tagata fakaako Tohi Tapu haau he 1974 kua papatiso ai he fonoaga faahimotu ne mole laia. Kua aoga lahi e mena ne taute e koe he moui haaku. Ne tō e koe e tega he kupu mooli ke he loto haaku, ti pete he nakaila mautali au ke tukulele e moui haaku ke he Atua, ne toka e au e kupu mooli ia ke he manamanatuaga mo e loto haaku.”

Ko e heigoa ne tupu? Ne fakamaama e Alice ne fakaagitau lahi a ia he magaaho ne mate e taane haana he 1997. Ne liogi a ia ke he Atua. Ke he kavi hogofulu e minuti, tokoua e Fakamoli vagahau Punjabi ne ahiahi atu ke he kaina haana mo e age ki a ia e tuleke Ko e Heigoa e Amaamanakiaga ma e tau Fakahelehele Kua Mamate? Ne logona hifo e Alice kua tali tuai e liogi haana ti fifili kua lata a ia ke fakalataha mo e Tau Fakamoli a Iehova. Ka e to moua a lautolu i fe? Ne moua e ia e tohi tuai ne fakamau ai e matakavi he fakapotopotoaga Punjabi ne age e Stella. Ti fina atu a Alice ke he Fale he Kautu ti kua fakafeleveia mafanatia he tau matakainaga taane mo e fifine vagahau Punjabi. “Kua matutaki au ke logona hifo e mafanatia mo e lagomatai ke fakatotoka e fakaagitau haaku,” he ui e Alice.

Ne kamata a ia ke fina atu tumau ke he tau feleveiaaga mo e liu kamata e fakaako Tohi Tapu haana, he fakaako foki a ia ke iloa mitaki ke vagahau mo e totou faka-Punjabi. Ti papatiso a ia he 2003. Ne fakaoti pehē nei e tohi haana ki a Stella, “Fakaaue lahi mahaki he tō e tau tega ia he 29 e tau kua mole mo e fakatoka e fakafifitakiaga mitaki ma haaku ke muitua ki ai.”

“Fakaaue lahi mahaki he tō e tau tega ia he 29 e tau kua mole mo e he fakatoka e fakafifitakiaga mitaki ma haaku ke muitua ki ai.”​​—Alice

Ko e heigoa haau ka fakaako mai he tau mena nei ne tutupu? Liga to leva ke he mena kua amaamanaki a koe ki ai, ka e kaeke kua hoge fakaagaaga, mahani fakamooli, mo e fakatokolalo e tagata, to fakaatā e Iehova e kupu mooli ke tupu he loto haana. Manatu e talahauaga he fakataiaga ha Iesu: “Kua gotogoto hake e tau fua saito, mo e tuputupu, ka e nakai kitia e ia [tagata ne gana] po ke eke fefe. Ha kua tupu noa ia he kelekele, kua fai lau fakamua, ti fai huki ni, ka e fakamui e tau fua saito motua.” (Mare. 4:27, 28) Ko e mena pihia to tupu fakahaga mo e “kua tupu noa ia.” Fa mahani ai, ko e tau tagata fakailoa takitokotaha kua nakai iloa e puhala ne tupu e mena nei. Ti kia matutaki ke gana fakaloga. To liga helehele mai e koe e tau fua loga.

Mo e kia nakai nimo e aoga he liogi. Ko Georgina mo Christine ne liogi tumau ki a Iehova. Ka “fakamakamaka ke he liogi” mo e nakai galo e amaamanakiaga haau, “ka mole atu e tau aho loga,” to moua mooli e koe e “tau mena kai” ne kua liti atu e koe ki luga he vai.​​—Roma 12:12; Fakama. 11:1.