Mosi paainga pa Dundhu ro Sinai Jehovha wakamubvunja kuti avake tende, yaidanijwa kuti Tabherinake, movaidikana kumunamatira. Ivona vaidikana kuthwara tabherinake pavaindothutha.

Jehovha wakati: ‘Bvunjai vandhu kuti vapekeje zvavanokwanisa kupekeja kuti vabesere kuvakwa ko tabherinake.’ VaIziraeri vakapekeja goridhe, sirivha, utare, mapuwe anosisira, no zvinemeso zvimweni zvo mutengo mukuru. Ivona vakapekejazve matovo o zvinyama, nguvo jo thonje no zviro zvimweni zvizinji. Ivona vainga vandhu vanokova zvo kuti Mosi wakavabvunja kuti: ‘Zvakwana! Mucadoviisazve zvimweni.’

Vazinji vanarume no vanakaji vainga no uzivi vakabesera kuvaka tabherinake. Jehovha wakavapekeja ruzivo hwo kushanda. Mu mativi amweni o tabherinakeri aitendenejwa ngo fio. Vamweni vairongeja mapuwe, vecishanda no goridhe, kana kuveza matabwa.

Vandhu vakavaka tabherinake inga zvavakabvunjwa ndi Jehovha. Ivona vakaita kurtina imweni yakaseja maningi kuti ipaure mukati mo tabherinake ngo mativi maviri, divi Rakacena no Rakacenesesa. Mu divi Rakacenesesa mainga muno arka yo citenderano, yainga yakavakwa ngo goridhe no huni jo mukesha no goridhe. Mu divi Rakacena mainga muno cigajikiro co zvibani cakaithwa ngo goridhe, meza no dandiro ro kupisira rubani. Ngo pa ruvanje, painga pano basia ro utare no dandiro guru. Arka yo citenderano, yaiitisa kuti vaIziraeri vatame kukanganwa cigondiso cavo co kuzwira Jehovha. Unociziva kuti citenderano icinyi here? Ici cimwe co cigondiso cinosisira maningi.

 Jehovha wakasana Aroni no mwana wake kuti vashande pa tabherinake inga vapiri. Ndivona vaidikana kuingwarira, no kupekejeremo zvipo kuna Jehovha. Aroni basi, mupiri mukuru, ndiyena waidikana kunghwina mu divi Rakacenesesa. Iyena waingwinemo kamwe pa gore kuti aite cipiriso co zvishaishi zvake, zvishaishi zvo ukama hwake, no zvishaishi zvo jinja rese.

VaIziraeri vakapeja kuvaka tabherinake pa sure po gore rimwe no vabva ku Ejipita. Wari vazoiwana ndau yo kunamatira Jehovha.

Jehovha wakazaja tabherinake ngo goja zve wakaitisa kuti ifukijike ngo gwiti. Parairamba riri ngo panyezuru po tabherinake, vaIziraeri vairamba vari mundau javo. Asi gwiti paraikhwira, ivona vaiziva kuti vanodikana kumuka kuti vapinde. Ivona vaidikana kutora tabherinake voteverera kwaienda gwiti.