Jehovha wakagondisa kuti: ‘Akucazovi no kufa nokuti mariji, kurira nokuti kuhwaja. Ndinozopukusa musoji yo mumeso mwavo. Ngokuti zvo kare zvaapera.’

Jehovha wakadira Adhamu na Evha mu munda wo Edheni kuti vapone mu runyararo zve ngo mudakaro. Vaifanera kunamata Baba wavo wo mugore Jehovha zve no kuzaja nyika ngo vandhu. Adhamu na Evha vakaphwanya mutemo wa Jehovha, asi cidisiso ico acizivi kucinja. Pa bhuku iri tavona kuti zvese zvaanogondesa Mwari zvinoitika. Umambo hwake, unozoviisa makomborero akanaka pa nyika, inga zvaakagondisa Abhirahama.

Pa nguva shoma, Sathana no madhimoni pomwe no vese vandhu vakashata vanonga vacikapo. Zvisikwa zvese zvinopona zvizonamata Jehovha Mwari. Aticazohwaji kana kufa. Tinozomuka mukuvo wese takazara ngo  simba no mudakaro ngo kupona. Nyika inozova Paradhiso. Vese vanozova no zvokuha zvakanaka no nyumba jaushoni. Vandhu vanozova vakanaka, haiwa maphanga kana vashati. Zvinyama zvo mu makwasha azvizothyi vandhu, na itusu atizozvithyivo.

Jehovha paanotanga kumusa vandhu zvinozova zviro zvinodakajisa maningi. Tinozoashira vandhu vo kare, kudari inga Abheri, Nowa, Abhirahama, Sara, Mosi, Ruti, Esteri pomwe na Dhavhidhi. Tinozobata pamwepo naivona pa kuita kuti nyika ive Paradhiso. Kunozova no mabasa akawanda anodakaja kumaita.

Jehovha anoda kuti iwewe uve kondhoyo. Unozoziva Jehovha mu njira yaucikaveteri. Zuva ngo zuva ngatirambenyi tecikhwedera phedo kuna Jehovha, wari no kucingaperi!