UThobekile osebenza ebhizimusini lezempilakahle uthi: “Ekolitshini ngafunda labantu abanengi ababesithi bayasonta. Kodwa babeqila emihlolisweni njalo babesebenzisa izidakamizwa. Ababekwenza kwakungatshengisi ukuthi inkolo yabo iyabanceda.”

UMandla uthi: “Abantu engisebenza labo bayafona beqamba amanga besithi bayagula bona bengaguli. Bayasonta kodwa abakufundayo emasontweni abo abakusebenzisi, kunjengempahla egciniweyo endlini nje ingasetshenziswa.”

Inkolo kayilamandla okuntshintsha ukuziphatha kwabantu abanengi. Abantu abanengi lamuhla “balesimo sokukholwa kuNkulunkulu” kodwa “belandula amandla akho ukukholwa.” (2 KuThimothi 3:5) Abafundisi babo kabazange babeke isibonelo esihle njalo abafundisi laba kabazange banike izimvu zabo iseluleko seMibhalo ezisidingayo ukuze ziziphathe kuhle. Yikho abantu abanengi bekholwa ukuthi uNkulunkulu kalandaba lendlela abaphila ngayo.

IBhayibhili lisitshengisa ukuthi uNkulunkulu ulemizwa njalo ulendaba kakhulu lendlela esiziphatha ngayo. Ngezikhathi ama-Israyeli asendulo ehlamuka kuNkulunkulu, ‘ayemdabukisa.’ (IHubo 78:40) Kodwa ‘kulokuthokoza ezulwini’ nxa umuntu angatshiya ukuziphatha kwakhe okubi ngenhliziyo yonke. (ULukha 15:7) Nxa umuntu angazwisisa izimpawu ezinhle zobuntu bukaBaba wethu osezulwini, indlela athanda ngayo uNkulunkulu izakhula, besekumfuqa ukuthi athande lokhu uNkulunkulu akuthandayo njalo azonde lokhu uNkulunkulu akuzondayo.​—U-Amosi 5:15.

OFakazi bakaJehova “bakhuthaza ukuthi izimuli zibambane zibe luncedo kwabanye njalo zibe yizakhamuzi ezithembekileyo,” kutsho iphephandaba okuthiwa yi-Deseret News of Salt Lake City, Utah, U.S.A. Laphinda lathi: “Amalunga abo alandela izimiso zokuziphatha eziqinileyo. Akholwa ukuthi ukubhema, ukudakwa, ukusebenzisa izidakamizwa, ukubheja, ukungaziphathi ezindabeni zemacansini lokuba yizitabane, yimikhuba ephambanisa ubuhlobo loNkulunkulu.”

Ukufunda ngobuntu bukaNkulunkulu kubanceda njani oFakazi? UThobekile esike sakhuluma ngaye, uthi: “Ubuqili bujayelekile ebhizimusini lezempilakahle. Kulula ukuthi lawe uthatheke. Kodwa ukuzwisisa ukuthi uJehova * uzwa njani ngakho kuyanginceda ukuthi ngenze okulungileyo. Ngiyathokoza njalo umoya wami uchelesile.” UThobekile kathandabuzi ukuthi ukuphila elandela ukholo lwakhe sekwenze waba lempilo engcono.