Imibuzo YeBhayibhili Iyaphendulwa
Kuyenzeka yini ukuthi sibe lokuphila okungapheliyo?
Umuntu wokuqala, u-Adamu waphila okwamakhulu eminyaka. Kodwa wacina ngokuguga, wasesifa. Kusukela lapho, abantu lokhu bezama izindlela ezinengi zokubalekela ukuguga. Kodwa akulamuntu oseke wenelisa ukubalekela ukufa. Ngenxa yani? U-Adamu waguga wasesifa ngenxa yokuthi wona ngokungalaleli uNkulunkulu. Siyaguga ngoba sizalwa silesono esivela ku-Adamu, lesijeziso saso esiyikufa.—Bala uGenesisi 5:5; KwabaseRoma 5:12.
Nxa sifuna ukuthola ukuphila okungapheliyo kumele kube lomuntu osihlawulelayo. (UJobe 33:24, 25) Inhlawulo ngokuthile okubhadalwayo ukuze kukhululwe othile, njalo thina sidinga ukukhululwa ekufeni. (U-Eksodusi 21:29, 30) UJesu wasibhadalela inhlawulo ngokusifela.—Bala uJohane 3:16.
Singakuthola njani ukuphila okungapheliyo?
Kayisuye wonke umuntu ozakhululwa ekuguleni lasekugugeni. Kanti njalo labo abangalaleli uNkulunkulu njengo-Adamu abasoze bathole isibusiso sokuphila. Abantu abazathola ukuphila okungapheliyo yilabo kuphela abathethelelwe izono zabo.—Bala u-Isaya 33:24; 35:3-6.
Nxa sifuna ukuthethelelwa, kumele senze okuthile. Kumele simazi uNkulunkulu ngokufunda iLizwi lakhe, iBhayibhili. Lisifundisa ukuthi singaphila njani ngendlela engcono, ukuthi singawuthola njani umusa kaNkulunkulu kanye lokuphila okungapheliyo.—Bala uJohane 17:3; ImiSebenzi 3:19.