¿Toni techmachtiaj tanauatianij kemej tanemilia Dios?
Ne uejkauj, Dios kinkuik seki takamej uan siuamej maj kitematiltiani seki taman tein semi moneki. Nejon tein kitematiltijkej, ¿techmachtia tein moneki tikchiuaskej uan ijkon Dios techtatiochiuis? Kemaj. Maj tikitakan tein techmachtia tein kijtojkej eyi takamej tein kitematiltijkej tein Dios kijtouaya.
TANAUATIJKEJ ABRAHÁN (IBRAHIM)
Dios amo techichikouia uan kineki techtatiochiuis tinochin.
Dios kiluij tanauatijkej Abrahán: “Motechkopa nikintatiochiuis nochin kalyetouanij itech taltikpak” (Génesis 12:3).
¿Toni techmachtia? Ke Dios semi techtasojta uan kineki kintatiochiuis nochin kalyetouanij. Nochin takamej, siuamej uan konemej akin kitakamatiskej.
TANAUATIJKEJ MOISÉS (MUSA)
Dios techiknelia uan kintatiochiuia akin kinekij okachi kiixmatiskej
Akin kipia nochi chikaualis kichiuak maj Moisés uelini kichiuani seki taman. Maski ijkon, Moisés kitajtanij Dios: “Xinechixmatilti moojuan uan ijkon nimitsixmatis, uan niksentokas nikpias motatiochiualis” (Éxodo 33:13). Dios kiuelitak tein Moisés kitajtanij uan kitatiochiuij keman kimakak tamatilis uan kipaleuij maj okachi kuali kiixmati. Yejua ika, Moisés kiixmatik toTachijchiujkauj kemej se Dios akin ‘teikneliaʼ (Éxodo 34:6, 7).
¿Toni techmachtia? Ke Dios techtatiochiuis tinochin komo timochikauaj okachi kuali tikixmatiskej. Itech iTajtol, yejuatsin techiluia keniuj tikueyichiuaskej uan no, ke semi kineki techtatiochiuis.
TANAUATIJKEJ JESÚS (ISA)
Jesús teikneliaya uan kinpajtij nochin kokoyanij.
Dios techtatiochiuis nochipaya komo timomachtiaj tein Jesús kichiuak uan tamachtij.
Itech iTajtol Dios tikajsij inemilis Jesús uan tein tamachtij. Dios kimakak chikaualis Jesús maj kichiua seki taman. Kinpajtij akin amo tachiayaj, akin amo takakiaj uan akin amo uelia nejnemiaj. Uan hasta kichiuak maj oksepa nemikan akin momikilijkajya. Ijkon Jesús kinextij tein Dios kichiuas satepan. Yejua kijtoj tein moneki tikchiuaskej uan ijkon tikseliskej nejin kualtsitsin tatiochiualismej: “Ne nachipa nemilis kijtosneki yejua nijin: Ke in taltikpakuani ma mitsonixmatikan Tejuatsin ke tion Dios tion Yolmelauaktsin, uan sayo Tejuatsin tion Dios. Uan in taltikpakuani ma nechixmatikan Nejuatsin ke ni Jesucristo ten Tejuatsin tinechonualtitanik ya nikan taltikpak” (Juan 17:3).
Jesús teikneliaya, tetasojtaya uan katka kualtakat. Takamej uan siuamej akin tataman xiujmej kipiayaj kiselijkej nejin kualtsin tayoleualis: “Kuali ximomachtikan de nejua, porin Nejuatsin niyolyemankatagat; uan niyolkualtagat uan ijkon nankajsiske ne yolseuilis tech namoyolojuan” (Mateo 11:29). Itech nejon tonalmej takamej amo kinpoujkaitayaj siuamej, sayoj ke Jesús katka kualtakat iniuan uan kinpoujkaitak.
¿Toni techmachtia? Ke Jesús kintasojtaya nochin uan techmachtij keniuj moneki timouikaskej iniuan oksekin.
JESÚS AMO DIOS
Biblia techmachtia ke moajsi “sayo setsin [...] Dios” uan Jesucristo kitematiltiaya tein Dios kinauatiaya (1 Corintios 8:6). Jesús senkis kijtoj ke Dios katka okachi ueyi ke yejua uan ke Dios kiualtitanka nikan taltikpak (Juan 11:41, 42; 14:28). *
^ párr. 17 Komo tikonneki okachi tikonixmatis Jesucristo, xikonita tamachtilis 4 tein kipia folleto Kuali tanauatilmej tein Dios kitemaka, tein moajsi itech www.isa4310.com/ncj.
