Dios kiluij tanauatijkej Abrahán ke itechkopa semej ikoneuan “kiseliskej tatiochiualis nochin altepemej” (Génesis 22:18). ¿Akoni ika tajtojtoya?

Kemej ome mil xiujmejya, Dios kimakak chikaualis Jesús maj ueli kichiua seki taman. Dios kiluijka Abrahán ke kintatiochiuiskia nochin altepemej. Tein Jesús kichiuak kinextij ke yejua itechkopa mochiuaskia porin ualeuaya itech ichankauan Abrahán (Gálatas 3:14).

Tein Jesús kichiuak ika ichikaualis Dios tapaleuij maj kimatinij ke yejua tanauatijkej akin Dios kiixpejpenak maj kintatiochiui nochin. No kinextij ke itechkopa Jesús, Dios techtatiochiuis nochipaya. Maj tikitakan keniuj tein Jesús kichiuak ika ichikaualis Dios kinextia kualtsitsin taman tein kichiua.

Tetasojtaya uan kinpajtiaya akin mokokouayaj.

Se tonal, se takat akin kipiaya lepra kitataujtij Jesús maj kipajti. Jesús kimatokak uan kiluij: “Nikneki”. Uan takat niman pajtik (Marcos 1:40-42).

Katka kualtakat uan kintamakak akin mayanayaj.

Jesús amo kinekia maj nion akin kipano mayan. Miakpa kintamakak ika ichikaualis Dios, miles akin iniuan moajsia ika sayoj seki pantsin uan seki pescados (Mateo 14:17-21; 15:32-38). Nochin ixuikej uan hasta amo kitamijkej.

Teikneliaya uan kinajokuik akin momikilijkajya.

Keman kiitak se siuat akin amo nemiaok itakauj ke momikilij ikoneuj, uan kiitak ke siuat amo kipiayaok akin kiyekpias, Jesús “semi kiyoliknelij” uan oksepa kichiuak maj nemi ikoneuj (Lucas 7:12-15).