PRINĊIPJU BIBLIKU: “Min ma jirrabjax malajr hu aħjar minn raġel setgħan.”—Proverbji 16:32.

XI JFISSER DAN: Aħna nibbenefikaw meta niżviluppaw is-​saħħa biex nikkontrollaw l-​emozzjonijiet tagħna. Kultant, ilkoll nistgħu nirrabjaw għal raġuni tajba, imma jekk ma nikkontrollawx ir-​rabja tagħna, din tistaʼ tagħmel ħsara kbira. Riċerkaturi moderni jgħidu li fis-​saħna tal-​mument, nies irrabjati spiss jgħidu jew jagħmlu affarijiet u wara jiddispjaċihom.

X’TISTAʼ TAGĦMEL: Tgħallem ikkontrolla r-​rabja qabel ir-​rabja tikkontrolla lilek. Waqt li xi nies jaħsbu li rabja mhix ikkontrollata hi sinjal li int b’saħħtek, inkunu għaqlin jekk nirrikonoxxu li dan hu fil-​fatt sinjal li int dgħajjef. Il-​Bibbja tgħid: “Bħal belt minfuda, mingħajr sur, hu l-​bniedem li ma jrażżanx l-​ispirtu tiegħu.” (Proverbji 25:28) Mod prattiku biex tikkontrolla r-​rabja tiegħek hu billi jkollok il-​fatti kollha qabel taġixxi. “Id-​dehen taʼ bniedem itaffilu r-​rabja tiegħu.” (Proverbji 19:11) Nagħmlu tajjeb jekk nisimgħu ż-​żewġ naħat taʼ kwistjoni u mhux biss qanpiena waħda. Dan jistaʼ jgħinna nsiru nafu l-​affarijiet aħjar u forsi jgħinna nikkalmaw.

PRINĊIPJU BIBLIKU: “Uru li intom grati.”—Kolossin 3:15.

XI JFISSER DAN: Jintqal li persuna grata biss tistaʼ tkun ferħana. Anki xi nies li b’mod traġiku tilfu lil xi ħadd fil-​mewt jew tilfu xi ħaġa prezzjuża jaqblu maʼ dan. Huma qalu li s-​sigriet biex ikampaw mal-​emozzjonijiet tagħhom hu li jiffokaw fuq l-​affarijiet li huma grati għalihom u mhux fuq dawk li tilfu.

 X’TISTAʼ TAGĦMEL: Kull jum, agħmel lista tal-​affarijiet li int grat għalihom. Dawn m’għandhomx għalfejn ikunu affarijiet kbar. Immedita dwar affarijiet żgħar, bħax-​xena mill-​isbaħ meta tkun tielaʼ x-​xemx, fuq konversazzjoni sabiħa maʼ xi ħadd li tħobb, jew li sempliċiment għandek ġurnata oħra taʼ ħajja. Jekk tieħu l-​ħin biex tinnota u tapprezza dawn l-​affarijiet sbieħ, is-​saħħa emozzjonali tiegħek tistaʼ tmur għall-​aħjar.

Jistaʼ jkun taʼ benefiċċju kbir jekk taħseb dwar għala int grat għall-​familja u l-​ħbieb tiegħek. Meta tidentifika dak li tapprezza f’persuna, għidilha. Tistaʼ tagħmel dan wiċċ imb’wiċċ, b’ittra, b’e-​mail, jew b’messaġġ. Aktarx li dan se jsaħħaħ ir-​relazzjoni taʼ bejnietkom u se tesperjenza l-​ferħ li jiġi meta tagħti.—Atti 20:35.

ITLAQ META JKUN HEMM ARGUMENT.

“Il-​bidu tal-​ġlied hu bħal xi ħadd li jħalli l-​ilmijiet joħorġu; mela qabel ma tfaqqaʼ t-​tilwima, warrab.”—PROVERBJI 17:14.

EVITA LI TINKWIETA BLA BŻONN DWAR IL-​FUTUR.

“Qatt tkunu ansjużi dwar l-​għada, għax l-​għada se jkollu l-​ansjetajiet tiegħu. Hu biżżejjed għal kull ġurnata l-​ħażen tagħha.”—MATTEW 6:34.

TIRREAĠIXXIX FUQ KIF TĦOSSOK DAK IL-​MUMENT IMMA AĦSEB SEW QABEL TAGĦMEL XI ĦAĠA.

“L-​abbiltà li taħseb tibqaʼ tgħasses fuqek, u d-​dixxerniment iħarsek.”—PROVERBJI 2:11.