Ro rej Riiti buk ko ar rej Kajitõk . . .

Ta lemnok eo an Dri Kennan ro an Jeova ñe kabuñ ko rej kobaik tõmak ko air iben dron?

▪ Ekkar ñõn juõn buk etan World Christian Encyclopedia, eor enañin “10,000 kabuñ ko reoktõk jen dron ibelakin lõl in.” Kinke elap jorran ko rar walok kin an or bwoktak ikõtan kabuñ kein, armij ro rar kõnan kobaiki tõmak ko an kabuñ kein iben dron. Rar tõmak bwe men in enaj kõmõn bwe en or ainemõn im burukuk ilo lõl in ebwoktak.

Baibel eo ej rejañ armij ro bwe ren burukuk iben dron. Dri jilik Paul ear keiri congregation eo an dri Kristian ro ñõn juõn enbwin im aolep mõtõn ko ie ‘emwij karõki im kobaiki.’ (Dri Epesõs 4:​16) Eindreinlok wõt, dri jilik Piter ear rejañ dri tõmak ro mõtõn: “En buruemi otemjej wõt juõn.”​—1 Piter 3:8.

Dri Kristian ro jinoin rar mour ilo elõñ ailiñ ko me eoktõk mõnit im kabuñ ko an armij ro jen dron. Bõtab, ke ear jeje kin an armij ro koba iben kabuñ ko jet, Paul ear kajitõk: “Ta eo juõn ri tõmak im juõn eo ejjab tõmak remaroñ einwõt juõn kake?” Inem ear rejañ dri Kristian ro bwe ren “ilok jen” armij rein. (2 Dri Korint 6:​15, 17, UBS) Elukkun alikar bwe Paul ear konono nae an armij ro kobaiki tõmak ko air iben kabuñ ko jet. Etke ear eindrein?

Dri jilik Paul ear ba bwe ejjab ekkar ñõn an juõn dri Kristian emol kobaiklok tõmak eo an iben juõn eo eoktõk tõmak eo an. (2 Dri Korint 6:​14) Men in emaroñ kõmõn bwe tõmak eo an dri Kristian eo en ber ilo kauwatata. Men ko Paul ear uõta kaki rej einwõt an juõn jemen uõta kin ajiri ro nejin kinke ejela bwe elõñ ajiri ro enana mwiliir ilo bukwon eo. Kin an uõta, ej kwalok ñõn ajiri ro wõn ro wõt remaroñ ikkure ibeir. Men in emaroñ jab emõn iben elõñ armij ro. Bõtab, ilo an kõmõn eindrein, enaj kejbãrok ajiri ro jen rein renana. Ilo ejja wãwen in lok wõt, Paul ear jela bwe ilo an dri Kristian ro remol jenolok jen kabuñ ko jet, men in enaj kejbãrok ir jen mõnit ko rejakkar an kabuñ kein.

Ilo an kar rejañ dri Kristian ro bwe ren jenolok jen kabuñ ko jet, dri jilik Paul ear lor joñok eo an Jisõs. Meñe Jisõs ear likit joñok eo emõntata ilo an kar kõmõn bwe en or ainemõn ibwiljin armij ro, ear jab kobalok ilo kabuñ ko air. Elõñ kumi in kabuñ ko rar ber ilo ien eo Jisõs ear kwalok nan ion lõl, einwõt Parisi ro im Sadusi ro. Ilo mol, kumi kein ruo rar koba iben dron ñõn jumae Jisõs, im rar bareinwõt bebe ñõn mõne Jisõs. Ijo turãjet, Jisõs ear jiroñ ro rej lore bwe ren “kejbãrok ir jen . . . nan in katak an Parisi ro im Sadusi ro.”​—Matu 16:12.

Ta kin ranin? Nan in rejañ ko jen Baibel eo kin men in rej ke jerbal wõt ñõn kij ranin? Aet. Kinke tõmak ko reoktõk jen dron an kabuñ ko kajjojo reban koba iben dron einwõt an oil im dren ban kãre iben dron elañe kwoj likiti iloan juõn ainbat. Ñõn wanjoñok, elañe armij ro ilo kabuñ ko kajjojo rej koba iben dron im jar bwe en or ainemõn, wõn Anij eo rej jar ñõn e? Rej ke jar ñõn Anij in Trinity (Jilu Anij ilo Juõn) eo an kabuñ ko rej ba rej Kristian? Ak anij eo an dri Hindu etan Brahma? Rej ke jar ñõn anij eo etan Buddha? Ak ebar ke or anij im rej jar ñõn e?

Dri kanan Maika ear kanan bwe ilo naj “ran ko rej itok,” armij ro jen ailiñ otemjej renaj ba: “Jen wõnliñlok ñõn tol in Iroij, ñõn Temple an Anij eo an ri Israel. Enaj katakin kij men ko ej kõnan bwe jen kõmmõni; jenaj etetal ilo ial ko emwij an kãleti.” (Maika 4:​1-4, UBS) Elañe enaj walok men in, enaj or ainemõn im burukuk ibelakin lõl in, ejjab kinke armij ro rej kobaiki tõmak ko air iben dron, ak kinke aolep armij ro renaj ber ilo juõn wõt kabuñ emol.

[Pija ilo peij 9]

Dri tel ro an kabuñ ko relap ibelakin lõl ilo juõn kwelok ñõn kakobaik tõmak ko air iben dron ilo kar yiõ eo 2008

[Etan eo ej kõmman]

REUTERS/Andreas Manolis