Luk 20:1-47
20 Juon raan ke ear katakin armej ro ilo tampel̦ eo im kwal̦o̦k kõn ennaan eo em̦m̦an, bũrij ro reutiej im skraib ro im ri-tõl ro an ri-Ju ro rar itok ñan ippãn
2 im ba: “Kwõmaroñ ke kwal̦o̦k ñan kõm wõn n̦e ear kõmaroñ eok bwe kwõn kõm̦m̦ani men kein? Im kwaar bõk jãn ia am̦ mãlim?”
3 Ear uwaake er im ba: “In kajjitõk juon kajjitõk ippemi m̦okta, im kom̦win uwaak eõ.
4 Wõn eo ear kõmaroñ Jon bwe en peptaiji armej ro, Anij* ke ak armej?”
5 Innem rar kõnnaan ñan doon im ba: “Ñe jeba, ‘Anij,’ enaaj ba, ‘Innem etke kom̦ar jab tõmake?’
6 Bõtab ñe jeba, ‘Armej,’ aolep armej rein renaaj kad kõj ñan mej kõnke rej lukkuun tõmak bwe Jon ekar juon ri-kanaan.”
7 Kõn men in, rar uwaak im ba bwe rejaje ia eo Jon ear bõk an maroñ jãne.
8 Im Jesus eba: “Ñe ãindein, iban kwal̦o̦k ñan kom̦ wõn eo ear kõmaroñ eõ ñan kõm̦m̦ani men kein.”
9 Innem ear jino an kwal̦o̦k waanjoñak in ñan armej ro im ba: “Juon em̦m̦aan ear kõm̦m̦ane juon an jikin kallib kũreep im lel̦o̦k bwe jet ri-kallib ren kõjerbale.* Innem ear etal ñan bar juon aelõñ im eto an jako.
10 Ke ear jejjet iien m̦adm̦õd, em̦m̦aan eo ear jilkinl̦o̦k juon iaan ri-karejar* ro an ñan ippãn ri-kallib ro bwe ren lel̦o̦k ñane kõj eo an jãn jikin kallib kũreep eo. Bõtab ri-kallib ro rar m̦ane ri-karejar eo im jilkinl̦o̦ke ak rar jab lel̦o̦k jabdewõt men ñane.
11 Innem ear jilkinl̦o̦k bar juon ri-karejar, bõtab rar bar m̦ane im kõm̦m̦an bwe en jook im jilkinl̦o̦ke ak rar jab lel̦o̦k jabdewõt men ñane.
12 Kõn men in, ear jilkinl̦o̦k ri-karejar eo kein kajilu, bõtab rar bar m̦ane im kakoiki.
13 Innem em̦m̦aan eo an jikin kallib kũreep eo ear ba, ‘Ta eo inaaj kõm̦m̦ane kiiõ? Inaaj jilkinl̦o̦k l̦e nejũ ejitõnbõro ippa, im renaaj kautieje.’
14 Ke ri-kallib ro rar loe, rar kõnnaan ippãn doon im ba, ‘Eñin armej eo enaaj jolõte jikin kallib in. Jen m̦ane bwe en ad jikin kallib in.’
15 Innem rar iperl̦o̦k jãn jikin kallib kũreep eo im m̦ane ñan mej. Kiiõ ta eo em̦m̦aan eo an jikin kallib kũreep eo enaaj kõm̦m̦ane ñan er?
16 Enaaj itok im m̦an ri-kallib rein im lel̦o̦k jikin kallib kũreep eo ñan ro jet.”
Ke armej ro rar roñ men in, rar ba: “Eban wal̦o̦k men in!”
17 Bõtab ear reilo̦k ñan er im ba: “Innem ta mel̦el̦ein eoon in ej ba: ‘Dekã eo rũkkal ro rar kõjekdo̦o̦ne em̦õj an oktak im erom dekã eo eaorõktata’?
18 Aolep ro renaaj wõtlo̦k ñan ioon dekã in, renaaj tipdikdik. Im jabdewõt eo dekã in ej ure, enaaj pedakilkil.”
19 Skraib ro im bũrij ro reutiej rar jel̦ã bwe ear waanjoñak kõn er, innem rar pukot kilen aer jibwe ilo iien eo wõt. Ijoke, rar mijak armej ro.
20 Ãlikin aer kar etale m̦akũtkũt ko an, rar kõl̦l̦ãiki jet em̦m̦aan ilo ittino bwe ren riab ãinwõt ñe er armej em̦m̦an. Innem rar jilkinl̦o̦k er ñan ippãn Jesus bwe ren pukot kilen aer maroñ kõm̦m̦an bwe en bõd an kõmel̦el̦e, kõnke ren maroñ liaakel̦o̦k ñan kien im kom̦ja* eo.
21 Im rar kajjitõk ippãn im ba: “Ri-Kaki, kõm jel̦ã bwe men ko kwõj ba im katakin kaki rejim̦we im kwõjjab kalijekl̦o̦k. Kwõj katakin armej ro m̦ool eo kõn Anij.
22 Ak kiiõ kwõl̦ak lale emãlim ke* bwe jen kõl̦l̦ã eowõj ñan Sizar?”*
23 Bõtab ear kile aer etao im ear ba ñan er:
24 “Letok juon denariõs* bwe in lale. Pijain wõn in ej wal̦o̦k ilo jããn in im etan wõn in ie?” Rar uwaak im ba: “Sizar.”
25 Im eba: “Eokwe, kom̦ij aikuj lel̦o̦k ñan Sizar men ko an Sizar, im lel̦o̦k ñan Anij men ko an Anij.”
26 Rar jab maroñ kõm̦m̦an bwe en bõd an kõmel̦el̦e im̦aan mejãn armej ro, ak rar ikõñ kõnke rebwilõñ kõn uwaak eo an.
27 Bõtab jet iaan Saddusi* ro ak ro rej ba bwe ejjel̦o̦k jerkakpeje, rar itok ñan ippãn im ba:
28 “Ri-Kaki, Moses ear je im ba, ‘Ñe juon em̦m̦aan emej jãn lio pãleen ak ejjel̦o̦k nejierro, l̦eo jatin* ej aikuj m̦areiki kõrã eo kõnke en l̦ak wõr nejierro, en tarrin nejin l̦eo ekar mej.’
29 Kiiõ ewõr jimjuon em̦m̦aan rej jemjati. L̦eo erũtto ear bõk juon pãleen, bõtab ear mej ak ejjel̦o̦k nejin.
30 L̦eo kein karuo ear m̦areik kõrã eo, ak ebar mej.
31 Ear bar wal̦o̦k ejja men in wõt ñan l̦eo kein kajilu. Aolep jemjati ro jimjuon rar m̦areik kõrã eo, bõtab er aolep rar mej ak ejjel̦o̦k nejier.
32 Ãliktata, kõrã eo ear mej.
33 Kiiõ ilo iien jerkakpeje en̦, wõn iaan em̦m̦aan rein jimjuon enaaj pãleek lio ke aolepeer rar m̦areiki?”
34 Jesus ear ba ñan er: “Armej in jukjukun pãd* in rej m̦are,
35 ak ro tõllo̦kier ñan mour ilo jukjukun pãd eo ej itok im renaaj jerkakpeje, reban m̦are.
36 Ilo m̦ool, reban bar mej kõnke renaaj ãinwõt enjel̦ ran̦. Im kõnke renaaj bar jerkakpeje, renaaj nejin Anij.
37 Ak ilo m̦ool, ilo bwebwenato eo kõn wõjke eo eurur, Moses ear kaalikkar bwe ro remej renaaj bar mour ke ear ba bwe Jeova* ‘ej Anij eo an Ebream, Aisak, im Jekob.’
38 Ej Anij an ro remour im jab an ro remej, kõnke ippãn Anij,* aolep im mour.”
39 Innem jet iaan skraib ro rar uwaak im ba: “Ri-Kaki, ejim̦we am̦ uwaak.”
40 Rar ba men in kõnke rar jab bar peran in kajitũkini ñan jidik.
41 Kõn men in, ear kajjitõk ippãer im ba: “Innem etke rej ba bwe Christ ej nejin Devid?
42 Devid make ear ba ilo bokin Sam im ba, ‘Jeova* ear ba ñan aõ Irooj: “Kwõn jijet ituanbwijmaroñin peiũ
43 m̦ae iien inaaj likũt ro rej kõjdate eok bwe ren eran neem̦.”’
44 Innem ewi wãween an maroñ nejin Devid ke Devid ear ãñinñini im ba Irooj?”
45 Ke aolep armej ro rej roñjake, ear jiroñl̦o̦k ri-kal̦oor ro an im ba:
46 “Kom̦win kõjparok kom̦ jãn skraib ran̦. Ñe rej itoitak rej kõn̦ak kopã ko raetok, im rekõn̦aan bwe armej ren yokyokwe er ilo jikin wia ko. Bareinwõt, rekõn̦aan bwe ren jijet ilo jea ko im̦aantata* ilo im̦õn kabuñ ko, im ilo jikin ko rem̦m̦antata ilo iien kõjota ko.
47 Rej bũki men ko m̦weien kõrã ro emej l̦õm̦aro pãleer,* im rej kaetok aer jar ñan kõmje mejãn armej. Enaaj l̦apl̦o̦k an armej rein bõk kaje jãn ro jet.”
Footnotes
^ Kajin Grik, “lañ.”
^ Bõlen em̦m̦aan in ear kõm̦m̦an kon̦ ippãn ri-kallib rein bwe ren kab lel̦o̦k jet iaan leen jikin kallib kũreep eo ñane bwe en tarrin on̦ããn aer kõjerbal jikin kallib eo an.
^ Ak “ri-kõm̦akoko.”
^ Ak “kabna.”
^ Ak “ejim̦we ke.”
^ Ak “Irooj L̦apl̦ap eo an Rom.”
^ Jããn jelba in Rom. Lale “Denariõs” ilo Kõmel̦el̦e Ko.
^ Lale “Saddusi” ilo Kõmel̦el̦e Ko.
^ Baibõl̦ ejjab lukkuun kaalikkar wõn eo erũttol̦o̦k im wõn eo edikl̦o̦k iaan jemjati rein rar mej.
^ Lale “Jukjukun pãd” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Ak “im̦aan mejãn Anij.”
^ Lale “Jeova” ilo Kõmel̦el̦e Ko.
^ Ak “rem̦m̦antata.”
^ Kajin Grik, “Rej orañl̦o̦k m̦õko im̦õn kõrã ro emej l̦õm̦aro pãleer.”
