Luk 10:1-42
10 Ãlikin men kein, Irooj ear kããlõt 70 iaan ri-kal̦oor ro an, im ear jilkinl̦o̦k er, ruo iaan ruo iaan, bwe ren etal im̦aan ñan aolep bukwõn im jikin ko ej pojakin etal ñani.
2 Innem ear ba ñan er: “El̦ap jonikkan ñan m̦adm̦õd, ak eiiet ri-jerbal. Kõn men in, kom̦win akwel̦ap ñan ri-Tõl eo an jerbalin m̦adm̦õd bwe en jilkintok elõñl̦o̦k ri-jerbal bwe ren aini jonikkan ko an.”
3 Kom̦win ilo̦k, ak kom̦win kanooj kõjparok! Ij jilkinl̦o̦k kom̦ ãinwõt jiip ko ñan ibwiljin ol̦ip ko.
4 Kom̦win jab ebbõk nien jããn, ak nien m̦õñã, ak ebbõk bar juuj, im kom̦win jab yokyokwe* jabdewõt ilo ial̦ eo ami l̦o̦k.
5 Jabdewõt em̦ kom̦ij del̦o̦ñ ñane, kom̦win m̦oktata ba: ‘Aenõm̦m̦an ñan m̦wiin.’
6 El̦aññe juon armej in aenõm̦m̦an ej pãd ijo, ami naanin aenõm̦m̦an enaaj pãd ippãn. Bõtab ñe ejjel̦o̦k, kom̦win dãpij wõt ami aenõm̦m̦an.
7 Im kom̦win pãdwõt ilo m̦weo im̦õn armej in aenõm̦m̦an, im kom̦win m̦õñã im idaak men ko rej liwaj ñan kom̦, kõnke ri-jerbal ej tõllo̦kũn on̦ããn. Kom̦win jab etal jãn em̦ ñan em̦ im jokwe ie.
8 “Bareinwõt jabdewõt jikin kom̦ij etal ñane im rej karwaineneiki kom̦, kom̦win m̦õñã ekkan ko rej liwaji,
9 im kom̦win kõmour ri-nañinmej ro ie im jiroñ er im ba: ‘Aelõñ eo an Anij* ej epaak.’
10 Ak ñe kom̦ij etal ñan juon jikin im rejjab karwaineneik kom̦, kom̦win ilo̦k ñan ial̦leplep ko im ba:
11 ‘Kõmij pikpikũri im jol̦o̦k bũñalin neemmim jãn ijin jikimi, men in ej kein kakkõl kom̦. Bõtab kom̦win jel̦ã bwe Aelõñ eo an Anij ej epaak.’
12 Ij ba ñan kom̦ bwe ilo naaj raan en̦, enaaj l̦apl̦o̦k an armej in jikin in bõk kaje jãn armej in Sodom.
13 “Jerata ñan kom̦, armej in Korezin! Jerata ñan kom̦, armej in Betseida! El̦aññe menin bwilõñ ko rar wal̦o̦k ñan kom̦ ren kar wal̦o̦k ñan armej ro ilo Tair im Saidon,* etto wõt ke ren kar ukel̦o̦k ilo aer kõn̦ak nuknuk ko el̦ap ideer im jijet ioon melkwaarar.*
14 Ilo naaj iien ekajet en̦, enaaj l̦apl̦o̦k ami bõk kaje jãn armej in Tair im Saidon.
15 Ak kom̦ armej in Kaperneum, ta kom̦ naaj etal ñan lañ ke? Kom̦ ban! Kom̦ naaj ilo̦k ñan Lõb.*
16 “Jabdewõt eo ej roñjake kom̦ ej bar roñjake eõ, im jabdewõt eo ej kõjekdo̦o̦n kom̦ ej bar kõjekdo̦o̦n eõ. Bareinwõt jabdewõt eo ej kõjekdo̦o̦n eõ, ej bar kõjekdo̦o̦n Eo ear jilkintok eõ.”
17 Innem ke ri-kal̦oor ro 70 rar jepl̦aak, rar lañlõñ im ba: “Irooj, jetõb ko rettoon* rar pokake kõm ke kõmar kõjerbal etam̦.”
18 Innem ear ba ñan er: “Iar lo an Setan wõtlo̦k jãn lañ ãinwõt ñe jarom ej wõtlo̦k jãn lañ.
19 Ij ba ñan kom̦ bwe em̦õj aõ lewaj maroñ ñan kom̦ bwe kom̦win jujuuri jineik ko im mãdepep ko, im em̦õj aõ lewaj ami maroñ ioon aolep kajoor ko an ri-kõjdat eo. Innem ejjel̦o̦k jabdewõt men enaaj ko̦kkure kom̦.
20 Meñe ãindein ak kom̦win jab lañlõñ kõn an jetõb ko rettoon pokake kom̦, bõtab kom̦win lañlõñ kõnke em̦õj je etami ilañ.”
21 Ilo ejja iien eo wõt, Jesus ear obrak kõn jetõb kwõjarjar* im ear lañlõñ im ba: “Jema, Irooj in lañ im lal̦, ij nõbar eok ilo̦bwilej kõnke kwaar lukkuun n̦ooji men kein jãn rimmãlõtlõt ro im ro rejel̦ãl̦o̦kjen̦, bõtab kwaar kwal̦o̦ki ñan ajri ro reddik. Im Jema, kwaar kõm̦m̦ane men in kõnke eñin ej kõn̦aan eo am̦.
22 Em̦õj an Jema letok men otemjej ñan ña. Ejjel̦o̦k en̦ ejel̦ã kõn ña* ak Jema wõt. Bareinwõt, ejjel̦o̦k en̦ ejel̦ã kõn Jema ak ña wõt im ro ij m̦õn̦õn̦õ in kwal̦o̦k kõn Jema ñan er.”
23 Innem ear oktakl̦o̦k ñan ri-kal̦oor ro an im kõnnaanl̦o̦k ñan er wõt im ba: “Em̦õn̦õn̦õ ro rej lo men ko kom̦ij loi.
24 Ij ba ñan kom̦ bwe elõñ ri-kanaan im kiiñ rar kõn̦aan loi men kein kom̦ij loi ak rar jab maroñ, im rar kõn̦aan roñ kõn men kein kom̦ij roñ kaki ak rar jab maroñ.”
25 Kiiõ juon em̦m̦aan etijem̦l̦o̦k kõn Kien eo ear jutak bwe en mãlejjoñe, ear ba: “Ri-Kaki, ta eo ij aikuj kõm̦m̦ane bwe in maroñ jolõt mour indeeo?”
26 Ear uwaake im ba: “Ta eo jeje ko rej ba ilo Kien eo? Ta mel̦el̦e eo am̦ jãn am̦ kar riiti?”
27 Im eba: “‘Kwõn yokwe Jeova* am̦ Anij kõn aolepen bũruom̦, im kõn aolepen am̦ mour, im kõn aolepen am̦ kajoor kab aolepen am̦ l̦õmn̦ak.’ Im ‘kwõn yokwe ri-turum̦* ãinwõt am̦ yokwe eok make.’”
28 Im eba ñane: “Ejim̦we am̦ uwaak. Kwõn wõnm̦aanl̦o̦k im kõm̦m̦ani men kein im kwõnaaj bõk mour indeeo.”
29 Bõtab kõn an em̦m̦aan eo kõn̦aan kõwãnõk e make, ear ba ñan Jesus: “Wõn ri-turũ?”
30 Innem Jesus ear kwal̦o̦k juon bwebwenato bwe en uwaake. Ear ba: “Ewõr juon em̦m̦aan ear wanlal̦l̦o̦k jãn Jerusalem ñan Jeriko, im jet ri-ko̦o̦t rar m̦ane im bõk nuknuk ko an kab men ko m̦weien, im rar etal jãne ak eitõn mej.
31 Kiiõ, juon bũrij ear jide im wanlal̦tak ilo ial̦ eo tok im ke ej loe em̦m̦aan eo, ear jeer im etal wõt jãne.
32 Bareinwõt, juon ri-Livai ear itok ijo tok im ke ej loe em̦m̦aan eo, ear bar jeer im etal wõt jãne.
33 Bõtab ke juon ri-Sameria ear itok ilo ial̦ eo tok im loe em̦m̦aan eo, ear tũriam̦okake e.
34 Kõn men in, ear etal ñan ippãn im lutõk weil̦ im wain ioon kinej ko an im kori. Ãlikin, ear likũti ioon menninmour eo nejin im bõkl̦o̦ke ñan juon em̦* im lale.
35 Raan eo tok juon, ear lel̦o̦k ruo denarii* ñan armej eo im̦õn m̦weo im ba: ‘Kwõn lale im kõjparoke em̦m̦aan in, im ñe el̦apl̦o̦k joñan eo kwõnaaj jol̦o̦k kake jãn joñan in, inaaj bar karo̦o̦lwaj ñe ijepl̦aaktok.’
36 Kwõl̦ak lale wõn iaan l̦õm̦arein jilu ej ri-turin em̦m̦aan eo ri-ko̦o̦t ro rar m̦ane?”
37 Ear uwaak im ba: “Eo ear kwal̦o̦k tũriam̦o ñane.” Innem Jesus ear ba ñane: “Kwõn ilo̦k im kõm̦m̦ane ejja men in wõt.”
38 Kiiõ rar wõnm̦aanl̦o̦k ilo ial̦ eo aer im etal ñan juon bukwõn im juon kõrã etan Marta ear karwaineneiki Jesus ñan m̦weo im̦õn ãinwõt juon ri-lol̦o̦k.
39 Ear wõr juon jatin Marta kõrã etan Meri, im ear jijet iturin neen Irooj im roñjake men ko ej ba.*
40 Bõtab Marta ear m̦ad kõn men ko wõj ej kõpooji, innem ear itok ñan ippãn Jesus im ba: “Irooj, kwõjjab abn̦õn̦õ kõn an liin jatũ jab jipañ eõ kõpooj men kein ke? Kwõn ba en itok im jipañ eõ.”
41 Ak Irooj ear uwaake im ba: “Marta, Marta, elõñ wõt men kan̦e kwõj inepata im m̦ad kaki.
42 Jet wõt men jej aikuji, ak bõlen emaroñ bwe wõt juon. Meri ear kããlõte men eo em̦m̦an* im ejjel̦o̦k en̦ enaaj bõke jãne.”
Footnotes
^ Ilo kar tõre ko, ear juon m̦anit bwe ñe rej yokyokwe ren atbo̦kwõje doon, mejenmaik doon, im bwebwenato aetok.
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Jikin kein rejjab jikin ri-Ju.
^ Men in ej kõkal̦l̦en aer bũrom̦õj.
^ Ak “Hedis,” ej kõkkar kake lõb eo libõn aolep armej. Lale “Lõb” ilo Kõmel̦el̦e Ko.
^ Naan eo ilo kajin Grik ej dai·mo′ni·on, ej jitõñl̦o̦k ñan enjel̦ ro renana.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Kajin Grik, “Nejin.”
^ Lale “Jeova” ilo Kõmel̦el̦e Ko.
^ Ilo kajin Grik, naan eo “ri-turum̦” emaroñ jitõñl̦o̦k ñan jabdewõt armej.
^ Mel̦el̦ein, juon em̦ me ro rej itoitak rej kõl̦l̦ã on̦ããn aer kiki ie.
^ Jããn jelba in Rom. Lale “Denariõs” ilo Kõmel̦el̦e Ko.
^ Kajin Grik, “naan eo an.”
^ Ak “em̦m̦antata.”
