Tich Joote 7:1-60
7 To jadolo maduong’ nopenje kama: “Be wechegi gin adier?”
2 Stefano nodwoko niya: “Owetena gi wuonega, winjuru. Nyasaye ma nigi duong’ nofwenyore ne kwarwa Ibrahim ka ne en Mesopotamia, ka pok nodhi dak Haran,+
3 mi nochike ni, ‘Dar iwe pinyu kendo ia kuom wedeni mondo idhi e piny ma abiro nyisi.’+
4 Eka nowuok e piny Jo-Kaldea mi nodhi dak Haran. To bang’ tho wuon-gi,+ Nyasaye nomiyo oa kanyo mi nobiro dak e piny ma koro udakie sanini.+
5 To e ma ne ok omiye pok moro amora kuno, kata mana lowo ma ne nyalo rome ketoe tiende. To ne osingo ni ne odhi miye pinyno obed mare kod kothe,+ kata obedo ni gie kindeno ne pod oonge nyathi.
6 E wi mano, Nyasaye nowachone ni kothe ne dhi bedo jodak e piny ma wendo, kendo ni ji ne dhi timogi wasumbni mi gisandgi kuom higni 400.+
7 Nyasaye nowacho kama, ‘To anang’ad bura ne oganda+ ma notimgi wasumbni, kendo bang’ mano giniwuog e pinyno mondo gilama kar kae.’+
8 “Bende, notimo kode singruok mar nyangu,+ mi nonyuolo Isaka+ motere nyangu e odiechieng’ mar aboro,+ kendo Isaka nonyuolo* Jakobo, to Jakobo nonyuolo jodong dhoudi 12.
9 To jodong dhoudigo nobedo gi nyiego gi Josef+ mi ne giuse Misri.+ Kata kamano, Nyasaye ne ni kode,+
10 kendo ne orese kogole e masiche duto mi nomiyo obedo ng’at mariek kendo ma Farao ruodh Misri ne oyiego. Eka Farao nokete mondo olochi e wi Misri kod od Farao duto.+
11 To kech moro nosieko Misri duto kod Kanaan. Ne en masira maduong’, kendo kwerewa machon ne ok nyal yudo chiemo.+
12 Kata kamano, Jakobo nowinjo ni chiemo ne ni Misri, mi nooro kwerewa machon kuno.+
13 Ka noorogi mar ariyo, Josef nofwenyore ne owetene mi Farao nong’eyo joodgi Josef.+
14 Omiyo, Josef nooro wach mondo okel Jakobo wuon mare kod wedene duto,+ kendo kwan-gi giduto ne gin ji 75.+
15 Eka Jakobo ne odhi Misri+ mi notho kuno,+ kendo kwerewa machon bende ne otho.+
16 Ne oter ringregi Shekem, kendo ne opielgi e liel kama Ibrahim nong’iewo gi fedha kuom yawuot Hamor e piny Shekem.+
17 “Ka kinde nokayo mondo singruok ma Nyasaye nowacho ne Ibrahim ochop, ji nosemedore mi gibedo mang’eny Misri,
18 nyaka nochopo kinde ma ruoth mopogore nochako locho e piny Misri, ruoth ma ok nong’eyo Josef.+
19 Ruodhno nowuondo ogandawa kendo nochuno wuone mondo ojwang’ nyithindgi mayom mondo oneggi.+
20 Mano e kinde ma ne onyuolie Musa, kendo ne ojaber ahinya kata mana e wang’ Nyasaye. Ne opidhe kuom dweche adek e od wuon mare.+
21 To ka nojwang’e,+ nyar Farao nokawe mopidhe kaka wuode owuon.+
22 Omiyo, Musa noyudo tiegruok e rieko duto mag Jo-Misri. To adier, wechene kod gik ma notimo ne nigi teko ahinya.+
23 “Koro, ka nobedo jahigni 40, noparo mondo odhi olim owetene ma ne gin nyithind Israel.+
24 Ka noneno ka itimo marach ne Ja-Israel moro, ne okonye monego Ja-Misri. Nochulo kuor e lo nyawadgi ma ne itimone marachno.
25 Noparo ni owetene ne dhi fwenyo ni Nyasaye ne tiyo kode e kelonegi warruok, to ne ok gifwenyo mano.
26 Kinyne ka noyudogi ka gidhawo, notemo thegogi mondo gibed gi kuwe, kowacho niya: ‘Un mana owete. Ang’o momiyo udhawo uwegi?’
27 To ng’at ma ne timo marach ne nyawadgino nodhiro Musa mopenje kama: ‘En ng’a moketi jatendwa kendo jang’adnwa bura?
28 An bende idwaro nega kaka nyoro inego Ja-Misricha, koso?’
29 Ka Musa nowinjo mano, noringo mi nobedo jadak e piny Midian, kama ne onyuoloe yawuoyi ariyo.+
30 “Higni 40 bang’e, malaika moro nofwenyorene e thim mar Got Sinai e mach ma ne liel e yiend kudho.+
31 Ka Musa noneno mano, ne owuoro ahinya. To sa ma nosudo mondo onon gima ne timoreno, nowinjo dwond Jehova* ka wachone kama:
32 ‘An e Nyasach kwereu, Nyasach Ibrahim, gi Isaka, kod Jakobo.’+ Musa nochako tetni kendo ne ok omedo nono yadhno.
33 Jehova* nowachone niya: ‘Lony wuoche e tiendi, nimar ka michung’ieno en kama ler.
34 Adier aseneno kaka joga sandore Misri, kendo asewinjo ywakgi,+ omiyo aselor mondo aresgi. Koro bi mondo aori Misri.’
35 Musa achielni, ma ne gisekwer ni ok ging’eyo ka gipenje ni, ‘En ng’a moketi jatelo kendo jang’ad bura?’+ en e jalno ma Nyasaye nooro+ mondo obed jatelo kendo jares kokalo kuom malaika ma nofwenyorene e yiend kudho.
36 Ng’atni ne otelonegi kogologi+ Misri kendo notimo tije madongo gi honni e piny Misri,+ gi Nam Makwar,+ kendo e thim kuom higni 40.+
37 “Jali e Musa ma nowacho ne nyithind Israel niya: ‘Nyasaye biro yiero janabi moro machal koda kuom oweteu.’+
38 Musano e ma ne nigi oganda e thim kod malaika+ ma nowuoyo kode+ e Got Sinai gi kwerewa, kendo ne oyudo weche mangima mag Nyasaye mondo omiu.+
39 Kwerewa notamore winje, to ne gikwede,+ kendo gie chunygi ne gidok Misri,+
40 mi giwacho ne Harun kama: ‘Losnwa nyiseche mamoko mondo otel e nyimwa. Nimar wakia gima otimore ne Musa, jal ma notelonwa ka wawuok e piny Misri.’+
41 Omiyo, gie kindeno ne giloso nyaroya mi gitero misango ne sanamuno kendo ne gichako bedo gi nyasi mar mor nikech tich mar lwetgino.+
42 Kuom mano, Nyasaye ne oweyogi mondo gilam wang’-chieng’, gi dwe, kod sulwe mag polo,+ mana kaka ondik e bug Jonabi niya: ‘Un Jo-Israel, an ok e ma ne ukelona chiwo kod misengni kuom higni 40 ma ne un e thim, donge en kamano, koso?
43 To hema mar Molok+ kod sulwe mar nyasaye ma Refan e ma ne ujoting’o, mago e sanamu ma ne uloso mondo ulam. Omiyo, abiro darou mi ukal Babulon.’+
44 “Kwerewa ne nigi hema ma ne nyiso ni Nyasaye ne ni kodgi e thim, ma nochiko Musa mondo olose kaluwore gi kido ma noseneno.+
45 Kendo ne omi kwerewa machon+ hemano, mi ne gibiro kode gi Joshua nyaka e piny ogendni+ ma Nyasaye noriembo mondo oa e nyimgi. Hemano nosiko kanyo nyaka e ndalo Daudi.
46 Nyasaye ne mor gi Daudi, kendo nokwayo mondo omiye thuolo makende mar gero kar dak ne Nyasach Jakobo.+
47 To Solomon e ma nogerone ot.+
48 Kata kamano, Ng’at Mamalo Chutho ok dag e ute molos gi lwedo,+ mana kaka janabi nokoro niya:
49 ‘Jehova* owacho ni, polo e kom-lochna,+ to piny en raten tienda.+ En ot machal nade ma ubiro gerona? Kata ere ka ma anyalo yueyoe?
50 Donge lweta e mosechueyo gigi duto, koso?’+
51 “Un jo ma wigi tek kendo ma ok oter nyangu e chunygi kod itgi, kinde duto usebedo kukwedo roho maler; utimo mana kaka kwereu bende notimo.+
52 Be nitie janabi moro amora ma kwereu ne ok osando?+ Adier, ne ginego jo ma nolando wach biro mar jal makare,+ kendo un usebedo jondhokne gi jonekne,+
53 un ma nomiu Chik koa kuom malaike+ to ok usemako.”
54 Bang’ winjo wechego, ne gibedo gi mirima mager kode, mi ne gimuodo lekegi.
55 To kopong’ gi roho maler, nochomo wang’e e polo mi noneno duong’ mar Nyasaye kendo Yesu kochung’ e bad Nyasaye korachwich.+
56 Nowacho kama: “Neuru! Aneno polo koyawore kendo Wuod dhano+ ochung’ e bad Nyasaye korachwich.”+
57 Mano nomiyo gikok gi dwol maduong’ kendo ne gidino itgi gi lwetegi mi ne gimuomore kuome giduto.
58 Bang’ wite oko mar dala, ne gichako chiele gi kite.+ Joneno+ mag miriambo noketo lepgi ma oko e tiend rawera moro miluongo ni Saulo.+
59 Sa ma ne gichielo Stefano gi kite, nosayo kama: “Ruoth Yesu, aketo much ngimana e lweti.”
60 Eka bang’ goyo chonge piny, nokok gi dwol maduong’ niya: “Jehova,* kik ikwan richoni kuomgi.”+ Bang’ wacho wechego, ne onindo e tho.
Weche Moler Piny
^ Kata nyalo bedo, “bende notimo kamano ne.”
^ Som Apendiks A5.
^ Som Apendiks A5.
^ Som Apendiks A5.
^ Som Apendiks A5.
