Muma Maler en Wach Nyasaye ma ondiko ne ji duto. Mondo wang’e Wuon-go maber, nyaka wasome. (Johana 17:3; 2 Timotheo 3:​16) E Muma, Jehova Nyasaye elonwa gimomiyo nochueyo dhano kod piny.​​—⁠Chakruok 3:​15; Fweny 21:​3, 4.

Muma e buk kende ma nyalo konyo ji e yo maberie moloyo. Okonyowa mondo waher ji, wanyisgi ng’wono, kendo wakechgi mana kaka Jehova timo. Muma miyowa geno, to mano konyowa nano kata mana e chandruoge ma korgi tek. E kindegi bende, Muma pod dhi nyime elo e lela gik maricho ma timore e piny ma ok luwre gi dwaro mar Nyasaye.​​—⁠Zaburi 119:105; Jo-Hibrania 4:​12; 1 Johana 2:​15-​17.

Ne okwong ndik Muma e dho Hibrania, dho Aram, kod dho Grik. Oseloke kaka en duto kata nusne e dhok ma dirom 3000. En e buk kende ma yudore e dhok mang’eny kendo mosepog ne ji mathoth. Mano ok onego okawwa gi wuoro. Muma nosekoro chon niya: “Wach maber mar Pinyruoth ibiro yal e piny mangima mondo obed ranyisi ne ogendni duto, eka giko nobi.”​​—⁠Mathayo 24:14.

Nikech wang’eyo ni weche manie Muma gin weche mogen ahinya, dwachwa maduong’ en loko Muma ma winjore maler kendo ma somo yot, ma ok wawito paro moro amora monego obed e iye. Sula ma yudore e Apendiks ma gin, “Weche Matayo Tij Loko Muma,” “Yo ma Olosgo Mumani,” kod “Kaka Muma Nochoponwa,” lero moko kuom weche ma ne oluw sama ne iloko kod gik mamoko ma yudore e Mumani.

Joma ohero Jehova kendo ma lame gadier owinjore oyud Muma ma wacho adier kendo ma winjore maler. (1 Timotheo 2:4) Mano e momiyo waloko Mumani e dho Luo kowuok e Muma mar Loko mar Piny Manyien mar Kisungu. Lamo marwa en ni Mumani biro konyi ahinya mondo ‘imany Nyasaye mi iyude.’​​—⁠Tich Joote 17:27.