SECHE duto kapok ndege owuok, jariemb ndege nyaka non gik moko e ndegeno e yo malong’o. Otiyo gi otas mondikie gik moko duto monego onon e ndegeno. Kaok okalo maber e gigo, to ok onyal fwenyo gima nyalo kelo masira e ndegeno. Kata mana joma oseriembo ndege kuom higini mang’eny, pod dwarore onon gik moko duto mochan e otas.

² Mana kaka jariemb ndege nono gik mochanne e otas, in bende nitie gik madwarore inon mondo ibed gadier ni yie mari nikare. Bed ni nyocha eka oa batisi, kata isebedo kitiyone Nyasaye kuom higini mang’eny, pod dwarore ni pile ka pile inon ka yie mari pod otegno, kendo kabe pod ichiwori ne Jehova Nyasaye gi chunyi duto. Kaok itimo kamano gi kinda, to tem moro nyalo ketho winjruok mari gi Jehova. Muma chiwonwa siem kama: “Ng’ato ma paro ni ochungo, mondo onen kik ogore piny.”—1 Kor. 10:12.

³ Jokristo ma nodak e gweng’ Galatia ne dwarore onon chal mar yie margi, kendo mako matek maok giweyo thuolo mane gin-go mar lamo Jehova. Misango mar Yesu noyawo yo ne jogo maketo yie kuome, mondo ging’e Nyasaye e yo makende. Ne gidhi bedo yawuot Nyasaye. (Gal. 4:9) Ne nitie jomoko e kanyakla mar Jo-Galatiano, ma ne wacho ni Jokristo ne nyalo mana bedo joma kare mana ka giluwo Chike Musa. Kata kamano, Nyasaye koro ok ne ti gi Chikego, kendo joma ok Jo-Yahudi ne ok nie bwo Chike Musa. Jo-Yahudi kaachiel gi joma ok Jo-Yahudi e kanyaklano, ne dwarore mondo otim dongruok e adiera. Ne dwarore mondo ging’e maler ni koro Nyasaye ok ne dwar ni ji oluw Chike Musa.

⁴ Nitie gimomiyo weche ma jaote Paulo nondiko ne Jo-Galatia, ne oket ei Muma. Ne ondikgi mondo oparne Jokristo duto ni kik giwe adiera mag Muma ma ne gisepuonjore kendo dok chien e gik ma ne giseweyo. Jehova notiyo gi Paulo mondo ojiw jogo duto malame mondo osik kochung’ motegno, to ok mana jogo ma ne nie kanyakla mar Jo-Galatia kende.

⁵ Waduto wanyalo paro kaka ne wabedo Joneno mag Jehova. En adier ni nitie gik ma notweyowa kaka wasumbini ma ne chuno ni nyaka wawe. Par ane penjo ariyogi: Be inyalo paro okenge ma ne ikawo mondo obatisi? Be inyalo paro kaka ne ipuonjori ming’eyo Nyasaye, kendo kaka ne iwinjo ei chunyi kuom ng’eyo ni Nyasaye ong’eyi?

⁶ Nitie okenge ochiko ma ne wakale kane pok wabedo Joneno.  Okengego ochan e sanduku mawiye wacho ni “Okenge Makonyo Ng’ato Chopo e Batiso Kendo Dhi Nyime Timo Dongruok.” Keto okenge ochikogi e paro kinde ka kinde, biro jiwowa mondo mi kik wadog chien e gik piny ma ne waseweyo. Mana kaka jariemb ndege siko kalo e otas mochanie gik monego onon e ndege kapok ndege owuok, wan bende onego wasik kawanono okenge ochikogo.

⁷ Mana kaka jariemb ndege kalo e otas mondikie gik monego onon kuom ndege kapok ndege owuok, wan bende onego wadhi nyime nono dongruok ma watimo e adiera. Paulo nondiko ne Timotheo kama: “Imak puonj mangima ma niyudo kuoma, mondo iluwe ka in gi yie kod hera ma wan go kuom Kristo Yesu.” (2 Tim. 1:13) ‘Puonj mangimago’ yudore e Wach Nyasaye. (1 Tim. 6:3) Plan mar ot ka ogor e otas, nyalo konyowa ng’eyo kaka odno biro chalo ka osegere. E yo machalo kamano “puonj mangima” bende, konyowa ng’eyo gima Jehova dwaro ni mondo watim. Koro wadwaro nono okenge ma ne wakale kane pok obatiswa kendo nono adimba kabe pod waluwo adiera.

⁸ Okang’ ma ne wakwongo kawo tik tik, ne en puonjruok Muma mondo wabed gi ng’eyo makare. Mano nomiyo wabedo gi yie. Kata kamano, pod dwarore ni wadhi nyime timo dongruok kuom weche ariyogo. (2 Thes. 1:3) Mondo watim dongruok, dwarore watim lokruok kaka ndalo medo dhi nyime. Omiyo bang’ batiso, dwarore ni wadhi nyime timo dongruok to ok chung’ kar tiendwa.

⁹ Wanyalo pimo dongruok ma watimo gi yien mopidh mondo odongi. Yath nyalo dongo mabed mabor miwuoro, to ahinya wuon kapo ni tiendene ogurore kendo oyarore maber e bwo lowo. Kuom ranyisi, moko kuom yiend mierezi mag Lebanon nyalo dongo mabor machop fut 120 (mita 37) kendo tiendegi otegno ahinya, kendo gidonjo matut e lowo. Kendo kore nyalo bedo malach machop fut 40 (mita 12). (Wer 5:15) Sama yien a piny, odongo mapiyo. To kaka tiendene medo sikore e lowo, e kaka kore bende medo yarore kendo obedo mabor. Bang’ kinde, ok bed mayot neno kaka yadhno dongo. Gima kamano bende inyalo  wach kuom dongruok ma Jakristo timo. Sama eka wachako puonjore Muma, wanyalo timo dongruok mapiyo ahinya, ma bang’e batiswa. Jogo manie kanyakla mor ahinya sama gineno dongruok ma watimo. Wanyalo kata mana bedo painia kata yudo migepe mamoko. Kaka higini medo sudo, koro dongruok ma watimo ok nyal nenore e yo mayot. Kata kamano, pod dwarore ni watim dongruok e yie marwa koda e bedo gi ng’eyo makare, machop kama ‘wabedo motegno chutho, ma warom e rapor mogik’ mar Jakristo motegno. (Efe. 4:13) Omiyo, sama watimo dongruok kaka Jokristo, wachalo gi yien matin madongo machop kama obedoe yath mopong’ kendo motegno ahinya.

¹⁰ Dongruok marwa ok onego orem gi kanyo. Onego wang’e Wach Nyasaye e yo malach, kendo tego yiewa. Mano biro miyo wabed gi mise motegno e Wach Nyasaye. (Nge. 12:3) Nitie owete gi nyimine mosetimo kamano. Kuom ranyisi, owadwa moro mosebedo jaduong’-kanyakla kuom higini mokalo 30, nowacho ni en pod odhi nyime timo dongruok e wach Nyasaye. Owacho kama: “Sani eka amedo hero Muma moloyo. Amedo puonjora yore manyien kaka anyalo tiyo gi puonj mag Muma e ng’ado paro, kendo tij lendo medo kelona mor.”

¹¹ Dongruok ma watimo bende oriwo medo sudo machiegni gi Jehova ma en Osiepwa kendo Wuonwa. Odwaro mondo wawinj e chunywa ni oyie kodwa kendo oherowa. En mana kaka nyathi matin jawinjo ni ohere sama janyuolne oting’e, kata kaka wajawinjo sama wan gi osiepwa mwageno. Kaka ing’eyo, bedo gi winjruok machalo kamano gi Jehova, ok en gima biro apoya. Mondo mi wang’e kendo waher Jehova en gima kawo kinde. Omiyo, mondo ing’e Jehova e yo maber, dwarore ni ibed gi thuolo mar somo Muma pile ka pile. Som gasede mag Ohinga mar Jarito kod Amkeni! kaachiel gi bugewa mamoko malero Muma.

¹² Lamo magwa kendo bedo gi osiepe mabeyo, nyalo konyowa jiwo osiep manie kindwa gi Nyasaye. (Som Malaki 3:16.) Sama osiepe Jehova kwaye e lamo, “ite winjo lamogi.” (1 Pet. 3:12) Mana kaka  janyuol mohero nyithinde, Jehova kinde duto chiko ite ne kwayo magwa. Kuom mano, dwarore ni ‘waket’ chunywa kuom “lamo.” (Rumi 12:12) Ok wanyal bedo Jokristo motegno ka ok wayudo kony mawuok kuom Nyasaye. Pek ma waromogo e piny marachni ng’eny maok wanyal loyogi gi tekowa wawegi. Ka ok watimo kinda kendo nano e kwayo Nyasaye e lamo, onyalo weyo maok omedowa teko. Seche ma ilemo, be iwuoyo gi Jehova kaka ng’at mawuoyo gi osiepne mogeno, koso pod dwarore mondo imed timo dongruok e lamo mari?—Yer. 16:19.

¹³ Jehova mor gi “jogo mogene”; omiyo kata mana bang’ ng’eyo Nyasaye, pod wadwaro dhi nyime chokore kanyachiel gi jogo ma bende gin osiepene. (Nah. 1:7) E pinyni mopong’ gi gik manyoso chuny, wanyiso ni wariek kuom bedo machiegni gi owete gi nyiminewa ma jiwowa. Ang’o momiyo ber timo kamano? Kanyakla mar Jokristo e kama ibiro yudoe joma biro jiwi mondo imed bedo gi “hera gi timbe mabeyo.” (Hib. 10:24, 25) Ok yot luwo gima Paulo nowacho kapo ni ok wabedo machiegni gi kanyakla. Nyiso hera machalo kamano dwaro ni watudre gi Jokristo wetewa. Kinde ka kinde non ahinya kabe idhi e chokruoge maok ibari kendo ichiwo paro.

¹⁴ Mondo mi ne wabed Jokristo, nyaka ne walok chunywa gadier kendo weyo gik maricho ma ne watimo chon. Kata kamano, loko chuny en gima onego bed ni dhi nyime kinde duto. To, nikech wan dhano morem, yotnwa ahinya timo richo. Richo chalo gi thuol mosekuodo tege koikore kayo ng’ato. (Rumi 3:9, 10; 6:12-14) Omiyo, ok wanyal wuondore ni waonge gi nyawo moro. Gima morowa en ni, Jehova nano kodwa seche ma wakedo matek mondo walo nyawo ma wan-go, kendo timo lokruok madwarore. (Fili. 2:12; 2 Pet. 3:9) Ti gi thuolo ma in-go koda mwanduni e timo dwaro mar Jehova kar tiyo kodgi e luwo mana dwachi iwuon. Nyaminwa moro nondiko kama: “Ne adongo e ot ma ji ne gin Joneno, kata kamano ok ne an gi paro makare e wi Jehova. Nang’eyo ni en ng’at mamiyo ji luoro ahinya kendo naparo ni onge gimoro amora ma ne anyalo timo ma more.” Ok ne en machiegni gi Nyasaye, kendo mano nomiyo otimo gik maricho e ngimane. Bang’e nowacho kama: “Ok ni ne atimo gik marichogo nikech ok nahero Jehova, to natimogi nikech ne ok ang’eye maber.” Omiyo nokwayo Nyasaye e lamo mondo okonye, kendo nochako timo lokruok moko e ngimane. Omedo wacho kama: “Jehova ne otaya e yo mang’won mana ka nyathi matin, kokonya loyo pek duto ma naromogo kendo konyisa gima ne onego atim.”

¹⁵ Malaika mar Nyasaye nowacho ne Petro gi joote mamoko ni ‘giwach ni ji’ wach maber. Mano ne onyisgi bang’ ka nosegolgi e jela e yor hono. (Tich 5:19-21) Kuom adier tijwa mar lendo mwatimo juma ka juma en achiel kuom gik monego wanon ahinya ka wadwaro bedo gi yie motegno. Yesu gi Jehova neno kaka yie marwa chalo kendo gimor gi tijwa mar lendo. (Fwe. 2:19) Onego wati gi thuolowa mang’eny e tij lendo.

¹⁶ Kinde duto par matut ahinya kuom chiwruok ma ne itimo ne Jehova. Mwandu maduong’ie moloyo e ngimawa, en winjruokwa gi Jehova. Jehova ong’eyo joge  duto. (Som Isaiah 44:5.) Non chal mar winjruokni gi Jehova, kendo kwaye mondo okonyi ijiw winjruokno omed bedo motegno. Wiyi kik wil gi tarik ma ne obatisie. Mani bende biro paroni ni batiso mari en okang’ maduong’ ahinya ma ne ikawo e ngimani.

¹⁷ Kane Paulo ndiko ne Jokristo man Galatia, nojiwogi mondo ginan. (Gal. 6:9) Mano bende e gima dwarore kuom Jokristo ma ndalogi. Ibiro romo gi tembe, kata kamano Jehova biro konyi. Med kwaye mondo omiyi roho mare maler. Obiro miyi mor kod kuwe kata obedo ni chandruogego pod biro dhi nyime. (Math. 7:7-11) Par ane wachni: Ka Jehova nyalo dewo winy, donge mano nyiso ni odewi moloyo, nikech ihere kendo ichiworine? (Math. 10:29-31) Katabed ni iromo gi chandruoge mapek machalo nade, kik chunyi tho ma iwe adiera kidok chien e gik ma ne iseweyo. Wan gi gweth mogundho nikech Jehova ong’eyowa!

¹⁸ Kuom mano, kapo ni nyocha eka obatisi, ang’o ma koro dwarore itim? Dhi nyime ng’eyo Jehova e yo maber, kitimo dongruok e winjruokni kode. To kapo ni ne obatisi chon, ang’o makoro dwarore? In bende onego idhi nyime ng’eyo Jehova e yo matut moloyo kaka ne iseng’eye chon. Kik wapar ni wang’eyo Nyasaye e okang’ moromo, makoro onge okang’ moro amora monego bedni wakawo e jiwo winjruokwa kode. Kinde ka kinde non okenge ochiko ma wawuoyo kuomgi e sulani, mondo okonyi siko machiegni gi Jehova ma en Nyasachwa, Wuonwa, kendo Osiepwa.—Som 2 Jo Korintho 13:5, 6.