Neno ne ng’ato lit tiende en ketori e chal mar ng’at ma nigi chandruok moro kendo temo paro kaka weche dikoro chalo ka di ne bed ni in e ng’atno. Laktar ma nyinge Rick Hanson nowacho ni “neno ne ng’ato lit en kido monyuolwago.”

PAR ANE: Ang’o momiyo dhano kende e ma nigi nyalo mar neno ne jomoko lit sama gichandore? Muma nyisowa ni Nyasaye nochueyo dhano e kite owuon. (Chakruok 1:26) Mano tiende ni wan gi nyalo mar bedo gi kido ma chal gi meke. Omiyo, sama ji neno ne jowetegi lit, giluwo mana ranyisi mar Jehova Nyasaye ma nochueyogi gi kidono.—Ngeche 14:31.

Nyasaye nenonwa lit sama wachandore. Jehova nowinjo nade ka ne Jo-Israel thagore e kinde ma ne gin wasumbni e piny Misri kod ka ne gin e thim kuom higni 40? Muma wacho kama: ‘Weche duto ma nothagogi ne thage.’ (Isaiah 63:9) Ne ni Nyasaye ok nong’eyo ang’eya ni joge ne chandore kae to oweyo gi kanyo. En be nowinjo malit. Nowacho niya: “Adieri aseneno sand mar joga.” (Wuok 3:7) Nowacho bende niya: ‘Ng’ama mulou mulo tong wang’a.’ (Zekaria 2:8) Sama jomoko miyo wachandore, Jehova be chunye chandore.

Nitie seche ma chunywa nyalo nyisowa ni Nyasaye ok oherowa kendo ni ok lichne sama wachandore. Kata kamano, Muma jiwowa kama: “Nyasaye duong’ moloyo chunywa kendo ong’eyo gik moko duto.” (1 Johana 3:19, 20) Nyasaye ong’eyowa maber moloyo kaka wang’ere wawegi. Ong’eyo maber kaka ngimawa chalo, gik ma waparo, kod kaka wawinjo e chunywa. Onenonwa lit sama wachandore.

 Ndiko miyo wabedo gadier ni Nyasaye nenonwa lit sama wachandore

• ‘Iniluong, mi Jehova noduok wach; inigo nduru mi nowach ni, “An ka.”’​—ISAIAH 58:9.

• ‘Ang’eyo weche maparo kuomu, Jehova owacho, aparo mondo kue obedie, to ok masich piny, mondo amiu gima unyalo geno bang’e. Kendo unuluong nyinga, unudhi lama, mi anawinju.’​—YEREMIA 29:11, 12.

• “Kan pi wang’a e chupani; ok gin e kitapi koso?”​—ZABURI 56:8.

Ng’eyo ni Nyasaye nenonwa lit sama wachandore nyalo konyowa. Ne ane gima notimore ne Maria:

Owacho kama: “Wuoda ma jahigni 18 notho bang’ nyagore gi tuo mar kansa kuom higni ariyo. Nawinjo malit ahinya, kendo naneno ni ne ok onego akal e gik matek kamano. Chunya nochido gi Jehova nikech naneno ni nonego ochang wuoda, to ne ok otimo kamano!”

Omedo niya: “Higni auchiel bang’e, osiepna moro ma walemogo e kanyaklawa nofwenyo ni naparo ni Jehova ok ohera. Bang’ chikona ite kuom seche mang’eny, nonyisa ndiko moro e Muma ma nomulo chunya ahinya. Ndikono en 1 Johana 3:19, 20 ma wacho ni: ‘Nyasaye duong’ moloyo chunywa kendo ong’eyo gik moko duto.’ Nolerona ni Jehova ong’eyo maber chandruok duto ma wan-go.”

Odhi nyime wacho kama: “Kata bang’ jiwa kamano, pod ne an gi mirima mang’eny e chunya! Kae to nasomo Zaburi 94:19 ma wacho niya: ‘Kuom weche mang’eny ma aparo e iya, hochni miyo chunya mor.’ Ne awinjo mana ka gima an e ma ne ondikna wechego! Gikone, nachako bedo thuolo wuoyo gi Jehova e lamo ka anyise chandruok ma ne an-go ka an gadier chuth ni owinja kendo ong’eyo maber gik ma chanda.”

Donge ng’eyo ni Nyasaye ong’eyowa maber kendo onenonwa lit sama wachandore en gima morowa! To kare ang’o momiyo chandruok ng’eny e pinyni kama? Koso dibed ni Nyasaye kumowa nikech gik maricho ma watimo? Be Nyasaye biro tieko chandruok? Dhi nyime gi somo mondo iyud dwoko.