Dakika 60 mokwongo bang’ kosenyuol nyathi, gin dakika makende ahinya nikech mano e sama nyathi ng’iyoe maber gi min-gi. Mine ma ng’iyo gi nyithindgi e dakika mokwongogo konyo nyithindgi mondo odong maber. *

Ang’o ma chwaloga mine mondo girit nyithindgi ma e ka ginyuolo e yo maber? E buk miluongo ni The Journal of Perinatal Education, Profesa Jeannette Crenshaw lero ni hormone miluongo ni oxytocin medorega sama onyuol nyathi “to mano miyo dhako medo hero nyathine sama omule, ong’iye, kendo odhodhe.” Nitie hormone machielo ma bende chako tiyo e sechego ma “chwalo miyo mondo sama nyathi otimo gimoro to en bende okawo okang’,” to timo kamano konye mondo omed ng’iyo gi nyathine. Ang’o momiyo ok onego wakaw wachno mayot?

Ng’iyo ma bedo e kind miyo gi nyathine en gima Jehova Nyasaye e ma noketo. * Ruoth Daudi nowacho ni Nyasaye e ma ‘nogole e ich’ kendo kete e lwet min-gi mondo orite maber. Nolamo Nyasaye kowacho kama: “[Ne an] e lweti nyaka a e ich: In Nyasacha nyaka a e i mama.”—Zaburi 22:9, 10.

PAR ANE: Ka koro Nyasaye ne nyalo chueyo ng’ama dhako e yo ma miyo orito nyathine e yo maber kamano kendo otimone gik modwaro, iparo ni onyalo weyo ma ok odewo dhano ma Muma luongo ni “nyithind Nyasaye”?—Tich Joote 17:29.

Yesu Kristo ma e jal mong’eyo Jachuech e yo maber moloyo ng’ato ang’ata nowacho niya: “Donge oyundi ariyo ing’iewo mana gi nengo matin mar pesa ma mingli, koso? To e ma pod onge achiel kuomgi ma nyalo lwar piny ka Wuonu ok ong’eyo. To un, kata mana yie wiu duto osekwan. Omiyo, kik uluor; un nengou duong’ ahinya moloyo oyundi mang’eny.”—Mathayo 10:29-31.

Thothwa ok odichga gi winy matindo tindo ma wanenoga, to be ok wadewga ka moro kuomgi olwar piny. Kata kamano, Wuonwa ma ni e polo neno moro ka moro kuomgi! To e ma onge winyo moro amora mogeno moloyo kaka ogeno dhano kata gibed winy mang’eny ma romo nade. Puonj maduong’ en mae: Kik iluor ni Nyasaye ok neni. Oneni maber kendo oheri malich!

 Ndiko miyo wabedo gadier ni Nyasaye nenowa

• ‘Wang’ Jehova ni kuonde duto; orango pile jo maricho kod jo mabeyo.’—NGECHE 15:3.

• ‘Wang’ Jehova omanyore gi jo matir, kendo ite oyawore ne ywakgi.’—ZABURI 34:15.

• ‘Anamor kendo il ahinya kuom kechni, nimar iseneno sand mara. Iseng’eyo chunya ka an gi chandruok.’—ZABURI 31:7.

Be ng’eyo ni Nyasaye neno gik ma timorenwa kendo oherowa nyalo konyowa e yo moro amora? Ee, en kamano mana kaka Hannah * ma wuok England leronwa:

“Kinde mang’eny ne anenoga ni Jehova ok ohera kendo ni ne ok odwok lamoga. Ne aparo ni mano ne timorena nikech ne aonge gi yie. Ne aneno ni Nyasaye ne kuma kata ok nodwara nikech ne ok okwana ka gimoro e nyime. Ne aneno ni Nyasaye ok dewa.”

Kata kamano, tinde Hannah ni gadier chuth ni Jehova nene kendo ohere. Ang’o ma noloko pache? Owacho niya: “Lokruok notimore mosmos. Aparo twak moro ma nogol ma ne wuoyo kuom misango ma Yesu nochiwo. Twagno nomulo chunya ahinya kendo nokonya bedo gadier ni Jehova ohera. Sa asaya ma Jehova odwoko lamona, abedoga ma mor ma pi wang’a rengni arenga nikech mano medo jiwa ni kare Jehova dewa. E wi mano, puonjruok Muma kendo dhi e chokruoge mag lamo osemiyo apuonjora gik mathoth e wi Jehova, moriwo nyaka kite kod kaka onenowa. Sani koro aneno maler ni Jehova ni kodwa, oherowa waduto, kendo oikore konyowa ng’ato ka ng’ato.”

Weche ma Hannah wachogo jiwowa. Kata kamano, ere kaka inyalo bedo gadier ni Jehova ong’eyi kaachiel gi gik ma timoreni? Sula ma luwo biro chiwo dwoko mar penjono.