Mbulamatadi ya bungi pa buloba bujima mmilombe bantu bua bikale anu ntanta ne bantu bakuabu misangu yonso, ne mmibakandike bua kudisangisha pamue. Bantemu ba Yehowa mbadisuike bua kutumikila malu aa kadi eku batungunuka ne kudisangisha mu mushindu mukuabu. Bua kuenza nanku, bena mu bisumbu badi benzela bisangilu ku biamu bia bantu bamuenangana ku bule ku diambuluisha dia programe bu mudi wa Zoom.

Bua kuenza bisangilu ebi pa tshibidilu, Kasumbu kaludiki nkanyishe bua batule makuta mafila kudi bana betu bua kusumbila bisumbu konte ya Zoom. Bisumbu bivua kabiyi mua kukokesha bua kusumba konte wa nunku, bualu ebu mbubiambuluishe bikole, bualu bua kupeta konte au bidi bilomba ndola mibangile ku 15 too ne ku 20 anyi mipite apu. Bisumbu ebi bivua misangu ya bungi bienza bisangilu ku diambuluisha dia programe itubu kabayi basumba to, kadi mikale itabila anu bantu bakese patupu bua kubuelamu bua kulondesha bisangilu, kabidi kayiyi nansha ne bukubi bua nsongo to. Kadi mpindieu, bisumbu bionso bidi ne konte ya Zoom ya bulongolodi bidi bienza bisangilu bipepele mu bukubi buonso ne bantu ba bungi badi ne mushindu wa kulondela bisangilu bionso mu konte eyi. Lelu eu, kudi bisumbu bipite pa 65 000 bidi ne konte ya Zoom ayi mu matunga mapite pa 170.

Tshisumbu tshia Kairagi ku Manado ku Nord kua Sulawesi, mu Indonésie, tshiakalekela dienzela bisangilu ku programe wa bantu bamonangana mu biamu utubu kabayi basumba to, kutuadijatshi kubienzela mu konte wa Zoom wa bulongolodi buetu. Muanetu Hadi Santoso udi umvuija ne: “Nansha bana betu badi kabayi bibidilangane ne malu a tuamu badi mpindieu mua kulondesha bisangilu bimpe, bualu kabiena bibalomba kabidi bua kubuela mu konte njila ne njila bua kulonda tshisangilu tshimue atshi to.”

Lester Jijón (Jr), mukulu mu tshisumbu tshia Guayacanes Oeste ku Guayaquil (mu ditunga dia Équateur) udi ulonda ne: “Bu mudi bana betu ba bungi ne lutatu lua kupeta makuta, kabivua mua kuikala bipepele bua bisumbu bikuabu kusumbabi konte wa Zoom uvua mua kuitabila bena mu tshisumbu bonso bua kubuelamu bua kulonda bisangilu to. Mpindieu udi bulongolodi buetu butuambuluishe, tudi bapete konte wa Zoom udi witabila bantu ba bungi bua kulondelamu bisangilu tshia pamue. Mbituambuluishe ne bua kubikila bantu bakuabu ba tshianana ba bungi menemene bua kulondabu pabu bisangilu katuyi ne buôwa bua ne: tudi mua kupitshisha pa bungi bukose bua badi babilonda nansha.”

Johnson Mwanza, mukulu mu tshisumbu tshia Ngwerere Nord ku Lusaka, mu Zambie, mmufunde ne: “Bana betu ba bungi mbambe njila ne njila ne: ‘Mushindu udi bulongolodi bulongolole malu bua tuikale tuenzela bisangilu mu Zoom mmutusemeje pabuipi ne bana betu, ne mmutufikishe kabidi ku diumvua dinanga dia mudi Yehowa mutunange ne ututabalela.”

Bulongolodi mbusumbe konte ya Zoom eyi ne makuta avuabu bateke ku luseke bua kuambuluisha nawu badi bipupu bitulukila. Makuta au atu afumina ku mapa a budisuile atu afidibua bua mudimu wa Nzambi wa buloba bujima. Mapa a bungi badi baafidila mu donate.isa4310.com. Tuasakidilayi bua mapa enu anudi nufila ne muoyo mujima adi ambuluisha pawu mu midimu mikuabu ya diambuluishangana pa buloba bujima.​—2 Kolinto 8:14.