Sylvia uvua wenza mudimu muaba udibu balama bakulakaje udi wamba ne: “Mvua nya mu iniversite ne bantu ba bungi bavua badiamba mudibu batendelela, kadi bavua benza malu avua kaayi mimpe to, bavua banua too ne diamba. Tshitendelelu tshiabu katshivua ne buenzeji mu nsombelu wabu to.”

Tatu mukuabu diende Lionel, udi wamba ne: “Bena mudimu nanyi batu bashima bamba ku mudimu ne: badi basama pabu kabayi basama to. Badi mu tshitendelelu kampanda kadi katshiena ne buenzeji kudibu, ne badi batshimona anu bu tshintu tshia kuleja patupu.”

Bitendelelu kabiena bisaka bantu bua kuikala ne bikadilu bilenga mu nsombelu yabu to. Bantu ba bungi lelu badi ne “tshimuenekelu tshia bantu ba Nzambi kadi bienzedi biabu kabiyi bileja bukole buatshi.” (2 Timote 3:5) Bamfumu babu ba bitendelelu kabena bafila bilejilu bimpe, kabena nansha bapesha bena kuitabuja babu mibelu mimpe ya mu Bible idi itangila malu a bikadilu bilenga to. Ke bua tshinyi bantu ba bungi badi bela meji ne: Nzambi kena utangila malu a nsombelu wabu to.

Bible udi uleja ne: Nzambi utu udiumvua mututu petu tudiumvua, ne bikadilu bietu bitu ne mushinga wa bungi kudiye. Pavua bena Isalele ba kale batombokele Nzambi, ‘bakanyingalaja mutshima wende.’ (Musambu 78:40) Kadi, padi muntu mubi ushintuluka ne muoyo mujima mu malu ende mabi, kudi ‘disanka dinene mu diulu.’ (Luka 15:7) Padi muntu wanyisha ngikadilu milenga ya Tatu wetu wa mu diulu, dinanga diende bua Nzambi nedidiunde, ne nedimusake bua kunanga malu adi Nzambi munange ne kukina adiye mukine.​—Amosa 5:15.

Tshibejibeji kampanda tshidi tshiamba ne: “Bantemu ba Yehowa batu bambuluisha bantu bua kuakaja malanda adi mu mêku abu, kuambuluisha bantu bakuabu ne kuikala bantu bimpe ba kueyemena.” Tshibejibeji etshi tshiakamba kabidi ne: “Bantemu batu batumikila mikenji minene ya bikadilu bilenga. Mbamanye ne: kunua makanya, kukuatshika maluvu, kunua diamba, kunaya manaya a makuta, tshiendenda ne diangatangana dia mulume ne mulume anyi mukaji ne mukaji mmalu adi anyanga malanda a muntu ne Nzambi.”​—The Deseret News of Salt Lake City, Utah, U.S.A.

Kulonga bumuntu bua Nzambi nkuambuluishe Bantemu mushindu kayi? Sylvia utuvua bakuile kulu eku udi wamba ne: “Bantu badi bibila bikole mu mudimu wa kulama bakulakaje. Bivua bipepele bua meme panyi kuenza tshivua bakuabu benza. Kadi kumanya mmuenenu wa Yehowa * mu bualu ebu kuvua kungambuluishe bua kuenza tshidi tshimpe. Ndi ne disanka dia bungi ne ditalala dia mu mutshima.” Sylvia mmutuishibue ne: kuenza malu mu diumvuangana ne malongesha a mu tshitendelelu tshiende nkuakaje nsombelu wende.