“Ngakamona diulu dipiadipia ne buloba bupiabupia; bualu diulu dia kale ne buloba bua kale bivua bijimine, ne mbuu katshienaku kabidi to.”​—Buakabuluibua 21:1, Nkudimuinu wa bulongolodi bupiabupia.

 “Pashishe meme kumona diulu dipiadipia ne buloba bupiabupia. Diulu dia kumpala ne buloba bua kumpala bikavua bijimine. Mayi manene kaatshivuaku to.”​—Buakabuluibua 21:1, Mukanda wa Mvidi Mukulu [Mishonyi].

 Mu ngakuilu wa mu tshimfuanyi, mvese eu udi wakula bua Bukalenge bua Nzambi bua mu diulu buapingana pa muaba wa mbulamatadi yonso ya bana ba bantu. Bukalenge abu nebumbushe ndongoluelu mubi eu ne nebukokeshe pa nsangilu mupiamupia wa bantu babukokela ne muoyo mujima.

 Mukanda wa Buakabuluibua mmuleja “mu bimanyinu,” anyi mu bimfuanyi. (Buakabuluibua 1:1) Ke bualu kayi mbia meji bua kuamba ne: diulu ne buloba bidibu batele mu mvese eu ki mbia kuangata mu ngumvuilu wetu muena dîna eu to, kadi mu ngumvuilu wa mu tshimfuanyi. Kabidi, mvese mikuabu ya mu Bible mmitele “diulu dipiadipia,” ne “buloba bupiabupia” mu ngumvuilu wa mu tshimfuanyi. (Yeshaya 65:17; 66:22; 2 Petelo 3:13) Kukonkonona mvese eyi ne mikuabu kudi kutuambuluisha bua kumvua diumvuija diayi bimpe.

 “Diulu dipiadipia.” Kudi misangu idi Bible utela muaku “diulu” bua kuleja bukokeshi anyi mbulamatadi. (Yeshaya 14:12-14; Danyele 4:25, 26) Ke bualu kayi, mukanda mukuabu udi uleja ne: mu bikena kumona bia buprofete, “diulu didi dileja bukokeshi anyi mbulamatadi mu ngumvuilu wa mu tshimfuanyi.” a Mu Buakabuluibua 21:1, “diulu dipiadipia” didi bushuwa dileja Bukalenge bua Nzambi. Kudi misangu idibu babikila mbulamatadi wa mu diulu au ne: “Bukalenge bua mu diulu.” Mbatele Bukalenge abu mu mukanda mujima wa Buakabuluibua ne mu mikanda mikuabu ya mu Bible. (Matayi 4:17; Bienzedi 19:8; 2 Timote 4:18; Buakabuluibua 1:9; 5:10; 11:15; 12:10) Bukalenge bua Nzambi budi Yezu muikale Mukalenge nebupingane ndekelu wa bionso pa muaba wa “diulu dia kale,” mbuena kuamba ne: mbulamatadi yonso mipange bupuangane idi bantu bajadike.​—Danyele 2:44; Luka 1:31-33; Buakabuluibua 19:11-18.

 “Buloba bupiabupia.” Bible udi uleja ne: buloba buetu ebu kabuakubutudibua anyi kabakubupinganyina kudi tshintu tshikuabu to. (Misambu 105:5; Muambi 1:4) Mpindieu buloba bua mu tshimfuanyi ntshinyi? Misangu ya bungi, Bible utu utela muaku “buloba” bua kuleja bukua bantu. (Genese 11:1; 1 Kulondolola 16:31; Misambu 66:4; 96:1) Nunku “buloba bupiabupia” budi ne bua kuleja nsangilu mupiamupia wa bantu badi bakokela mbulamatadi wa Nzambi wa mu diulu ne muoyo mujima. “Buloba bua kale,” anyi nsangilu wa bantu badi baluisha Bukalenge bua Nzambi nebajimine.

 “Mbuu katshienaku kabidi to.” Mu diumvuangana ne miaba mikuabu ya Buakabuluibua 21:1, “mbuu” pende ngua mu tshimfuanyi. Bu mutudi mbuu utamba kusaba bipepele, bidi bileja bukua bantu budi kule ne Nzambi budi mu kayumbayumba kakole. (Yeshaya 17:12, 13; 57:20; Buakabuluibua 17:1, 15) Nebabutudibue pabu. Misambu 37:10 udi wamba ne: “Mu katupa kîpi patupu, bantu babi kabakuikalaku kabidi to; neutangile muaba uvuabu, kabakuikalaku to.”

 Mukanda wa Buakabuluibua udi umanyisha malu adi enzeka mu “dituku dia Mukalenge.” (Buakabuluibua 1:10) Bilondeshile milayi ya buprofete ya mu Bible, dituku adi diakatuadija mu 1914 pakatuadija Yezu kukokesha bu Mukalenge wa Bukalenge bua Nzambi. b Kadi kavua ne bua kuangata malu onso adi atangila buloba diakamue mu bianza to. Milayi mikuabu idi ileja ne: malu a panu avua ne bua kunyanguka bikole mu tshitupa tshia kumpala tshia “dituku dia Mukalenge.” Tshikondo tshia kumpala atshi badi batshibikila ne: “matuku a ku nshikidilu.” (2 Timote 3:1-5, 1; Matayi 24:3, 7; Buakabuluibua 6:1-8; 12:12) Pajika bikondo bibi bia malu makole abi, Bukalenge bua Nzambi nebumbushe diulu dibi ne buloba bubi bia mu tshimfuanyi ne nebufikishe ku ndongoluelu mupiamupia wa ditalala ne bupole. Dîba adi bena dia Bukalenge (“buloba bupiabupia” nebikale ne nsombelu muimpe mutambe ne makanda tumatuma.​—Buakabuluibua 21:3, 4.

 Tangila filme muîpi eu bua kumona kadiosha ka mukanda wa Buakabuluibua.