“Mvua mutete bua kubala Bible, kadi ngakumvua buôwa bua bunene buende!”​—Briana udi ne bidimu 15.

 Utu umvua pebe nanku anyi? Tshiena-bualu etshi tshidi mua kukuambuluisha.

•  Bua tshinyi mbimpe kubala Bible?

•  Mmushindu kayi undi ne bua kubala Bible?

•  Tshidi bansonga nebe bamba

 Lungenyi lua kubala Bible lutuku lukutonda anyi? Biobi nanku, bidi mua kumvuika. Pamuapa buebe wewe, Bible mmukanda udi ne mabeji mapite pa 1 000 ne maleta makese menemene, kayi ne bimfuanyi to​—kena mumue ne filme ne TV bidi bisankisha to.

 Kadi anji elabi meji a bualu ebu: wewe mupete mushete munene wa kale wa biuma, kuakujingaku bua kumanya bidi munda anyi?

 Bible udi anu bu mushete wa bubanji au. Udi ne bubanji bua bungi bua meji buikala mua kukuambuluisha bua

•   Kuangata mapangadika mimpe

•   Kuikala umvuila baledi bebe

•   Kupeta balunda bimpe

•   Kupita ne tunyinganyinga

 Mmushindu kayi udi mukanda wa kale eu mua kuikala ne mibelu idi yambuluisha matuku etu aa? Bualu “Dîyi dionso didi mu Mifundu ndifundisha kudi Nzambi.”​—2 Timote 3:16. Bidi biumvuija ne: mibelu idi mu Bible idi ifuma kudi Muntu muimpe menemene.

 Mushindu wa 1: Bala Bible kubangila ku ntuadijilu too ku ndekelu. Abi nebikupeshe ngumvuilu muimpe wa malu a mu Bible. Kudi mishindu ya bungi ya kubala Bible. Mona bilejilu bibidi ebi:

•    Udi mua kubala mikanda 66 ya mu Bible mu mushindu udiyi milondangane, kumbukila ku Genese too ne ku Bukabuluibua.

•    Udi mua kubala dilondangana dia malu a mu Bible​—mmumue ne: dilondangana dia malu manene avuabu balaye ne muvuawu makumbane.

 Mubelu: Tshisakidila tshia A7 mu Nkudimuinu wa bulongolodi bupiabupia tshidi ne dilondangana dia malu manene a mu nsombelu wa Yezu pa buloba.

 Mushindu 2: Sungula bualu budibu balonde mu Bible budi bupetangana ne lutatu luudi nalu. Tshilejilu:

•   Udi musue kupeta balunda bimpe bakueyemena anyi? Bala bualu bua Yonatana ne Davidi. (1 Samuele, nshapita wa 18-20) Pashishe tangila fishi wa kuelangana meji “Mua kupeta balunda ba lulamatu” bua kupeta malongesha mimpe ku muyuki eu.

•   Udi musue kutantamena mateta bimpe anyi? Bala bualu bua muvua Jozefe mutantamene diteta. (Genese, nshapita wa 39) Pashishe tangila fishi ya kuelangana meji “Mushindu wa kutantamena diteta . . . Yosefe​—Tshitupa tshia 1” ne “Bakamubanda bia dishima! Yozefe​—Tshitupa 2” bua kupeta malongesha mimpe adi atangila bualu ebu.

•   Udi musue kumanya mudi disambila mua kukuambuluisha anyi? Bala bualu buvua bufikile Nehemiya. (Nehemiya, nshapita 2) Pashishe tangila fishi wa kuelangana meji wa “Nzambi wakandamuna disambila diende” bua kupeta malongesha mimpe a bualu abu.

 Mubelu: Paudi ubala Bible, ikala muaba udi kawuyi mitoyi bua umone mua kuteya ntema ku biudi ubala.

 Mushindu 3: Sungula bualu budibu balonde mu Bible anyi musambu, ububale, pashishe keba muudi mua kubutumikila. Wewe mumane kubala, diela nkonko eyi:

•    Bua tshinyi Yehowa wakafundisha bualu ebu mu Bible?

•    Mbikadilu kayi bia Yehowa bidibu buleja? Mmunyi mudibu buleja mushindu utuye wenza malu?

•    Mmunyi mundi mua kutumikila bualu ebu?

 Mubelu: Difundila tshipatshila. Funda dituku diudi musue kutuadija kubala Bible pa kulonda “programe wa dibala dia Bible” udi mu site wetu.