Mputa umvua mutape muntu umvua ngibidijangana nende uvua munene bikole kupita mumvua mutekemene. Mvua mumutute museba ku diulu ku mpukampuka. Ngakanyingalala, meme kutuadija ku diebeja ni mvua mua kutungunuka ne kunaya manaya a miseba. Bua tshinyi tshilema atshi tshiakansaka ku dikala ne dielakana bua dinaya dimvua munange kunaya munkatshi mua bidimu bia bungi? Nganji numvuija tshivua tshinsake bua kuditua mu manaya a miseba.

 Ndi mukolele pabuipi ne tshimenga tshia Buffalo mu New York mu États-Unis. Tuvua ne ditalala mu dîku dietu ne tuvua tutendelela mu Katolike. Mvua mulongele mu tulasa tua bena Katolike ne mvua muitabi. Baledi banyi bavua basue bua meme ne yayanyi tutute diakalenga mu nsombelu wetu. Nunku bavua bajinga bua ngikale nnaya manaya panyima pa kalasa anyi ngenza mudimu wa mêba makese, anu pangikala nkuata mu kalasa. Biakansaka bua kuikala ne didikanda ne buana buonso.

 Pamvua ne bidimu 17, ngakatuadija kulonga mua kunaya manaya a miseba. Mukantshi mua bidimu bia bungi, mvua ndibidija mêba asatu ku dituku, matuku asambombo ku lumingu. Lumginu luonso mvua ngenza kabidi mêba a bungi ngambulula anu mishindu ya mua kuepela miseba ne ntangila filme bua kumona mua ku diakaja mu miaba kampanda. Mvua munange kudibidija mudisuike tshilamba ku mêsu, nansha pamvua ndonga mua kuluangana ne bia mvita. Mvua mua kusunsula mabaya anyi madioto anu ne mbata umuepele. Mvua mpatuka anu wa kumpala ne bavua bampesha makopo a butshimunyi mu manaya a ditembangana. Wanyi nsombelu uvua anu wa manaya a miseba.

 Mvua ngela meji ne: mvua mutute diakalenga mu nsombelu wanyi. Mvua mukuate dipoloma dia lumu ku iniversite. Mvua enjeniere wa malu a biamu bia ordinatere mu kumpanyi munene kampanda. Bavua bampesha bintu bikuabu bia bungi mu kumpanyi au. Mvua kabidi ne nzubu, ne nsongakaji kampanda umvua mpatuka nende. Mvua mmueneka muikale ne nsombelu muimpe menemene, kadi tshivua ne disanka to, bualu mvua ndiela nkonko ya mushinga imvua tshiyi mumanye mandamuna to.

 Bua kupeta mandamuna a nkonko yanyi, ngakatuadija kuya mu tshitanda misangu ibidi ku lumingu ne mvua nsambila Nzambi bua angambuluishe. Pashishe dimue dituku, malu angakayukila ne mulunda wanyi kampanda akashintulula nsombelu wanyi. Ngakamuela lukonko elu: “Ukadi mudiebeje bua kumanya tshidibu batufukile anyi? Bualu kudi ntatu ya bungi ne kansungansunga ka bungi.” Wakangambila ne: uvua mudiele pende nkonko ya muomumue ne uvua mupete mandamuna mimpe menemene mu Bible. Ke yeye kumpesha mukanda uvua ne tshiena-bualu tshia ne: Udi mua kuikala ne muoyo wa kashidi pa buloba bukudimuna mparadizu. a Kungumvuijaye ne: ukavua ulonga Bible ne Bantemu ba Yehowa. Ngakanji kuelakana bua kuangata mukanda au bualu mvua ndiambila ne: ki mbimpe mbale mukanda wa mu tshitendelelu tshikuabu pa kumbusha tshietu to. Kadi dijinga dianyi dia kumanya mandamuna a nkonko yanyi diakansaka bua kumona bikala malu avua Bantemu balongesha avua umvuika.

 Ngakakema bikole bua kumanya malu avua Bible ulongesha menemene. Ngakalonga ne: Nzambi uvua mulongolole bua bantu basombe mu Mparadizu pa buloba bua kashidi, kabidi ne: tshivuaye mulongolole atshi katshivua tshishintuluke to. (Genese 1:28) Biakankemesha kabidi bikole bua kumona dîna dia Nzambi Yehowa mu Bible umvua nende wa King James, ne kumanya ne: mvua nsambila bua dîna adi pamvua ngambulula disambila dia Tatu wetu. (Misambu 83:18; Matayi 6:9) Meme kushisha kumanya kabidi bua tshinyi Nzambi mmulekele makenga bua tshitupa tshîpi. Malu onso amvua ndonga au avua umvuika bimpe be! Mvua ne disanka dia katshia.

 Tshiena mua kupua muoyo mushindu umvua mumvue pangakatuadija kubuela mu bisangilu bia Bantemu ba Yehowa bua musangu wa kumpala to. Bantu bonso bavua bantabalela, bajinga kumanya dîna dianyi. Mu tshisangilu tshia kumpala tshingakabuela, bakela muyuki wa patoke uvua wakula bua masambila atu Nzambi utuleja. Tshiena-bualu atshi tshiakansankisha bikole bualu mvua musambile bua Nzambi angambuluishe. Musangu wakalonda, ngakabuela mu Tshivulukilu tshia lufu lua Yezu. Mu bisangilu bionso abi, biakankemesha bikole bua kumona too ne muvua bana benda balondesha mvese ivuabu babala mu Bible yabu. Kumpala tshivua mumanye mua kupeta mvese to, kadi Bantemu bakangambuluisha bikole ne kundongeshabu mua kuikala kupeta mvese mu Bible.

 Bu mumvua ntungunuka ne kubuela mu bisangilu, ngakatuadija kuanyisha ndongeshilu mutambe buimpe uvua nende Bantemu bikole. Mu tshisangilu tshionso mvua ndonga malu a bungi, misangu yonso mvua ndiumvua mukankamijibue ne mukoleshibue. Pashishe bakandomba bua kulonga Bible.

 Malu angakamona kudi Bantemu ba Yehowa avua mashilangane bikole ne amvua mmona mu tshitendelelu tshietu. Ngakamona ne: Bantemu bavua mu buobumue ne bavua bantu bimpe bavua badienzeja ne muabu muonso bua kusankisha Nzambi. Biakanjadikila ne: bavua ne tshimanyinu tshia bena Kristo balelela, mmumue ne: dinanga munkatshi muabu.​—Yone 13:35.

 Pamvua ngenda ndonga Bible, mvua ngenda ngenza mashintuluka bua kutumikila mikenji ya mu Bible. Kadi ngakamona ne: tshivua mua kukokesha bua kulekela manaya a miseba to, bualu mvua munange kudibidija, mvua munange kabidi manaya a ditembangana. Pangakaleja Ntemu uvua undongesha Bible, wakanjadikila ne: “Tungunuka anu ne kulonga Bible, ndi mumanye ne: newangate dipangadika dimpe.” Bivua binsankishe bikole pangakumvua bualu abu. Bu mumvua ntungunuka ne kulonga, mvua musue kabidi kusankisha Yehowa Nzambi.

 Bualu bunkadi mulonde ku ntuadijilu bua mputa umvua mutape utuvua tudibidija nende buakangeleshisha meji bikole. Njiwu ayi yakamfikisha ku didiebeja bikole ni mvua mua kuikala muyidi wa Kristo wa ditalala, meme mutungunuke ne kunaya manaya a miseba. Nkavua mulonge tshivua Yeshaya 2:3, 4 mumanyishe tshia ne: bantu badi batumikila malu a Yehowa kabena ne bua ‘kulonga kabidi mvita nansha.’ Bualu bukuabu, Yezu wakalongesha bayidi bende ne: kabena ne bua kuenza malu ne tshikisu nansha padibu babenzela bibi. (Matayi 26:52) Ke bualu kayi ngakalekela dinaya dimvua munange bikole adi.

 Pashishe, ngakalonda mubelu wa mu Bible wa ne: “Dibidija ne tshipatshila tshia kulamata Nzambi.” (1 Timote 4:7) Dîba ne didienzeja dionso bimvua mupitshishe mu dinaya manaya a miseba, ndi mbipitshisha mpindieu mu malu a mu nyuma. Nsongakaji umvua mpatuka nende au kavua muitabe malu a mu Bible amvua ndonga to, ke tuetu kulekelangana nende. Mu dia 24/1/1987, ngakabatijibua meme kulua Ntemu wa Yehowa. Matuku makese pashishe, ngakatuadija mudimu wa ku dîba ne ku dîba mfila dîba dianyi bua kulongesha bakuabu Bible. Too ne mpindieu ntshidi anu mu mudimu wa ku dîba ne ku dîba. Tshikondo kampanda ngakenza mudimu mu biro binene bia Bantemu ba Yehowa bia buloba bujima mu New York mu États-Unis.

 Mpindieu unkadi mumanye bulelela pa bidi bitangila Nzambi, ndi mupete tshimvua mupangile mu nsombelu wanyi. Tshitshiena ndiumvua kabidi ne: ndi mupangile tshintu kampanda to. Ndi mupete nsombelu wa nsongo ne ditekemena dilelela bua matuku atshilualua, ne ndi ne disanka dia dikema. Ntu anu ngibidija mubidi pa tshibidilu, kadi dibidija dia mubidi edi kaditshiena kabidi ne mushinga wa bungi menemene kundi to. Kuenzela Yehowa Nzambi mudimu ke kudi ne mushinga wa bungi menemene mu nsombelu wanyi.

 Pamvua nnaya manaya a miseba, mvua anu mudiakaje misangu yonso bua muntu yeye mumbunde ngikale mumanye tshia kuenza. Too ne lelu eu ndi anu mudiakaje, kadi bua bualu bukuabu, mmumue ne: kuambuluisha bantu. Bible mmungambuluishe bua kuikala muena tshipapayi ne ndi mulume muimpe kudi Brenda mukajanyi muimpe kumona.

 Wanyi nsombelu uvua anu wa manaya a miseba. Kadi ndi mupingaje tshintu tshimpe menemene pa muaba wa manaya au. Bible udi wamba ne: “Dibidija dia mubidi didi ne mushinga bua malu makese, kadi dilamata Nzambi didi ne mushinga bua malu onso, bualu didi ne mulayi wa muoyo wa mpindieu ne muoyo utshilualua.”​—1 Timote 4:8.