Yehova witulomba ‘tusanswe lulamato.’ (Mika 6:8) Lulamato i lwa mvubu mpata mu busongi bwenu, mwanda shi keludi’mopo, ne kwikulupila kwine i kutupu’ko. Kadi kwikulupila nako ko kwine kuloejanga buswe.

Dyalelo, lulamato mu busongi ludi mu bulwi. Kulama busongi bwenu i banwe kusumininwa kulonga bino bintu bibidi.

BINENA BIBLE: Jingululai “bintu bya mvubu mikatampe.” (Fidipai 1:10) Busongi bwenu i kimo kya mu bintu bya mvubu kutabuka mu būmi bwenu. Bufwaninwe kutūlwa pa kifuko kibajinji.

Yehova usaka ute bininge mwinē pobe mutyima ne ‘kwikala na nsangaji’ pamo. (Musapudi 9:9) Ulombwele patōka amba kufwaninwepo kusūla mwinē pobe, ino mufwaninwe kukimba miswelo ya kwisangaja banwe bonso. (1 Kodinda 10:24) Longa mwinē pobe emone bu i wa mvubu kadi mulēme kodi.

BYOMUKOKEJA KULONGA:

• Shikatyilai kyaba ne kyaba pamo na mwinē pobe, umukengelela na mutyima umo

• Langila “batwe” pa kyaba kya “ami’wa”

BINENA BIBLE: “Ense utala mwana-mukaji sō enka ne byamwivwanina kilokoloko wapu kala kulonga nandi makoji mu mutyima wandi.” (Mateo 5:28) Shi muntu ulanga’nka bintu bya busekese, mu buluji kampanda, mutyima wandi keukidipo kudi mwinē pandi.

Yehova unena’mba “lama obe mutyima.” (Nkindi 4:23; Yelemia 17:9) Ko kunena amba ufwaninwe kulama meso obe. (Mateo 5:29, 30) Londa kimfwa kya mukulutuba Yoba, wāsambile kipwano na meso andi kya kwijiba kutala mwana-mukaji ungi na kilokoloko. (Yoba 31:1) Wijibe kutala bifwatulo bya bantu badi mutaka. Pela kisense kya kwiselembeja na muntu ke mwinē pobepo.

BYOMUKOKEJA KULONGA:

• Lombola patōkelela ku bantu amba ulamete’nka mwinē pobe

• Langa mwiivwanina mwinē pobe, kadi tyiba ponka na ponka kisense kibwanya kulengeja mwinē pobe kukulangila bibi