Monka mowafundila mu uno boloshile, Bible udi na misoñanya mivule ya kwimukwasha, abe ne kyenu kisaka. Yehova wimusakilanga mwikale na nsangaji. Ulaile amba shi mutūle butōtyi bwandi pa kifuko kibajinji, “bintu bikwabo byonso bikemutentekelwa’ko.” (Mateo 6:33) Ukusakilanga binebine wikale mulunda nandi. Kwatakanya mikenga yonso ya kuloeja bulunda bobe na Leza. Kino i kyepelo kikatampe mpata kipelwe muntu.—Mateo 22:37, 38.

BINENA BIBLE: “‘Nkekalanga shenu, nenu mukekalanga bami bana, bana-balume ne bana-bakaji,’ e mwanenena Yehova.” (2 Kodinda 6:18) Leza usakanga wikale mulunda nandi mpata. Milombelo i muswelo umo wa kufikidija kino. Yehova wimuzezanga amba “lombelai kitatyi kyonso.” (1 Tesalonika 5:17) Utengele kwivwana milangwe yobe ne kuyumbayumba kobe kwa mutyima. (Fidipai 4:6) Polombela na ba mu kyenu kisaka, nabo basa kumona amba Leza udi’ko binebine kodi.

Kutentekela pa kwisamba na Leza, bikusakila kumwivwana. Ukokeja kumwivwana na kwifunda Kinenwa kyandi ne mabuku emanine pa Bible. (Ñimbo 1:1, 2) Ulanguluka pa byowifunda. (Ñimbo 77:11, 12) Kwivwana Leza kulomba ne kutanwa kitatyi ne kitatyi ku kupwila kwa bwine Kidishitu.— Ñimbo 122:1-4.

Kusapwila bakwabo myanda ya Yehova i muswelo mukwabo wa mvubu wa kuningija kipwano kyobe nandi. Shi wendelela kulonga namino, usa kwiivwana amba kodi pabwipi nandi bininge.—Mateo 28:19, 20.

BYOMUKOKEJA KULONGA:

• Witūdila’ko difuku ne difuku kitatyi kya kutanga Bible ne kulombela

• Kisaka kituntulu, tūlai mingilo ya ku mushipiditu kumeso kwa mazua ne kwipwija mukose

BINENA BIBLE: “Fwenai kudi Leza, nandi ukemufwena.” (Yakoba 4:8) Bikusakila kutūla’ko mpangiko ya butōtyi bwa kisaka ne kulēmeka’yo nyeke. (Ngalwilo 18:19) Ino bilomba bivule. Leza ufwaninwe kwikala na kifuko mu bwenu būmi bwa difuku ne difuku. Ningija kipwano kya kisaka kyenu na Leza na kwisambila padi aye “pa kushikata mobe mu njibo, kadi poenda mwishinda, ne polāla, ne pobūka pene.” (Kupituluka 6:6, 7) Witūdile’kyo bu kyobe kitungo kwikala pamo bwa Yoshua, wānene amba: “Amiwa nanshi ne njibo yami mine, tukamwingidilanga Yehova.”—Yoshua 24:15.

BYOMUKOKEJA KULONGA:

• Ikala na mpangiko keishinta ya kwifunda idi’mo ne bisakibwa bya umo ne umo wa mu kyenu kisaka