Ki Mañi Yalutahiseza Manyando?
Haiba Mulimu haki yena yatahisa manyando, ki mañi yatahisa lukupwe, bubotana bobutuna, lindwa, matuku, ni likozi za ka taho? Linzwi la Mulimu, yona Bibele, lilutaluseza lika zetaalu zetahiseza batu manyando:
Buitati, Mukwañuli, ni Sitoyo. ‘Mutu ubile ni maata a kuhatelela yomuñwi.’ (Muekelesia 8:9) Hañata batu banyanda bakeñisa kuezwa maswe ki batu babasika petahala, babanani buitati, kamba situhu.
Nako ni Likezahalo Zesika Libelelwa. Hanata batu banyanda bakeñisa “nako ni likezahalo zesika libelelwa zabatahelanga kaufelaa bona.” (Muekelesia 9:11) Taba yeo italusa kuli batu bakona kutahelwa ki kozi haiba baipumana mwa sibaka sesiñwi ka nako yesaswaneli, haiba baeza lika ka kusatokomela kamba haiba baeza mafosisa.
Mubusi wa Lifasi Yamaswe. Bibele italusa hande libaka lelituna lelitahisa kuli batu banyande. Ibulela kuli: “Lifasi kaufela li mwa maata a yamaswe.” (1 Joani 5:19) “Yamaswe” yo ki Satani Diabulosi, ili sibupiwa sa moya sesimaata yanaabanga lingeloi la Mulimu kono “naasika tiiseza mwa niti.” (Joani 8:44) Libupiwa za moya zeñwi neliswalisani ni Satani kukwenuhela Mulimu kuli baeze lika za buitati zene batabela, mi ka kueza cwalo zaba badimona. (Genese 6:1-5) Kuzwa ka nako yene bakwenuhezi Mulimu, Satani ni badimona bahae balikile ka taata kutahisa kuli miinelo ibe yetaata fa lifasi. Mi baezize cwalo sihulu mwa linako zaluna. Ka nako ya cwale, Diabulosi uhalifile hahulu mi ‘ukelusa lifasi kaufela’, ili nto yetahisa ‘bumai mwa lifasi.’ (Sinulo 12:9, 12) Ka niti, Satani ki muhateleli ya situhu. Uba ni tabo batu habanyanda. Kacwalo, Satani ki yena yatahiseza batu manyando, isiñi Mulimu.
MUNAHANE TABA YE: Mutu ya situhu yali muezalibi ki yena feela yakona kunyandisa batu babasina mulatu. Kono Bibele ibulela kuli: “Mulimu ki lilato.” (1 Joani 4:8) Bakeñisa kuli Mulimu unani lilato “hakukonahali kuli Mulimu wa niti aeze bumaswe, kuli Yamaata Kaufela afose!”—Jobo 34:10.
Kono mwendi mukana mwaipuza kuli, ‘Mulimu Yamaata Kaufela ukanga nako yekuma kai inzaa tuhelela mubusi yamaswe, yena Satani kubusa lifasi?’ Sina moluitutezi, Mulimu utoile bumaswe mi halunyanda uutwanga hahulu butuku kwa pilu. Hape Linzwi lahae lilususueza kuli: ‘Munepele lipilaelo zamina kaufela ku yena, kakuli wamiisa pilu.’ (1 Pitrosi 5:7) Sina moiboniseza taba yetatama, Mulimu walulata mi unani maata akufelisa manyando kaufela ni kusaluka. *
^ para. 7 Kuli mufumane litaba zeñata zebonisa libaka hakunani manyando amañata, mubone tuto 26 ya buka ya Muikole Bupilo Kuya Kuile! yehatisizwe ki Lipaki za Jehova mi hape mwakona kuikungela yona fa www.isa4310.com/loz kusina kulifa sesiñwi.
Hape Mwendi Mwakona Kutabela Litaba Ze
TAWALA YA MULIBELELI
Mulimu Atuha Afelisa Manyando Kaufela
Lukona kuziba cwañi kuli Mulimu atuha aanga muhato wa kufelisa manyando kaufela ni kusaluka?
LIKALABO KWA LIPUZO ZA BIBELE
Kana Diabulosi Uteñi Luli?
Kana Diabulosi ki nto feela ya mwa pilu yelususueza kueza zemaswe kamba uteñi luli?
