Kuba ni mukekecima kutalusa “kuba ni buikoneli bwa kuikutwa mwaikutwela mutu yomuñwi kamba kunahanisisa molukona kuikutwela hane lukaba mwa muinelo wa mutu yo.” Mualafi yomuñwi yali caziba wa matuku a mwa munahano, yabizwa Rick Hanson ubulela kuli, “mukekecima ki kalemeno kelupepilwe ni kona.”

MUNAHANE TABA YE: Ki kabakalañi luna batu halunani buikoneli bwa kubonisa mukekecima ili kalemeno kakasa fumanehi kwa libupiwa zeñwi? Bibele italusa kuli Mulimu ubupile batu ka siswaniso sahae. (Genese 1:26) Bakeñisa kuli lubupilwe ka siswaniso sa Mulimu, lwakona kumulikanyisa ni kubonisa tulemeno twahae totunde. Kacwalo, batu babanani mukekecima habatusa babañwi, babonisa mukekecima wa Mubupi wabona yalilato, yena Jehova Mulimu.—Liproverbia 14:31.

Mulimu ulubonisa mukekecima mi utoile kulubona inze lunyanda. Bibele ibulela cwana ka za Maisilaele bane baitiisize ka nako yene bali mwa butanga mwa Egepita ni ka nako yene bali mwa musipili otaata wa mwa lihalaupa ka lilimo ze 40 kuli: “Mwa manyando abona kaufela, naanyanda hamoho ni bona.” (Isaya 63:9) Mulemuhe kuli Mulimu naasika ziba feela manyando abona kaufela, kono hape naautwa butuku bone bautwa. Naabulezi kuli: “Niziba hande manyando abona.” (Exoda 3:7) Mulimu hape naabulezi kuli: “Mutu kaufela yamiswala uswala taku ya liito laka.” (Zakaria 2:8) Batu babañwi habaluutwisa butuku, ni yena wautwa butuku.

Lipilu zaluna niha likona kulunyaza kamba kuikutwa kuli Mulimu haswaneli kulubonisa mukekecima, Bibele ilukolwisa kuli “Mulimu ki yomutuna kufita lipilu zaluna mi uziba lika kaufela.” (1 Joani 3:19, 20) Mulimu uluziba hande kufita moluizibela. Waziba hande miinelo yaluna, mihupulo yaluna, ni maikuto aluna. Ulubonisanga mukekecima.

Mañolo alukolwisa kuli

• “Hauka biza, Jehova ukaalaba; ukakupa tuso, mi yena ukali: ‘Ki na yo!’”—ISAYA 58:9.

• “‘Kakuli niziba hande mihupulo yeni minahanela,’ kubulela Jehova, ‘ili mihupulo ya kozo, isiñi ya kozi, kuli nimife bupilo bobunde kwapili, ni sepo. Mi muka nibiza ni kutaha kuto lapela ku na, mi nika miteeleza.’”—JEREMIA 29:11, 12.

• “Ubeye miyoko yaka mwa mukotana wahao wa litalo. Kikuli haisika ñolwa mwa buka yahao nji?”—SAMU 56:8.

Kana kuziba kuli Jehova ulubonisa mukekecima kwakona kulutusa kutiyela miinelo yetaata? Munyakisise zene ezahezi mwa bupilo bwa bo Maria, babatalusa kuli:

“Hamulaho wa kushwelwa ki mwanaaka wa mushimani wa lilimo ze 18 yanaakulile butuku bwa kansa ka lilimo zepeli, neniutwile hahulu butuku kwa pilu mi neniikutwa kuli bupilo nebulitaata mi nebusiyo hande. Neninyemezi Jehova bakeñisa kuli naasika tusa mwanaaka ni kumufolisa!

“Hamulaho wa lilimo ze 6 kuzwa fo, mulikanaaka yanani lilato ni mukekecima wa mwa puteho naaniteelelize hane nimutaluselize maikuto aka a kuli Jehova naasa nilati. Hamulaho wa kuniteeleza ka nako yetelele kusina kunikauleza, naabulezi manzwi a mwa timana yeñwi ananisusuelize. Neli manzwi a kwa 1 Joani 3:19, 20, ali: ‘Mulimu ki yomutuna kufita lipilu zaluna mi uziba lika kaufela.’ Naatalusize kuli Jehova wautwisisa manyando alukopana ni ona.

“Kono manzwi ao naasika felisa bunyemi bone ninani bona! Mi hamulaho nabala liñolo la Samu 94:19, lelibulela kuli: ‘Hane niimezwi ki lipilaelo, neu niomba-ombile ni kunikatulusa.’ Neniikutwile inge kuli litimana zeo neliñolezwi feela na! Hamulaho wa nako, neniikutwile kulukuluha kutaluseza Jehova ka za manyando aka, inze niziba kuli waniteeleza ni kuniutwisisa.”

Kuziba kuli Mulimu waluutwisisa ni kuluutwela butuku kwa luomba-omba luli! Kono cwale ki kabakalañi hakunani manyando amañata? Kana ki ka libaka la kuli Mulimu ulufa koto bakeñisa lika zemaswe zeluezize? Kana Mulimu ukafelisa manyando a kaufela? Lipuzo ze lika nyakisiswa mwa taba yetatama.