Musali yabizwa Marta, Paki ya Jehova yapila kwa Guatemala, usweli kuituta puo ya Sikekchi kuli akutaze lushango lwa mwa Bibele kwa batu bababulela puo yeo. Zazi leliñwi, naaboni muuna yomuñwi yanaazwa kwa sipatela. Kaizeli yo hanaaboni ponahalo yahae, alemuha kuli mwendi naazwa mwa munzi wa Kekchi ofumaneha mwa sibaka sa malundu, ili sene basakutalezangi hahulu Lipaki za Jehova. Amuatumela ni kuambola ni yena ka kuitusisa manzwi asikai anaaziba a Sikekchi.

 Bo Marta babuza muuna yo haiba naatabela kuituta Bibele. Muuna yo alumela kuituta Bibele kono atalusa kuli naasina masheleñi a kulifa. Bo Marta bamutaluseza kuli Lipaki za Jehova baitutanga Bibele ni batu kusina kulifa sesiñwi. Hape bamutaluseza kuli bakona kuitutanga fa foni, mi lubasi lwabona ni lona lwakona kubanga teñi ka nako ya tuto. Muuna yo alumela. Bakeñisa kuli muuna yo naakona kubulela ni kubala puo ya Sisipanishi, bo Marta bamufa Bibele ya Toloko ya Lifasi Lelinca mwa puo ya Sisipanishi. Hape bamufa buka ya Bibele I Lutañi Luli?, yeñwi ya lihatiso zeluitusisanga kwa kuluta batu. Sunda yenetatami, bo Marta bakala kuituta Bibele ni yena, musalaa hae, hamohocwalo ni bana bahae bababeli fa foni. Nebaitutanga habeli ka sunda. Bo Marta batalusa kuli: “Bakeñisa kuli nenisa zibi hande kubulela puo ya Sikekchi, neluitutanga mwa Sisipanishi, mi muuna yo naatolokelanga musalaa hae litaba zene luituta. Kono bana babona nebaziba Sisipanishi.”

 Muuna yo neli pasita kwa keleke yahae. Mi akala kuluta batu bane batahanga kwa keleke yahae litaba zanaasweli kuituta mwa tuto yahae ya Bibele. Batu bao batabela hahulu litaba zanaa baluta mi nebabata kuziba kwanaaitutile lituto zenca zeo. Hanaa bataluselize kuli naakalile kuituta Bibele, ni bona bakala kufumanehanga kwa tuto yahae ya Bibele, alimuñwi ka alimuñwi. Mi hamulaho wa nakonyana, batu ba 15 bakala kufumanehanga kwa tuto ya fa foni ya muuna yo ni bo Marta sunda ni sunda. Hamulaho wa nako, bakala kubeyanga maikrofoni kwatuko ni foni kuli batu kaufela bautwe hande litaba zene baituta.

 Bo Marta hane bazibisize baana-bahulu ba mwa puteho yabona za tuto yabona ya Bibele yeo, yomuñwi ku bona aya kwa munzi kone bapila baituti bao. Muuna-muhulu yo abamema kwa ngambolo ya muokameli wa mupotoloho a yeneka felwa mwa munzi omuñwi wa kwahule, mi musipili wa kuya kwateñi neuunga hora iliñwi ka mota, mi hasamulaho kona kuzamaya lihora zepeli ka mahutu kuli bayo fita kwateñi. Baituti bao balumela, mi ba 17 bafumaneha kwa ngambolo yeo.

 Hamulaho wa lisunda lisikai kuzwa fo, muokameli wa mupotoloho ni mizwale ni likaizeli babañwi baya kwa munzi wo, mi batanda mazazi amane ni baituti ba Bibele bao. Kakusasana, nebabuhanga mavidio atomile fa Bibele a fa webusaiti ya jw.org mwa puo ya Sikekchi, mi nebaitutanga mwa broshuwa ya Ki bo Mañi Babaeza Tato ya Jehova Kacenu? Musihali, nebabuhanga mavidio afumaneha fa JW Broadcasting. Muokameli wa mupotoloho hape naalukisize kuli muituti ni muituti wa Bibele abe ni muhasanyi yakaituta ni yena.

 Mwa mazazi amane ao, Lipaki za Jehova bao nebakutalize mwa minzi yemiñwi yeneli bukaufi ni munzi wa Kekchi, mi bamemela batu kwa mukopano oipitezi. Fa mukopano wo, nekufumanehile batu ba 47, mi mizwale babakupa haiba nebatabela kuituta Bibele. Mabasi a 11 alumela kuituta Bibele.

 Likwelinyana kuzwa fo, baana-bahulu balukisa kuli sunda ni sunda kubange ni mukopano wa puteho mwa munzi wo. Kacenu, batu bababato eza 40 bafumanehanga kwa mikopano kamita. Mi mizwale hane balukisize kuezeza Kupuzo ya Lifu la Jesu mwa munzi wo, nebatabile hahulu kuli nekufumanehile batu ba 91.

 Bo Marta habahupula mone kutezi kuli batu mwa munzi wo bakale kuituta Bibele, batalusa kuli: “Niitumela hahulu ku Jehova. Fokuñwi, niikutwanga kuli hanikoni kueza zeñata. Kono Jehova wakona kuitusisa luna kuli lutuse babañwi. Naaziba zeneli mwa lipilu za batu ba mwa munzi wo, mi abatusa kuswalisana ni batu bahae. Jehova wabalata luli.”