Zazi leliñwi, basali ba libizo la Eliso, babali Lipaki za Jehova nebasweli kuituta Bibele ni musali yomuñwi yanaabonisa kutabela. Hane banze baituta cwalo, musali yo ato potelwa ki batu banaasika libelela. Baenyi bao neli yomuhulu wa bulapeli ni musalaa hae. Bo Eliso nebautwile kuli bo mutu ni musalaa hae bao kihona hane basazo shwelwa ki mwanaa bona wamushimani alimuñwi yene banani yena.

 Bo Eliso hane babataluselize kuli nebaikutwile hahulu bumaswe kuutwa za lifu la mwanaa bona, yomuhulu wa bulapeli yo ni musalaa hae bakala kusituwa sililo. Mi ka bunyemi, yomuhulu wa bulapeli yo abulela kuli: “Napalelwa kuutwisisa libaka Mulimu hatuhelezi muliko wo kuezahala! Ukona kuunga cwañi mwanaka wamushimani anosi yene ninani yena? Seni musebelelize ka lilimo ze 28 inze nieza lika zende, mi kana wo ki ona mupuzo wanifile? Ki kabakalañi Mulimu habulaile mwanaka?”

 Bo Eliso bataluseza bo mutu ni musalaa hae bao kuli Mulimu naasika nga mwanaa bona. Hape banyakisisa litaba zeñwi ka za tiululo, zuho ya bafu, ni libaka Mulimu hatuhelelanga lika zemaswe kuezahala. Yomuhulu wa bulapeli yo ni musalaa hae bataluseza bo Eliso kuli nebalapezi kuli batusiwe kufumana likalabo kwa lipuzo zabona, mi bo Eliso neba batusize luli.

 Sunda yenetatami, bo mutu ni musalaa hae bao bataha hape, mi bato fumaneha kwa tuto ya Bibele yene bazamaisa bo Eliso ku musali yanaatabela yo. Bo Eliso ni basali bao nebasweli kunyakisisa kauhanyo yeli, “Sepo ya Luli ka za Balatiwa ba Mina Ba Ba Shwile,” mwa buka ya Bibele I Lutañi Luli? Ka nako ya puisano yeo, bo mutu ni musalaa hae bao ni bona nebanze baalaba.

 Hamulaho wa nako, sibeli sabona bayo fumaneha kwa mukopano oipitezi wa Lipaki za Jehova one uezelizwe mwa muleneñi wa Tbilisi, kwa Georgia, mi nebatabisizwe hahulu ki lilato ni swalisano yene baiponezi kwateñi. Ka nako yetelele, nebanze basusueza batu mwa bulapeli bwabona kuli babonise tulemeno to kono nekupalile.