Ka kuba Lipaki za Jehova, lutabela kuikambota litaba za bulapeli ni batu babali mwa bulapeli bobushutana-shutana, kono haluswalisanangi ni bulapeli busili kulapela Mulimu. Bibele ibonisa kuli Bakreste ba niti baswanela kuba ‘babakopanyizwe hamoho,’ mi nto yeñwi yetuna yebakopanya hamoho ki litaba zebalumela. (Maefese 4:16; 1 Makorinte 1:10; Mafilipi 2:2) Mi taba yeo haitalusi feela kulumela kuli kubonisa lilato, kubonisa mukekecima, ni kuswalela babañwi ki kwa butokwa hahulu. Litaba zelulumela litomile fa niti yenepahezi ya mwa Bibele, hakusicwalo, tumelo yaluna neikaba ya mbango.​—Maroma 10:2, 3.

 Bibele ibapanya taba ya kuswalisana hamoho kulapela Mulimu ni batu ba bulapeli busili kwa kulwala coko yesalikaneleli, ili nto yekona kufokolisa tumelo ya Mukreste. (2 Makorinte 6:14-17) Ki lona libaka Jesu hanaasika lumeleza balutiwa bahae kuswalisana ni bulapeli busili. (Mateu 12:30; Joani 14:6) Mi Mulao wanaafile Mulimu ka Mushe neuhanisa Maisilaele ba kwaikale kuikenya mwa bulapeli bwa batu bane bayahile bukaufi ni bona. (Exoda 34:11-14) Maisilaele nebabonisize busepahali ka kuhana tuso ya batu basili, yenekona kutahisa kuli bulapeli bwabona buswalisane ni bulapeli bwa batu bane banani litumelo lisili.​—Ezira 4:1-3.

 Eni. Mane mwa silimo sa 2022, lutandile lihora ze 1,501,797,703 inze luikambota ni batu ba bulapeli busili. Sina muapositola Paulusi, lutabela kuutwisisa zebalumela ni zebanahana batu bolukutaza ku bona “ka mokukonahalela kaufela.” (1 Makorinte 9:19-22) Mi haluambolanga ni batu, luezanga molukonela kaufela kusebelisa kelezo ya mwa Bibele ya kubonisa batu babañwi “likute lelituna.”​—1 Pitrosi 3:15.