TOHO YA TABA: ZE LU ITUTA KU MUSHE

Mushe Ne Li Mañi?

Kwa litaba ze kolohanyizwe kwatasi ki lifi ze mu hupulanga ha mu utwa libizo la Mushe?

▪ mbututu ye ne beilwe ki bo ma yona mwa sizuma ni ku patiwa mwa Nuka ya Nile.

▪ mushimani ya naa hulisizwe ki mukwae mwanaa Faro, mwa Egepita, ni ku pila bupilo bo bunde hahulu, niteñi naa si ka libala kuli ne li Muisilaele.

▪ muuna ya naa bile mulisana mwa Midiani ka lilimo ze 40.

▪ muuna ya naa ambozi ni Jehova * fapilaa sicacani se si tuka mulilo.

▪ muuna ya naa atumezi mulena wa Egepita, ni ku kupa ka bundume kuli Maisilaele ba lukululwe mwa butanga.

▪ muuna ya naa zibahalize ka ketelelo ya Mulimu, Likozi ze Lishumi fapilaa Egepita mulena wa yona ha naa hanyelize Mulimu wa niti.

▪ muuna ya naa etelezi Maisilaele ku ba zwisa mwa Egepita.

▪ muuna ya naa itusisizwe ki Mulimu ku kauhanya mezi a Liwate le li Fubelu.

▪ muuna ya naa file Maisilaele Milao ye Lishumi ye nee zwa ku Mulimu.

MUSHE naa ezize lika ze kaufela ni ze ñwi ze ñata. Kona libaka muuna ya sepahala yo, ha kutekiwa hahulu ki Bakreste, Majuda, ni Mamozilemu!

Kwa iponahalela hande kuli Mushe nee li mupolofita ya naa ezize “ze tuna ze sabisa.” (Deuteronoma 34:10-12) Mulimu naa itusisize yena ka nzila ye maata. Kono Mushe ne li mutu-tu feela. Ka ku swana ni mupolofita Elia, ya naa bonahezi mwa pono hamoho ni Mushe ka nako ya bukombwa bwa Jesu bwa fa lifasi, Mushe naa li mutu ya na ni “maikuto a swana ni a luna.” (Jakobo 5:17; Mateu 17:1-9) Mushe naa kopani ni butata bo bu shutana-shutana bo bu swana ni bo lu kopana ni bona, mi naa konile ku tula butata bo.

Kana mwa tabela ku ziba mwa naa ezelize cwalo? Ha mu nyakisise tulemeno to tunde to tulaalu twa naa bonisize Mushe, ni ze lu kona ku ituta kwa mutala wa hae.

[Litaluso za kwatasi]