ຄຳພີໄບເບິນປ່ຽນຊີວິດຄົນ
“ພວກເຂົາຢາກໃຫ້ຂ້ອຍເຂົ້າໃຈຄວາມຈິງດ້ວຍໂຕເອງ”
ປີເກີດ: 1982
ປະເທດບ້ານເກີດ: ສາທາລະນະລັດ ໂດມິນິກັນ
ອະດີດ: ເຕີບໃຫຍ່ໃນຄອບຄົວມໍມອນ
ຊີວິດທີ່ຜ່ານມາ:
ຂ້ອຍເກີດຢູ່ເມືອງຊັນໂຕໂດມິນໂກຢູ່ປະເທດສາທາລະນະລັດໂດມິນິກັນ ຂ້ອຍເປັນລູກຫຼ້າຂອງຄອບຄົວທີ່ມີອ້າຍເອື້ອຍນ້ອງ 4 ຄົນ. ພໍ່ແມ່ເປັນຄົນທີ່ມີການສຶກສາແລະຢາກໃຫ້ລູກເຕີບໃຫຍ່ໃນສະພາບແວດລ້ອມທີ່ດີ. ກ່ອນທີ່ຂ້ອຍເກີດມາ 4 ປີ ພໍ່ແມ່ໄດ້ເຈິມິດຊັນນາຣີຂອງມໍມອນ. ຍ້ອນພວກເພິ່ນປະທັບໃຈທີ່ເຫັນຊາຍໜຸ່ມແຕ່ງໂຕແບບສຸພາບແລະມີມາລະຍາດທີ່ດີ ບໍ່ດົນພວກເພິ່ນກໍຕັດສິນໃຈວ່າຄອບຄົວພວກເຮົາຈະເປັນໜຶ່ງໃນຄອບຄົວທຳອິດຢູ່ເທິງເກາະທີ່ຈະເຂົ້າມາເປັນສະມາຊິກໂບດຂອງພະເຢຊູຄລິດແຫ່ງໄພ່ພົນຍຸກສຸດທ້າຍຫຼືໂບດມໍມອນ.
ຕັ້ງແຕ່ນ້ອຍ ຂ້ອຍມັກເຂົ້າຮ່ວມກິດຈະກຳຕ່າງໆຂອງໂບດ ແລະຕິດໃຈທີ່ມໍມອນເນັ້ນເຖິງຄວາມສຳຄັນຂອງຊີວິດຄອບຄົວແລະຄ່ານິຍົມທາງສິນລະທຳ. ຂ້ອຍພູມໃຈທີ່ໄດ້ເປັນມໍມອນ ແລະຕັ້ງເປົ້າໝາຍວ່າຈະເປັນມິດຊັນນາຣີ.
ເມື່ອຂ້ອຍອາຍຸ 18 ປີ ຄອບຄົວຂອງຂ້ອຍຍ້າຍໄປຢູ່ສະຫະລັດເພື່ອຂ້ອຍຈະມີໂອກາດຮຽນຕໍ່ໃນມະຫາວິທະຍາໄລດີໆ. ປະມານໜຶ່ງປີຕໍ່ມາ ນ້າສາວກັບຜົວເຊິ່ງເປັນພະຍານພະເຢໂຫວາໄດ້ມາຢາມພວກເຮົາຢູ່ລັດຟລໍຣິດາ. ພວກເຂົາຊວນພວກເຮົາເຂົ້າຮ່ວມການປະຊຸມໃຫຍ່ທີ່ໃຫ້ຄວາມຮູ້ກ່ຽວກັບຄຳພີໄບເບິນ. ຂ້ອຍປະທັບໃຈທີ່ເຫັນໝົດທຸກຄົນທີ່ນັ່ງອ້ອມແອ້ມຂ້ອຍເປີດຄຳພີໄບເບິນແລະຈົດບັນທຶກພ້ອມ. ຂ້ອຍເລີຍຂໍບິກກັບເຈ້ຍແລ້ວເລີ່ມຈົດຄືກັນ.
ຫຼັງຈາກການປະຊຸມໃຫຍ່ນັ້ນ ນ້າສາວກັບຜົວບອກວ່າໃນເມື່ອຂ້ອຍຢາກເປັນມິດຊັນນາຣີ ພວກເຂົາກໍສາມາດຊ່ວຍຂ້ອຍໃຫ້ຮູ້ບາງສິ່ງບາງຢ່າງກ່ຽວກັບຄຳພີໄບເບິນ. ຂ້ອຍຄິດວ່າດີຄືກັນ ເພາະວ່າຕອນນັ້ນຂ້ອຍລຶ້ງກັບຄຳພີມໍມອນຫຼາຍກວ່າຄຳພີໄບເບິນ.
ຄຳພີໄບເບິນປ່ຽນຊີວິດຂ້ອຍແນວໃດ:
ທຸກເທື່ອທີ່ພວກເຮົາຮຽນຄຳພີໄບເບິນທາງໂທລະສັບ ນ້າສາວແລະນ້າບ່າວຕ້ອງສະໜັບສະໜູນຂ້ອຍໃຫ້ປຽບທຽບຄວາມເຊື່ອຂອງຂ້ອຍກັບຄຳສອນໃນຄຳພີໄບເບິນ. ພວກເຂົາຢາກໃຫ້ຂ້ອຍເຂົ້າໃຈຄວາມຈິງດ້ວຍໂຕເອງ.
ມີຄຳສອນຫຼາຍຢ່າງຂອງມໍມອນທີ່ຂ້ອຍຍອມຮັບ ແຕ່ຂ້ອຍບໍ່ແນ່ໃຈວ່າຄຳສອນເຫຼົ່ານັ້ນສອດຄ່ອງກັບສິ່ງທີ່ຄຳພີໄບເບິນສອນຫຼືບໍ່. ນ້າສາວຝາກວາລະສານໃຫ້ຂ້ອຍນັ້ນແມ່ນວາລະສານຕື່ນເຖີດ! ສະບັບ 8 ພະຈິກ ປີ 1995 ເຊິ່ງຈັດພິມໂດຍພະຍານພະເຢໂຫວາ ແລະບາງບົດຄວາມກໍເວົ້າເຖິງຄວາມເຊື່ອຂອງມໍມອນ. ຂ້ອຍແປກໃຈທີ່ເຫັນວ່າມີຄຳສອນຫຼາຍຢ່າງຂອງມໍມອນທີ່ຂ້ອຍບໍ່ເຄີຍຮູ້ມາກ່ອນ. ຂ້ອຍຈຶ່ງໄປຄົ້ນຄວ້າຂໍ້ມູນໃນເວັບໄຊທາງການຂອງມໍມອນເພື່ອໃຫ້ໝັ້ນໃຈວ່າສິ່ງທີ່ບອກໃນຕື່ນເຖີດ! ເປັນຄວາມຈິງ. ມັນເປັນຄວາມຈິງແທ້. ແລະເມື່ອຂ້ອຍໄປພິພິທະພັນຂອງມໍມອນໃນລັດຢູທາເພື່ອພິສູດເລື່ອງນີ້ຕື່ມ ຂ້ອຍກໍແຮ່ງໝັ້ນໃຈວ່າເປັນແບບນັ້ນແທ້.
ຂ້ອຍເຊື່ອມາຕະຫຼອດວ່າຄຳພີຂອງມໍມອນແລະຄຳພີໄບເບິນເສີມກັນໄດ້. ແຕ່ເມື່ອຂ້ອຍເລີ່ມອ່ານຄຳພີໄບເບິນຢ່າງຈິງຈັງ ຂ້ອຍສັງເກດວ່າຄຳສອນບາງຢ່າງຂອງມໍມອນຂັດແຍ່ງກັບຄຳສອນໃນຄຳພີໄບເບິນ. ຕົວຢ່າງເຊັ່ນ ໃນເອເຊກຽນ 18:4 ຄຳພີໄບເບິນບອກວ່າຈິດວິນຍານຕາຍໄດ້. ໃນແອລມາ 42:9 ຄຳພີຂອງມໍມອນພັດບອກວ່າ: “ຈິດວິນຍານຕາຍບໍ່ໄດ້ເລີຍ.”
ນອກຈາກຂໍ້ຂັດແຍ່ງໃນເລື່ອງຫຼັກຄຳສອນແລ້ວ ຂ້ອຍຍັງບໍ່ສະບາຍໃຈກັບຄຳສອນຫຼາຍຢ່າງຂອງມໍມອນທີ່ສົ່ງເສີມແນວຄິດແບບຊາດນິຍົມ. ຕົວຢ່າງເຊັ່ນ ມໍມອນສອນວ່າສວນເອເດນເຄີຍຢູ່ແຈັກສັນເຄົາຕີໃນລັດມິດຊູຣີປະເທດສະຫະລັດອາເມລິກາ. ແລະຜູ້ນຳຂອງໂບດກໍບອກວ່າເມື່ອ “ລາຊະອານາຈັກຂອງພະເຈົ້າຈະມາປົກຄອງ ທຸງຊາດອາເມລິກາຈະລອຍຢ່າງສະຫງ່າງາມຢູ່ເທິງເສົາແຫ່ງເສລີພາບແລະສິດທິສະເໝີພາກ.”
ຂ້ອຍສົງໄສວ່າແລ້ວຈະເກີດຫຍັງຂຶ້ນກັບປະເທດຂອງຂ້ອຍ ຫຼືປະເທດອື່ນໆ. ມື້ໜຶ່ງໃນຕອນແລງ ຂ້ອຍໄດ້ຮັບໂທລະສັບຈາກຊາຍໜຸ່ມຄົນໜຶ່ງທີ່ກຳລັງຝຶກອົບຮົມເພື່ອເປັນມິດຊັນນາຣີ ຂ້ອຍຈຶ່ງຖາມຄວາມຄິດເຫັນລາວກ່ຽວກັບເລື່ອງນັ້ນ. ຂ້ອຍຖາມລາວກົງໆວ່າຖ້າປະເທດລາວເຮັດສົງຄາມກັບອີກປະເທດໜຶ່ງ ລາວຊິເຕັມໃຈຕໍ່ສູ້ກັບເພື່ອນມໍມອນຂອງປະເທດອື່ນຫຼືບໍ່. ຂ້ອຍບໍ່ຢາກເຊື່ອເລີຍເມື່ອລາວຕອບວ່າຈະໄປແນ່ນອນ! ຫຼັງຈາກນັ້ນ ຂ້ອຍຈຶ່ງສຶກສາຄຳສອນຂອງມໍມອນໃຫ້ລະອຽດຂຶ້ນ ແລະຍັງໄປຖາມພວກອາຈານຢູ່ໂບດມໍມອນພ້ອມ. ພວກເຂົາຕອບຂ້ອຍວ່າຄຳຖາມຂອງຂ້ອຍເປັນຄວາມລຶກລັບທີ່ຈະໄດ້ຮັບການເປີດເຜີຍໃນມື້ທີ່ຄວາມສະຫວ່າງຈະສ່ອງແສງແຮງກ້າຂຶ້ນ.
ຂ້ອຍຜິດຫວັງຫຼາຍເມື່ອໄດ້ຍິນຄຳອະທິບາຍແບບນີ້ ຂ້ອຍກໍມາກວດເບິ່ງໂຕເອງຢ່າງຈິງຈັງແລະຖາມໂຕເອງວ່າເປັນຫຍັງຂ້ອຍຈຶ່ງຢາກເປັນມິດຊັນນາຣີຂອງມໍມອນ. ແລ້ວຂ້ອຍໄດ້ຄຳຕອບວ່າຂ້ອຍຢາກເປັນມິດຊັນນາຣີເພາະຂ້ອຍຢາກຊ່ວຍເຫຼືອຄົນອື່ນ. ນອກຈາກນັ້ນ ຂ້ອຍເບິ່ງວ່າວຽກຂອງມິດຊັນນາຣີເປັນວຽກທີ່ມີກຽດແລະໄດ້ຮັບຄວາມນັບຖືສູງ. ແຕ່ແທ້ໆແລ້ວ ຂ້ອຍບໍ່ໄດ້ຮູ້ຫຍັງຫຼາຍກ່ຽວກັບພະເຈົ້າເລີຍ. ເຖິງແມ່ນວ່າຂ້ອຍເຄີຍອ່ານຄຳພີໄບເບິນຫຼາຍເທື່ອ ແຕ່ຂ້ອຍບໍ່ເຄີຍເຫັນຄຸນຄ່າຄຳພີໄບເບິນແທ້ໆ. ຂ້ອຍບໍ່ຮູ້ຊ້ຳວ່າຈຸດປະສົງຂອງພະເຈົ້າຕໍ່ແຜ່ນດິນໂລກແລະມະນຸດແມ່ນຫຍັງ.
ປະໂຫຍດທີ່ໄດ້ຮັບ:
ເມື່ອຂ້ອຍຮຽນຄຳພີໄບເບິນກັບພະຍານພະເຢໂຫວາ ຂ້ອຍໄດ້ມາຮູ້ຫຼາຍຢ່າງເຊັ່ນ ຊື່ຂອງພະເຈົ້າ ສິ່ງທີ່ເກີດຂຶ້ນເມື່ອຄົນເຮົາຕາຍ ແລະບົດບາດຂອງພະເຢຊູໃນການເຮັດໃຫ້ຈຸດປະສົງຂອງພະເຈົ້າສຳເລັດເປັນຈິງ. ໃນທີ່ສຸດ ຂ້ອຍກໍລຶ້ງເຄີຍກັບປຶ້ມທີ່ດີເລີດນີ້ ແລະຂ້ອຍມີຄວາມສຸກໃນການໄປບອກຄົນອື່ນກ່ຽວກັບຄວາມຈິງຈາກຄຳພີໄບເບິນທີ່ຂ້ອຍໄດ້ຮຽນມາ. ຂ້ອຍເຊື່ອມາຕະຫຼອດວ່າມີພະເຈົ້າ ແຕ່ດຽວນີ້ຂ້ອຍສາມາດລົມນຳເພິ່ນໃນການອະທິດຖານຄືກັບທີ່ລົມນຳໝູ່ຮັກໝູ່ແພງ. ຂ້ອຍຮັບບັບເຕມາເປັນພະຍານພະເຢໂຫວາໃນວັນທີ 12 ເດືອນກໍລະກົດ ປີ 2004 ແລະ 6 ເດືອນຕໍ່ມາ ຂ້ອຍກໍເລີ່ມເຮັດວຽກຮັບໃຊ້ພະເຈົ້າເຕັມເວລາ.
ຂ້ອຍເຄີຍເຮັດວຽກຢູ່ສຳນັກງານໃຫຍ່ຂອງພະຍານພະເຢໂຫວາຢູ່ບຣຸກລິນລັດນິວຢອກເປັນເວລາ 5 ປີ. ຂ້ອຍມີຄວາມສຸກທີ່ມີສ່ວນໃນການພິມຄຳພີໄບເບິນແລະປຶ້ມອື່ນໆທີ່ຊ່ວຍໃຫ້ຫຼາຍລ້ານຄົນທົ່ວໂລກເຂົ້າໃຈຄຳພີໄບເບິນ ແລະຕອນນີ້ ຂ້ອຍຍັງມີຄວາມສຸກທີ່ໄດ້ຊ່ວຍຄົນອື່ນໃຫ້ຮຽນຮູ້ຈັກພະເຈົ້າ.