ສຳພາດ | ຣາເຄວ ຮໍ
ຜູ້ຍິງຄົນຢິວອະທິບາຍເຫດຜົນທີ່ລາວກວດສອບຄວາມເຊື່ອຢ່າງຈິງຈັງ
ຣາເຄວ ຮໍ ມີແມ່ເປັນຄົນອິດສະຣາເອນທີ່ນັບຖືສາສະໜາຢິວ ສ່ວນພໍ່ເປັນຄົນໂອຕຣິດທີ່ປ່ຽນມານັບຖືສາສະໜາຢິວ. ພໍ່ຕູ້ກັບແມ່ຕູ້ຂອງລາວເປັນສະມາຊິກລັດທິຊີໂອນແລະໄດ້ອົບພະຍົບໄປຢູ່ອິດສະຣາເອນໃນປີ 1948 ເຊິ່ງເປັນປີທີ່ມີການກໍ່ຕັ້ງລັດອິດສະຫຼະແຫ່ງນີ້. ຕື່ນເຖີດ! ໄດ້ຖາມຣາເຄວວ່າອັນໃດເຮັດໃຫ້ລາວຢາກກວດສອບຄວາມເຊື່ອທາງສາສະໜາຂອງລາວຢ່າງຈິງຈັງ.
ຂໍຊ່ວຍເລົ່າພູມຫຼັງຂອງເຈົ້າໃຫ້ເຮົາຟັງໄດ້ບໍ?
ຂ້ອຍເກີດຢູ່ສະຫະລັດອາເມຣິກາໃນປີ 1979. ພໍ່ແມ່ຢ່າຮ້າງກັນຕອນທີ່ຂ້ອຍອາຍຸສາມປີ. ແມ່ໄດ້ລ້ຽງຂ້ອຍຕາມທຳນຽມຂອງຄົນຢິວແລະສົ່ງຂ້ອຍໄປເຂົ້າໂຮງຮຽນເຢຊິວາດສ໌ ຫຼືໂຮງຮຽນສອນສາສະໜາຢິວ. ເມື່ອຂ້ອຍອາຍຸເຈັດປີ ເຮົາຍ້າຍໄປຢູ່ອິດສະຣາເອນເປັນເວລາໜຶ່ງປີ ແລະຂ້ອຍໄດ້ເຂົ້າໂຮງຮຽນໃນຄິບບູດສ໌ຫຼືເຂດການກະເສດຂອງຄົນຢິວ. ຫຼັງຈາກນັ້ນ ແມ່ພາຂ້ອຍຍ້າຍໄປຢູ່ແມັກຊິກ.
ເຖິງວ່າໃນເຂດທີ່ເຮົາອາໄສຢູ່ຈະບໍ່ມີບ່ອນປະຊຸມຂອງຄົນຢິວ ແຕ່ຂ້ອຍກໍຍັງຮັກສາທຳນຽມຂອງຄົນຢິວຢ່າງເຄັ່ງຄັດ. ຂ້ອຍຈະໄຕ້ທຽນໃນວັນຊະບາໂຕ ອ່ານໂທຣາ ແລະອະທິດຖານໂດຍໃຊ້ໜັງສືສວດມົນ. ເມື່ອຢູ່ໂຮງຮຽນ ຂ້ອຍມັກຈະບອກໝູ່ຄູ່ໃນຫ້ອງຮຽນສະເໝີວ່າສາສະໜາຂອງຂ້ອຍເປັນຂອງແທ້. ຂ້ອຍບໍ່ເຄີຍອ່ານສິ່ງທີ່ເອີ້ນກັນວ່າ ພະຄຳພີພາກພັນທະສັນຍາໃໝ່ ເຊິ່ງເນັ້ນເລື່ອງວຽກປະກາດແລະຄຳສອນຂອງພະເຢຊູຄລິດ. ທີ່ຈິງ ແມ່ຂອງຂ້ອຍເຕືອນສະເໝີວ່າຢ່າຊູ່ອ່ານເດັດຂາດ ເພາະຢ້ານວ່າຄຳສອນເຫຼົ່ານັ້ນຈະເຮັດໃຫ້ຄວາມເຊື່ອຂອງຂ້ອຍແປດເປື້ອນ.
ເປັນຫຍັງເຈົ້າຈຶ່ງຕັດສິນໃຈອ່ານຄຳພີພາກພັນທະສັນຍາໃໝ່?
ເມື່ອອາຍຸ 17 ປີ ຂ້ອຍກໍຍ້າຍກັບໄປຢູ່ສະຫະລັດອາເມຣິກາເພື່ອຈະຮຽນໃຫ້ຈົບ. ຢູ່ສະຫະລັດນີ້ເອງ ຜູ້ຊາຍຄລິດສະຕຽນຄົນໜຶ່ງທີ່ຂ້ອຍຮູ້ຈັກບອກຂ້ອຍວ່າຊີວິດຂອງຂ້ອຍຈະບໍ່ມີວັນສົມບູນຖ້າບໍ່ຮູ້ຈັກພະເຢຊູ.
ຂ້ອຍຕອບລາວວ່າ “ຄົນທີ່ເຊື່ອໃນພະເຢຊູແມ່ນຄົນທີ່ຖືກຕົວະ.”
ລາວຖາມຂ້ອຍຄືນວ່າ “ແລ້ວເຈົ້າເຄີຍອ່ານພັນທະສັນຍາໃໝ່ແລ້ວບໍ?”
ຂ້ອຍຕອບວ່າ “ບໍ່ເຄີຍ.”
ແລ້ວລາວກໍເວົ້າວ່າ “ຄັນຊັ້ນເຈົ້າກໍບໍ່ສະຫຼາດຕົ່ວທີ່ສະແດງຄວາມຄິດເຫັນໃນເລື່ອງທີ່ເຈົ້າບໍ່ມີຄວາມຮູ້ເລີຍ!”
ຄຳເວົ້າຂອງລາວແທງໃຈຂ້ອຍ ເພາະຂ້ອຍເອງກໍເຊື່ອວ່າການສະແດງຄວາມຄິດເຫັນໃນເລື່ອງທີ່ບໍ່ຮູ້ແທ້ຖືເປັນຄວາມໂງ່. ເມື່ອຖືກເວົ້າໃຫ້ແບບນັ້ນຂ້ອຍຈຶ່ງຢືມຄຳພີໄບເບິນຂອງລາວເມືອເຮືອນແລະເລີ່ມອ່ານ.
ເກີດຫຍັງຂຶ້ນຫຼັງຈາກທີ່ເຈົ້າໄດ້ອ່ານພະຄຳພີຫົວນັ້ນ?
ຂ້ອຍແປກໃຈທີ່ໄດ້ຮູ້ວ່າຜູ້ຂຽນພັນທະສັນຍາໃໝ່ລ້ວນເປັນຄົນຢິວ. ນອກຈາກນັ້ນ ແຮ່ງຂ້ອຍອ່ານຫຼາຍຂ້ອຍກໍແຮ່ງເຫັນວ່າພະເຢຊູເປັນຄົນຢິວທີ່ກະລຸນາແລະຖ່ອມໃຈ ເພິ່ນຕ້ອງການຊ່ວຍເຫຼືອຜູ້ຄົນແລະບໍ່ຄິດທີ່ຈະເອົາລັດເອົາປຽບເຂົາເຈົ້າ. ຂ້ອຍເຖິງຂັ້ນໄປຢືມປຶ້ມຢູ່ຫ້ອງສະໝຸດກ່ຽວກັບເລື່ອງລາວຊີວິດຂອງພະເຢຊູມາອ່ານ. ແນວໃດກໍຕາມ ປຶ້ມເຫຼົ່ານັ້ນບໍ່ມີຫົວໃດເລີຍທີ່ຊ່ວຍໃຫ້ຂ້ອຍໝັ້ນໃຈວ່າເພິ່ນເປັນເມຊີອາ. ບາງຫົວເຖິງຂັ້ນບອກວ່າເພິ່ນເປັນພະເຈົ້າ ເຊິ່ງສຳລັບຂ້ອຍແລ້ວຄວາມຄິດແບບນັ້ນບໍ່ມີເຫດມີຜົນເລີຍ. ຖ້າພະເຢຊູເປັນພະເຈົ້າ ເພິ່ນອະທິດຖານເຖິງໃຜ ເພິ່ນເອງບໍ? ຍິ່ງກວ່ານັ້ນ ພະເຢຊູຕາຍ. ແຕ່ຄຳພີໄບເບິນເວົ້າເຖິງພະເຈົ້າວ່າ: ພະອົງ “ບໍ່ມີວັນຕາຍ.” *
ເຈົ້າພົບຄຳຕອບແນວໃດສຳລັບຄຳຖາມເຫຼົ່ານີ້?
ຄວາມຈິງບໍ່ເຄີຍຂັດແຍ່ງໃນໂຕເອງ ແລະຂ້ອຍກໍຕັ້ງໃຈຈະຄົ້ນຫາຄວາມຈິງໃຫ້ໄດ້. ຂ້ອຍອະທິດຖານເຖິງພະເຈົ້າຢ່າງຈິງໃຈທັງນ້ຳຕາ ແລະນັ້ນເປັນເທື່ອທຳອິດທີ່ຂ້ອຍອະທິດຖານໂດຍບໍ່ໄດ້ໃຊ້ໜັງສືສວດມົນ. ເມື່ອອະທິດຖານຍັງບໍ່ທັນຈົບກໍມີສຽງຄົນເຄາະປະຕູ. ພະຍານພະເຢໂຫວາສອງຄົນມາຫາຂ້ອຍ. ເຂົາເຈົ້າເອົາຄູ່ມືສຶກສາຄຳພີໄບເບິນຫົວໜຶ່ງໃຫ້ຂ້ອຍ. ເມື່ອອ່ານປຶ້ມນີ້ພ້ອມກັບການພິຈາລະນາເລື່ອງລາວຕ່າງໆກັບພະຍານ ຂ້ອຍກໍໝັ້ນໃຈວ່າຄວາມເຊື່ອຂອງເຂົາເຈົ້າມາຈາກຄຳພີໄບເບິນ. ຕົວຢ່າງເຊັ່ນ ພະຍານນັບຖືພະເຢຊູ ບໍ່ແມ່ນໃນຖານະພະເຈົ້າອົງໜຶ່ງໃນຕີເອການຸພາບ ແຕ່ໃນຖານະ “ລູກຂອງພະເຈົ້າ’’ * ແລະ “ເປັນຜູ້ທຳອິດທີ່ພະເຈົ້າສ້າງ.” *
ຫຼັງຈາກນັ້ນບໍ່ດົນ ຂ້ອຍກັບໄປຢູ່ແມັກຊິກແລະສຶກສາຄຳພະຍາກອນກ່ຽວກັບເມຊີອາກັບພະຍານຕໍ່ໄປ. ຂ້ອຍງຶດແທ້ໆທີ່ຮູ້ວ່າມີຄຳພະຍາກອນຫຼາຍຂະໜາດນັ້ນ! ແຕ່ຂ້ອຍຍັງມີຂໍ້ສົງໄສບາງຢ່າງ. ຂ້ອຍສົງໄສວ່າ: ‘ມີພະເຢຊູເທົ່ານັ້ນບໍທີ່ມີລັກສະນະກົງກັບເມຊີອາຕາມຄຳພະຍາກອນ?’ ແລະ ‘ເປັນໄປໄດ້ບໍວ່າເພິ່ນພຽງແຕ່ຫຼິ້ນໄປຕາມບົດບາດຄືກັບນັກສະແດງເກັ່ງໆຄົນໜຶ່ງ?’
ອັນໃດເຮັດໃຫ້ເຈົ້າປ່ຽນຄວາມຄິດ?
ພະຍານຊີ້ໃຫ້ຂ້ອຍເບິ່ງຄຳພະຍາກອນຫຼາຍຂໍ້ທີ່ບໍ່ມີຜູ້ແອບອ້າງຫຼືຜູ້ສວມຮອຍຄົນໃດຈະເຮັດໄດ້. ຕົວຢ່າງເຊັ່ນ ຜູ້ພະຍາກອນມີເກບອກໄວ້ລ່ວງໜ້າຫຼາຍກວ່າ 700 ປີວ່າ ເມຊີອາຈະມາເກີດຢູ່ເມືອງເບັດເລເຮັມ ແຂວງຢູດາຍ. * ໃຜຈະກຳນົດໄດ້ວ່າໂຕເອງຕ້ອງໄປເກີດຢູ່ໃສ? ເອຊາຢາຂຽນວ່າເມຊີອາຈະຖືກປະຫານຄືກັບອາດຊະຍາກອນ ແຕ່ຈະຖືກຝັງລວມກັບເສດຖີ. * ຄຳພະຍາກອນທັງໝົດນີ້ກົງກັບຊີວິດຂອງພະເຢຊູແທ້ໆ.
ຫຼັກຖານຢ່າງສຸດທ້າຍກ່ຽວຂ້ອງກັບວົງຕະກູນຂອງພະເຢຊູ. ຄຳພີໄບເບິນບອກວ່າເມຊີອາຈະສືບເຊື້ອສາຍມາຈາກກະສັດດາວິດ. * ເນື່ອງຈາກຄົນຢິວໃນສະໄໝບູຮານເຮັດບັນທຶກລຳດັບວົງຕະກູນເກັບໄວ້ ຖ້າພະເຢຊູບໍ່ແມ່ນເຊື້ອສາຍຂອງດາວິດ ພວກສັດຕູຄືຊິປ່າວປະກາດໃຫ້ຮູ້ທົ່ວກັນແລ້ວ! ແຕ່ເຂົາເຈົ້າກໍບໍ່ໄດ້ເຮັດແບບນັ້ນເພາະພະເຢຊູເປັນເຊື້ອສາຍຂອງດາວິດແທ້ແບບທີ່ບໍ່ມີໃຜໂຕ້ແຍ່ງໄດ້. ຜູ້ຄົນເຖິງຂັ້ນເອີ້ນເພິ່ນວ່າ “ລູກຫຼານດາວິດ.” *
ປະມານ 37 ປີຫຼັງຈາກພະເຢຊູຕາຍ ຄືໃນປີ ຄ.ສ 70 ກອງທັບໂຣມໄດ້ທຳລາຍເມືອງເຢຣູຊາເລັມ ແລະບັນທຶກລຳດັບວົງຕະກູນຂອງຄົນຢິວໄດ້ສູນຫາຍໄປຫຼືບໍ່ກໍຖືກທຳລາຍ. ຍ້ອນແນວນີ້ ເມຊີອາຈຶ່ງຕ້ອງປາກົດໂຕກ່ອນປີ ຄ.ສ 70 ເພື່ອຈະລະບຸໂຕເພິ່ນໄດ້ຢ່າງຖືກຕ້ອງຕາມບັນທຶກລຳດັບວົງຕະກູນ.
ຄວາມເຂົ້າໃຈໃໝ່ນີ້ມີຜົນຕໍ່ເຈົ້າແນວໃດ?
ໃນພະບັນຍັດ 18:18, 19 ມີການບອກລ່ວງໜ້າວ່າພະເຈົ້າຈະແຕ່ງຕັ້ງຜູ້ພະຍາກອນຄົນໜຶ່ງເຊິ່ງເປັນຄືກັບໂມເຊໃນອິດສະຣາເອນ. ພະເຈົ້າບອກວ່າ “ຖ້າລາວເວົ້າໃນຊື່ຂອງເຮົາ ແລ້ວມີຄົນບໍ່ຟັງຄວາມລາວ ຜູ້ນັ້ນກໍຈະຖືກລົງໂທດ.” ການສຶກສາຄຳພີໄບເບິນໝົດຫົວຢ່າງເລິກເຊິ່ງເຮັດໃຫ້ຂ້ອຍເຊື່ອວ່າຜູ້ພະຍາກອນຄົນນັ້ນແມ່ນພະເຢຊູຄົນນາຊາເຣັດ.
^ ຫາບາກຸກ 1:12, ລ.ມ.
^ ເອຊາອີ 9:6, 7; ລູກາ 1:30-32. ມັດທາຍບົດ 1 ບັນທຶກລາຍຊື່ບັນພະບຸລຸດທາງພໍ່ຂອງພະເຢຊູ ສ່ວນລູກາບົດ 3 ບັນທຶກລາຍຊື່ບັນພະບຸລຸດທາງແມ່.
ເລື່ອງທີ່ເຈົ້າອາດຈະມັກ
ຕື່ນເຖີດ!
ຜູ້ຊ່ຽວຊານທີ່ສຶກສາໂຕອ່ອນຂອງສິ່ງມີຊີວິດເລົ່າເລື່ອງຄວາມເຊື່ອຂອງລາວ
ສາສະດາຈານຢັນ-ເດີ ຊູ ເຄີຍເຊື່ອເລື່ອງວິວັດທະນາການ ແຕ່ເມື່ອມາເປັນນັກວິທະຍາສາດການວິໄຈແລ້ວລາວກໍປ່ຽນຄວາມຄິດ.
ຕື່ນເຖີດ!
ອັນໃດເຮັດໃຫ້ບາດຫຼວງລາອອກຈາກໂບດ?
ຂໍເຮົາມາເບິ່ງຄວາມພະຍາຍາມຂອງອັນໂຕນີໂອ ເດລາ ກັດຕາທີ່ເຮັດໃຫ້ລາວໃກ້ຊິດກັບພະເຈົ້າ.
