ມີຜູ້ອອກແບບບໍ?
ການດຳນ້ຳຂອງນົກແກນເນັດ
ນົກແກນເນັດເປັນນົກທະເລຂະໜາດໃຫຍ່ ມັນສາມາດບິນລົງໄປໃນນ້ຳດ້ວຍຄວາມໄວສູງສຸດເຖິງ 190 ກິໂລແມັດຕໍ່ຊົ່ວໂມງ ແລະຕອນທີ່ມັນປະທະກັບຜິວນ້ຳ ແຮງປະທະອາດຈະຫຼາຍກວ່າແຮງໂນ້ມຖ່ວງຂອງໂລກເຖິງ 20 ເທົ່າ. ດ້ວຍຄວາມໄວແລະແຮງປະທະທີ່ຫຼາຍຂະໜາດນັ້ນ ເປັນຫຍັງນົກແກນເນັດຈຶ່ງບໍ່ໄດ້ຮັບບາດເຈັບແລະຍັງສາມາດດຳນ້ຳແບບນີ້ໄດ້ເທື່ອແລ້ວເທື່ອອີກ?
ລອງຄິດເບິ່ງ: ກ່ອນທີ່ນົກແກນເນັດຈະປະທະກັບຜິວນ້ຳ ມັນຈະພັບປີກທັງສອງຂ້າງໄປທາງຫຼັງຂອງລຳໂຕ ເຊິ່ງເຮັດໃຫ້ໂຕຂອງມັນມີລັກສະນະແຫຼັມຄືກັບລູກທະນູ. ແລ້ວມັນກໍຈະປິດເປືອກຕາທີ່ເປັນລັກສະນະພິເສດເພື່ອປົກປ້ອງດວງຕາຂອງມັນ ນອກຈາກນັ້ນ ໃນຄໍແລະຊ່ວງເອິກຂອງນົກຊະນິດນີ້ຍັງມີອະໄວຍະວະທີ່ເຮັດໜ້າທີ່ເປັນຄືຖົງລົມນິລະໄພເຊິ່ງຊ່ວຍຮັບແຮງກະທົບເມື່ອປະທະກັບຜິວນ້ຳ.
ຖ້າເບິ່ງນົກແກນເນັດຕອນທີ່ພຸ່ງລົງໄປໃນນ້ຳຈະເຫັນວ່າ ມັນຈະງອຍປາກ ຫົວ ແລະຄໍຂອງມັນເຂົາກັນແລ້ວຈະມີຮູບຮ່າງຄືກ້ວຍ. ເຊິ່ງຮູບກ້ວຍແບບນີ້ຊ່ວຍກະຈາຍແຮງກະທົບແລະເຮັດໃຫ້ຄໍຂອງນົກບໍໄດ້ຮັບບາດເຈັບ. ແລະທັນທີທີ່ນົກແກນເນັດລົງໄປໃນນ້ຳ ຕາຂອງມັນຈະປັບບ່ອນເບິ່ງເພື່ອຈະເບິ່ງໃນນ້ຳໄດ້ແຈ້ງ.
ນົກແກນເນັດດຳນ້ຳໄດ້ເລິກສ່ຳໃດ? ໂດຍວິທີການດຳນ້ຳແບບນີ້ຊ່ວຍໃຫ້ມັນສາມາດດຳລົງໄປໄດ້ເລິກເກືອບ 11 ແມັດ ແຕ່ທີ່ຈິງມັນຍັງສາມາດດຳລົງໄປໄດ້ເລິກກວ່ານັ້ນອີກເພາະມັນສາມາດລອຍນ້ຳໂດຍການເໜັງປີກທີ່ພັບຢູ່ເຄິ່ງໜຶ່ງແລະໂດຍການເຕະຕີນ. ເຄີຍພົບວ່ານົກຊະນິດນີ້ດຳນ້ຳໄດ້ເລິກຫຼາຍກວ່າ 25 ແມັດ. ແລະເມື່ອຕ້ອງການຂຶ້ນເທິງຜິວນ້ຳ ມັນກໍສາມາດລອຍໂຕຂຶ້ນເທິງຜິວນ້ຳໄດ້ງ່າຍໆ ແລະກໍພ້ອມຈະບິນຂຶ້ນສູ່ທ້ອງຟ້າໄດ້ທັນທີ.
ເບິ່ງການດຳນ້ຳຂອງນົກແກນເນັດ
ນັກຄົ້ນຄວ້າອອກແບບນົກຫຸ່ນຍົນໃຫ້ມີລັກສະນະເປັນຄືນົກແກນເນັດເພື່ອໃຊ້ໃນການຊ່ວຍເຫຼືອແລະຄົ້ນຫາ. ເຂົາເຈົ້າຢາກຈະໃຫ້ຫຸ່ນຍົນນີ້ສາມາດບິນໄດ້ ດຳນ້ຳໄດ້ ແລະເມື່ອກັບຂຶ້ນສູ່ຜິວນ້ຳກໍສາມາດບິນໄດ້ທັນທີ. ແຕ່ໃນຊ່ວງທີ່ເຮັດການທົດລອງຫຸ່ນຍົນຕົ້ນແບບ ປາກົດວ່າມີຫຸ່ນຍົນໂຕໜຶ່ງໄດ້ຮັບຜົນເສຍຫາຍຫຼາຍເທື່ອເນື່ອງຈາກການພຸ່ງລົງນ້ຳດ້ວຍຄວາມໄວ. ເລື່ອງນີ້ເຮັດໃຫ້ນັກຄົ້ນຄວ້າສະຫຼຸບວ່າຫຸ່ນຍົນຕົ້ນແບບ “ດຳນ້ຳເກັ່ງສູ້ນົກແກນເນັດບໍ່ໄດ້ເລີຍ.”
ເຈົ້າຄິດແນວໃດ? ການດຳນ້ຳຂອງນົກແກນເນັດເກີດຈາກວິວັດທະນາການບໍ? ຫຼືມີຜູ້ອອກແບບ?