BIBLIA ELOBI NINI?
Baanzelu
Mikanda, bililingi, mpe bafilme mingi emonisaka baanzelu. Kasi baanzelu bazali banani, mpe basalaka nini?
Baanzelu bazali banani?
OYO BIBLIA ELOBI
Liboso ete Nzambe asala likoló, mabele, mpe bato ya liboso, asalaki bikelamu ya elimo oyo baleki bato. Bikelamu yango bazali na nguya mingi koleka bato, mpe bafandaka na likoló, elongo na Nzambe, esika oyo moto akoki kokóma te mpe komona te. (Yobo 38:4, 7) Biblia ebengi bikelamu yango ya nguya “bilimo” mpe “baanzelu.”
Baanzelu bazali boni? Bazali ebele mpenza. Baanzelu oyo bazali zingazinga ya kiti ya bokonzi ya Nzambe bazali “bamiriade na bamiriade,” to “bankóto na bankóto.” (Emoniseli 5:11) Soki totaleli motángo yango kaka ndenge ezali, tokoloba ete bazali bamilio na bamilio!
“Namonaki . . . ebele ya baanzelu oyo bazalaki zingazinga ya kiti ya bokonzi . . . , mpe motángo na bango ezalaki bamiriade na bamiriade mpe bankóto na bankóto.”
—Emoniseli 5:11.
Makambo nini baanzelu basalaki na ntango ya kala?
OYO BIBLIA ELOBI
Mbala mingi, baanzelu bazalaki balobeli to batindami * ya Nzambe. Biblia emonisi mpe ete Nzambe azalaki kotinda bango básala makamwisi. Nzambe atindaki anzelu moko mpo apambola Abrahama mpe apekisa ye koboma mwana na ye Yisaka. (Ebandeli 22:11-18) Anzelu moko abimelaki Moize na katikati ya nzete ya nzubɛ oyo ezalaki kopela mɔtɔ mpo na koyebisa Moize nsango moko oyo ebongolaki bomoi na ye. (Kobima 3:1, 2) Ntango babwakaki mosakoli Danyele na libulu ya bankɔsi, ‘Nzambe atindaki anzelu na ye mpe akangaki monɔkɔ ya bankɔsi.’
“Bongo anzelu ya Yehova abimelaki [Moize] na kati ya lolemo ya mɔtɔ na katikati ya mwa nzete ya nzubɛ.”
—Kobima 3:2.
Baanzelu bazali kosala nini lelo?
OYO BIBLIA ELOBI
Tokoki koyeba te makambo nyonso oyo baanzelu bazali kosala lelo oyo. Kasi, Biblia emonisi ete bazali kosalisa bato ya mitema sembo báyeba makambo mosusu mpo na Nzambe.
Na ndɔtɔ, Yehova alakisaki Yakobo baanzelu bazali komata mpe kokita na “eskalye” moko oyo ezalaki na mabele mpe nsɔngɛ na yango ekómaki na likoló. (Ebandeli 28:10-12) Mbala mosusu na nzela ya ndɔtɔ yango, Yakobo amonaki, ndenge biso mpe tomonaka, ete Yehova Nzambe atindaka baanzelu awa na mabele mpo na kosalisa bato ya sembo oyo bazali na mposa ya lisalisi na ye.
‘Eskalye moko etɛlɛmi na mabele mpe nsɔngɛ na yango ekómi tii na likoló; baanzelu ya Nzambe bazalaki komata mpe kokita na yango.’
—Ebandeli 28:12.
^ par. 6 Biblia emonisi ete bikelamu mosusu ya elimo batombokelaki Nzambe, mpe ebengi baanzelu yango ya mabe “bademo.”
^ par. 11 Kutu, liloba ya Ebre mpe ya Grɛki oyo basaleli na Biblia mpo na “anzelu” elimboli “motindami.”
Talá mpe...
BIYANO NA MITUNA YA BIBLIA
Baanzelu bazali banani?
Bango nyonso ebele bongo, bautá wapi? Mokomoko na bango azali na nkombo mpe bizaleli na ye?
