29-МАРТ, 2023
ОРУСИЯ

Жахаба камакта отурган ишенимдештерибизди колдоосуз калтырган жок

ОЙНОТУУ

Астрахан облусунун Актюбинск райондук соту жакын арада Ринат Кирамовдун, Сергей Королёвдун жана Сергей Косьяненконун сот ишине байланыштуу чечимин жарыялайт. Айыптоочунун кандай жаза талап кылары азырынча белгисиз.

Жеке маалымат

Ринат Кирамов

Туулган жылы: 1987 (Москва, Москва облусу)

Кыскача таржымалы: Камакка алынганга чейин веб-сайт жаратуучунун окуусун окуп жаткан. Музыкалык шыгы бар. Альтернативалык жарандык кызматты аткарып, почточу болуп иштеген

Ыйык Китепте жазылгандар тууралуу апасынан билген. Жахабанын Күбөлөрүнүн бири-бирин сүйөрүн, биримдүү экенин көрүп аябай таасирленген. 2001-жылы чөмүлгөн

Келинчеги Галина экөө 2009-жылы баш кошушкан

Ринаттын жубайы Галина менен курулган маек a

Ринатка камакта отурган азыркы учурда баарына чыдаганга эмне жардам берип жатат?

Ринат түрмөдө отурган ар бир ишенимдешибизди атынан айтып тиленгенди максат кылып алган. Кудайга ишенгени үчүн абакта отурган дүйнө жүзүндөгү ишенимдештерибиз тууралуу ай сайын маалымат чогултуп, ага алпарып берип турам. Алардын ар бири жөнүндө майда-чүйдөсүнө чейин айтып, так-айкын тиленгени үчүн жолдошум Жахаба менен ого бетер ынак болуп, өзүнүн кыйынчылыктарына көп көңүл топтобойт. Ошондой эле экөөбүз туруктуу болгонубуздун натыйжасы кандай болорун бири-бирибизге эстетип турабыз. Тагыраак айтканда, туруктуу болгондун аркасында биз башкаларга Жахабанын Күбөлөрү жөнүндө жакшы ойдо калганга жардам берип жатабыз. Жахабанын эгедерлигин да колдоп жатабыз. Бир жолу Ринат мындай сөздөрдү жазып жибериптир: «Душманыбыз бизден канчалык күчтүү болбосун, Жахабанын колдоосу менен баарын жеңебиз. Бирок эркиндикке чыккандын өзү жеңиш эмес, акырына чейин берилген бойдон калсак, мына ошол жеңиш болот».

Ал эми Жахабанын сени колдоп жатканын кантип сезип жатасың?

Ринат дагы бир катында сонун сөздөрдү жазган. Ал: «Мен азыр сага кам көрө албай калдым. Бирок бул милдетти Жахаба өз колуна алды»,— деген. Чын эле ошондой болду. Ушул кыйынчылыктардын баары башталганда эле Жахабанын мага ыйык рухун берип, өзгөчө колдоп жатканын сезгем. Забур 91:1де да мындай деп жазылган: «Эң Жогорку Кудайдын жашыруун жайында жашаган адам Кудурети Күчтүүнүн көлөкөсүнөн жай табат». Мурда ушул аятта айтылган «жашыруун жай» жөнүндө окугам. Бирок так ушул учурда Жахабанын колдоосун мурун болуп көрбөгөндөй деңгээлде сезип жатам. Ушул нерсе мага кайгыга чөгүп кетпей Жахабага толук таянып, акырына чейин чыдаганга күч берип жатат.

Сергей Королёв

Туулган жылы: 1973 (Пенза, Пенза облусу)

Кыскача таржымалы: Фотоаппарат менен сүрөт тартканды, эмерек жасаганды жакшы көрөт

Мурда динди анча жактыра берчү эмес. Бирок Жахабанын Күбөлөрү менен таанышкандан кийин ою өзгөрүп, Жаратканды таанып-билген. 1996-жылы чөмүлгөн

Жубайы Екатерина экөө 2005-жылы баш кошушкан

Дил маек

Азыркы учурда Жахаба менен болгон мамилең эмненин аркасында бекемделип жатат?

Камакта отурганда терс ойлордун чырмап алышына жол бербей коюш оңой эмес экен. Канчалык туруктуу экеним, ишенимим, үмүтүм канчалык бекем экени бир топ эле сыналды десем болот. Мага баарына чыдаганга биринчи кезекте Жахабадан тиленип турганым жардам берип жатат. Асмандагы Атам менен сырдашып, ички сезимдерим менен бөлүшкөнгө эч ким, эч нерсе бөгөт коё албайт. Жахабага ичимдегинин баарын айтып дайыма жолу тиленем. Буга чейин мынчалык көп тиленген учурларым болгон эмес. Исанын Атасы менен түнү бою сүйлөшүп чыккан учурларын эми түшүнүп жатам. Башыман өтүп жаткан азыркы кыйынчылыктардан улам Кудайга толук таянганды үйрөндүм. Камакта отурган азыркы учурумдагы эң чоң пайдасын тийгизген нерсе ушул деп ойлойм.

Сергей Косьяненко

Туулган жылы: 1961 (Елань, Волгоград облусу)

Кыскача таржымалы: Физкультурадан сабак берип иштечү

1983-жылы Ольгага үйлөнгөн. Ыйык Китепте жазылгандардын тарыхий жактан так экенин, пайгамбарлардын сөздөрү кандай айтылса, ошондой аткарылганын билгенде таасирленген. 2002-жылы чөмүлгөн

Сергейдин жубайы Ольга менен курулган маек b

Көңүл чөгөттүккө алдырбаганга эмне жардам берет?

Дайыма пайдалуу иштер менен алектенгенге аракет кылам. Ыйык Китепке негизделген адабияттарды окуйм, Жахабадан тиленип, кайгыга батырган ойлорго алдырбаганга күч беришин сурап турам. Сергей жазган каттарды кайра-кайра окуйм. Ошондой эле ушунун баары бүтүп, Сергей экөөбүз акыры көрүшкөндө кандай болорун элестетем. Ыйык Китептин негизинде чыгарылып жаткан ырларды угуп, ырдап да турам. Бул кадимкидей күч берет.

Ыйык Китептеги кайсы аяттар сага чыдаганга жардам берип жатат?

Мага, өзгөчө, 1 Корунттуктар 10:13төгү: «Кудай... силердин алыңар жеткис азгырыктарга кабылышыңарга жол бербейт»,— деген сөздөр аябай жагат. Башыма келген азыркы кыйынчылыктарды өз күчүм менен көтөрүп кете албайт болчумун. Жахаба мени таштабай, чыдамдуу болгонго жардам берет деп ишенем. Эгер башыбызга ушундай мүшкүл түшсө, демек, аны көтөрө алабыз. Бул нерселер түбөлүккө созула бербейт да, акыры бир күнү баары бүтөт.

Жахабанын ишенимдүү кызматчыларына баш маана болуп берип жатканы кандай гана кайрат берет! Ооба, «анын түбөлүктүү колдору [бизди] колдойт» (Мыйзам 33:27).

Жагдайдын өрчүшү

9-ноябрь, 2021

Кылмыш иши козголгон. Бийлик өкүлдөрү Актюбинск менен Знаменсктеги Жахабанын Күбөлөрүнүн 15 үйүн тинтишкен. Алардын ичинде Кирамовдун, Королёвдун жана Косьяненконун да үйү бар болчу
10-ноябрь, 2021

Сергей Королёвду кармап кетишкен
11-ноябрь, 2021

Ринат Кирамов менен Сергей Косьяненкону кармап кетишкен. Үч ишенимдешибизди тергөө камак жайына камашкан
14-ноябрь, 2022

Сот иши башталган