NKAND’A NZAMBI ZINGU KIA WANTU USOBANGA

Yayindulanga vo Kiakina i Zingu Emvimba

LUSANSU LWA Pawel Pyzara

WINIKINA MU

MVU KAWUTUKA: 1982
NSI: POLÔNIA
DIAMBU: WAVAVANGA TUNDA, WANUANGA FOMO ZANGOLO YO KITUKA NKWA NSOKI

ZINGU KIAME: Ku mbanza yakete ya nsi a Polônia yawutukila, lukufi ye nsi ya Alemanha. Wau vo e mbanz’eto yazungwa yakala ye mfinda, mu luvuvamu yazingilanga. Mase mame batoma kunzolanga, bandonga vo yakala muntu ambote, yatanga sikola zandá yo kala nkwa tunda.

E mpasi zame zayantika vava yayenda kota sikola ya kimfundisi kuna mbanz’a Wrocław (Breslávia). Wau vo kiazinganga diaka yo mase mame ko, yavanga yikundi yambi. Kana una vo yazolanga tala e bale, akundi ame basakisa luzolo lwame muna bale. E buka yazolanga ku mbanza Varsóvia kiatukanga. Kuna nsuk’a lumingu, yalandanga e buka kiaki konso kuna bayendanga budila e bale. Muna nkangalu miami, twanuanga malavu mayingi ma nkolwa, fomo zangolo yo nwana yo wantu a buka yakaka. Yazaya wo vo avo mbakamene kwa mapolisia yadi vunza sikola yatanganga ya kimfundisi, kansi yakivananga mu nsaka zazi kadi yayindulanga vo i mpila ya vilakanena e mpasi zame.

Mono ye akundi ame twayendanga mu nzo za nkembo. Nkumbu miayingi twanwananga mu nzo zazi. Nkumbu miayingi mpe yakangwanga kwa mapolisia, kansi yavanganga mawonso kimana bangiambula, ezak’e ntangwa yafutanga nzimbu. Yayindulanga vo kiakina i zingu emvimba. Kansi, kuna nsi a ntima yazayanga wo vo mambu yavanganga mambi. Muna kuma kiaki, yayendanga ku nzo a nzambi konso kia lumingu muna vuvika e ngindu.

UNA NKAND’A NZAMBI WASOBELA ZINGU KIAME: Muna mvu wa 2004, Mbangi za Yave zole badodela e kielo kiame, yatambulwila mokena yau oma ma Nkand’a Nzambi. Yayantika tokana vava yazaya mana mevavuanga mu kala Nkristu akieleka. Yabakula vo mfwete yambula e fu kia kolwa malavu, nua fomo zangolo yo venga kikundi yo wantu ke belemvokelanga nkanikinu mia Nzambi ko. Yabakula mpe vo mfwete yambula mavangu ma nsoki. Kana una vo i wau, kiayambula vanga mambu mambi ko.

Kansi, mambu masoba mu fuku umosi vava yanuana yo wantu nana. Bambwisa yo kungwanda nkomi ye yinsi vana ntu. Vava yamona vo se ifwa, yasamba kwa Yave: “Undoloka e Yave wau kilemvokelanga nkanikinu miaku ko. Avo mpulukidi va moko ma wantu awaya, ivanga mawonso muna longoka Nkand’a Nzambi ye Mbangi za Yave yo singika e zingu kiame.” Yasivika kikilu kadi kiafwa ko. Muna kuma kiaki, yalungisa o nsilu ame wa longoka Nkand’a Nzambi.

Muna mvu wa 2006, yayenda kuna Inglaterra ye kani dia vava nzimbu kimana yavutuka ku Polônia mu fokola sikola zandá. Vava yalongokanga Nkand’a Nzambi, sono kimosi kiatoma simba o ntim’ame. Paulu wa ntumwa wasoneka vo: “Mbadikidi mpe yawonso se mfwilu muna diambu dia zayi wa Kristu Yesu wa Mfumu ame una usundidi. Muna kuma kiandi, mbembwele yawonso, ibadikilanga yo se mbole, kimana yabaka Kristu.” (Filipi 3:8) Ntumwa Paulu watanga sikola zandá nze mono, nkwa nsoki mpe kakala. (Mavangu 8:3) Kansi wabakula vo vena ye mpila zingu kisundidi o wete, sadila Nzambi yo vanga mawonso mu tanginina Yesu. Vava yabadika e mbandu a Paulu, yamona vo o tanga sikola zandá yo kuyivana muna mavangu ma nsoki ke ditwasanga kiese ko. Yakala ye ziku vo ndenda soba e zingu kiame nze una Paulu kavanga. Muna kuma kiaki, yabaka e nzengo za zingila kuna Inglaterra yo bembola e sikola zandá yatanganga.

Ekolo yalongokanga oma ma Yave, e kikundi kiame yo yandi kiawokelanga. O nsilu andi waloloka awonso bevilukanga o ntima, watoma simba o ntim’ame. (Mavangu 2:38) Vava yafimpa e sono kia 1 Yoane 4:16 kivovanga vo “Nzambi i zola,” yabakula e kuma o Nzambi kemengenanga mavangu ma nsoki.

Yazola kituka mosi muna Mbangi za Yave yo mona kiese bemonanga

Yasivika mpe e fu yambote ya Mbangi za Yave. E fu yau yankwikidisa vo ngwizani bezingilanga ye nkanikinu mia Nkand’a Nzambi. Yazola kituka mosi muna Mbangi za Yave yo mona kiese bemonanga. Vava yasoba e zingu kiame, yavubwa muna mvu wa 2008 yo kituka Mbangi a Yave.

Mono yo Ester tuna ye kiese kia longa Diambu dia Nzambi kwa wantu bevovanga e nding’a Polônia

MPILA YABAKILA E NLUTA: Nkand’a Nzambi wansadisa mu yambula e fu kia loko, kolwa malavu, nua fomo zangolo, zola kwasaka muna bale ye mavangu ma nsoki. Yakituka selo kia Nzambi ona olonganga Diambu dia Nzambi kwa akaka. Yakinu tala e nsaka za bula e bale, kansi kifwasanga diaka ntangwa ayingi ko muna nsaka zazi.

Yakazala yo Ester wa nkaz’ame anzolwa una vo nsambidi a Yave. Tuna ye kiese kia longa Diambu dia Nzambi kwa wantu bevovanga e nding’a Polônia ana bezingilanga kuna Inglaterra. Owau i nkumbu antete muna zingu kiame yamona e kiese kiakieleka. O unu, ngina ye ntona zambote ye zingu kiasikila.