Kuna Puerto Limón yasansukila, i mbanza ivuidi kumu dia masuwa kuna Costa Rica. Mase mame wana nana bawuta, omono i wa nsambwadi. Vava yalungisa mvu nana, o se diame wafwa. Muna kuma kiaki, o ngudi eto yandi mosi watusansa.

E nsaka za beisebol i diambu yatoma zolanga muna zingu kiame. Yazolanga e nsaka zazi tuka muna kileke kiame. Vava yakala toko, yakota muna buka kiampwena kia beisebol. Vava yalungisa mvu 20, muntu mosi wampovesa vo ngienda kota muna buka kiankaka kuna Nicaragua. Wau vo mavimpi ma ngudi ame ke makala mambote ko, diavavanga vo yatoma kunlunga-lunga. Kiazola kwenda zingila kuna Nicaragua ko. Muna kuma kiaki, kiatonda e ngindu zandi ko. Muna mvu walanda, muntu wankaka wampovesa vo ngienda kota muna buka kisunzulanga e nsi ya Costa Rica muna nsaka za beisebol. E matoko ma buka kiaki batoma zaya e nsaka zazi. O nkumbu wau yatonda e ngindu za muntu ndioyo. Yakota muna buka kiaki muna mvu wa 1949 yakuna 1952, nkumbu miayingi twayendanga kuna Cuba, México ye Nicaragua. Yatoma zaya e nsaka za beisebol, jogo 17 yalandakesa lembi vanga kana vilwa wakete. Yayangalalanga vava o nkangu wakazanga e nkumbu ame!

Diankenda vo zingu kia usafu yazolanga. Kanele vo ndumba mosi kaka yakala yandi, yabakanga mpe ndumba zankaka. Malavu mayingi yanuanga. Lumbu kimosi yakolwa, muna lumbu kialanda vava yasikama vana mfulu kiazaya ko kana aweyi yalwakila kuna nzo! Mpanza mpe yatanga.

Ekolo yavanganga mambu ma usafu, ngudi ame wakituka Mbangi a Yave. Wateza kunzayisa mambu ma Nzambi, kansi kalenda ko, e kuma kadi yakivana e mvimba muna nsaka za beisebol. Vava twavanganga e nsaka zazi, avo e ntangw’a dia ifwene, omono kiamonanga nzala ko. E ngindu zame muna nsaka kaka zakalanga. Nsaka za beisebol yatoma zolanga.

Vava yalungisa mvu 29 kulu kwame kwafisuka ekolo yatanga beisebol. Vava o kulu kwasasuka, yayambula e nsaka za  beisebol. Kansi, yayantika longa e nsaka za beisebol muna buka kiakala lukufi ye nzo ame.

Muna mvu wa 1957 yayenda mu lukutakanu lwa mvivu lwa Mbangi za Yave lwavangamena vana fulu kina yatelanga nsaka za beisebol. Ekolo yavuanda, yamona e nswaswani vana vena fu yambote ya Mbangi za Yave, ye fu yambi ya nkangu wayendanga tala e nsaka za beisebol. Mana yamona muna lukutakanu lwa mvivu, mansadisa mu yantika longoka Nkand’a Nzambi ye Mbangi za Yave yo kwenda mu tukutakanu twau.

Yasivika kikilu muna mambu mayingi yalongokanga muna Nkand’a Nzambi. Kasikil’owu, yalongoka vo Yesu wasakula vo mu lumbu yambaninu, alongoki andi besamuna e nsangu zambote za Kintinu kia Nzambi mu nza yawonso. (Matai 24:14) Yalongoka mpe vo Akristu akieleka ke befutwanga nzimbu ko muna salu kia samuna e nsangu zambote. Yesu wavova vo: “Ngovo nutambwidi, ngovo nuvana.”—Matai 10:8.

Ekolo yalongokanga Nkand’a Nzambi, yatezanesanga mana yalongokanga ye mana yamonanga kwa Mbangi za Yave. Yasivikanga e ngolo bevanganga muna samuna e nsangu zambote nza Kintinu kia Nzambi mu nza yawonso. Yamona vo besonganga e fu kia vana kuna mvevo kina Yesu kakanikina Akristu. Muna kuma kiaki, vava yatanga e mbok’a Yesu “Wiza ndandi,” yasonama muna Maku 10:21, yazola kituka Mbangi a Yave.

Mvu miayingi mia vioka, kansi kuna kwa landa yabaka e nzengo. Kasikil’owu, mu mvu miayingi yatanga e mpanza konso lumingu. Kansi, yalongoka muna Nkand’a Nzambi vo, Yave omenganga asambidi a “nzambi a lau” kumosi mpe ye akwa loko. (Yesaya 65:11; Kolosai 3:5) Muna kuma kiaki yayambula ta e mpanza. Muna lumingu lwantete yayambula ta e mpanza, nkumbu ame yavaika vana fulu kiantete kana una vo kiayenda ta mpanza ko muna lumingu lwaluna. O wantu banseva, bankomekena vo yavutukila ta e mpanza, kansi kiatonda ko. Kiazola diaka ta mpanza ko.

Muna lumbu kina yavubwa muna lukutakanu lwa Mbangi za Yave, yawanana ye ntonta zankaka mu kuma kia ‘kiwuntu kiame kiampa.’ (Efeso 4:24) Muna nkokela vava yavutuka kuna hotel, yamona ndumba mosi wakala makangu mame otelamene vana mwelo a suku diame. Wambokela “e Sammy nza twasakana kweto.” Vana vau yamvutula vo, “kizolele ko.” Yansungamesa vo, owau nsiku mia Nkand’a Nzambi ilemvokelanga. (1 Korinto 6:18) Wakaza vo, Adieyi ovovele? Katambulwila ko dina Nkanda Nzambi uvovanga mu kuma kia zumba, wampovesa vo twakwamanana kala kimakangu. Vana vau yakota muna suku diame yo kanga e kielo kimana kalembi kota. O unu, ngina ye kiese kiavova vo tuka yakitukila Mbangi a Yave muna mvu wa 1958, kizolanga vutukila e zingu kiame kia nkulu ko.

Imonanga vo ndenda soneka nkanda mu kuma kia nluta miawonso ibakanga muna lemvokela malongi ma Nkand’a Nzambi. Miankaka muna nluta miami i akundi ambote ngina yau, zingu kiambote ye kiese kiasikila.

Yamu unu kiaki izolanga e nsaka za beisebol, kansi yasoba e ngindu zame. E nsaka za beisebol zantwasila tunda diayingi ye zimbu, kansi mawonso mama mafokoka kwandi. Vo i ngwizani ame yo Nzambi ye mpangi zame ke ilendi fokoka ko yakwele mvu. Muna 1 Yoane 2:17 tutanganga vo: “E nza mu vioka yina ye zolela yandi mpe, kansi ndiona ovanganga luzolo lwa Nzambi, zinga kaka kezinga yakwele mvu.” Owau itoma zolanga Yave wa Nzambi kumosi yo nkangu andi!