Ku mbanz’a Moundsville yawutukila, mbanza yavuvama, kun’esambu dia nkoko Ohio kuna zunga kia Virginia. Mono i mwana w’ezole muna wana yá twawutuka, wau vo tatu muna yeto tu wan’amakala, e nzo eto ya kiese yakala. O mase mame basalanga kwayingi, akwa ziku bakala ye bazolanga akaka. Ke twakala mvwama ko, kansi ke twakondwanga kia dia ko. Wau vo mase mame Mbangi za Yave, bavanga mawonso muna kutulonga e nsiku mia Yave vava twakala aleke.

Kansi, vava yakituka se toko, o ntim’ame wayantika bendomoka yo lembi landa mana yalongwanga. Yayantika katikisa kana vo zingila ngwizani ye nsiku mia Nkand’a Nzambi kiese kikilu ditwasanga. Yayindulanga vo muna vwa kiese kia kieleka mfwete kuyitumina. Ke kolo ko, yayambula kwenda kuna tukutakanu tw’Akristu. Mpangi zame zole mpe bangikama muna ukolami wame. Mase meto bavanga mawonso muna kutusadisa, kansi twabembola lusadisu lwau.

Kiazaya wo ko vo e zingu kia kuyitumina yavavanga mpasi zayingi kikuntwasila. Lumbu kimosi, vava yavutuka kuna nzo, o nkundi ame a sikola wampana e fomo. Yatambula yo. Tuka muna lumbu kiakina, yayantika kuyivana muna mavangu mawonso mambi. Kuna kwalanda, yayantika nua malavu ma nkolwa ye fomo zangolo yo kuyisia mu mavangu ma zumba. Mu mvu miayingi mialanda, yawokesa nua fomo zangolo yo kituka se mbundu a fu kiaki. Muna kuma kiaki, yayantika teka fomo muna lungisa e zolela yame.

E ntona zame zantumbanga ntangwa zawonso mu kuma kia zingu kiambi yanatanga, kansi yavanga mawonso muna lembi lemvokela e ntona zame. Yayindulanga vo, e maza matiamukini, ke malandi kukwa diaka ko. Kanele vo fu kia kwenda mu nkinzi yakala kiau, yamonanga mpe kinsona yo kendalala. Ezak’e ntangwa, yayindulanga e mpila mase ngina mau ye zingu kiambote benatanga yo kukiyuvula, aweyi ndwakidi mu tezo kiaki.

Yadimbula vuvu vo ndenda viluka o ntima yo vang’o wete. Muna mvu  a 2000, mase mame bambokela kimana ngienda lungana yau kuna lukutakanu lwa mvivu lwa Mbangi za Yave. Kana una vo kiakala ye luzolo ko, yayenda yau entwadi. E mpangi zame z’akolami diau adimosi mpe bavanga.

Ekolo yakala muna lukutakanu lwa mvivu, yasungamena vo yateka kala vana fulu kiakina mu mvu wavioka vava yayenda tala makinu ma rock. E nswaswani yamona yasimba o ntim’ame. Muna lumbu kia makinu ma rock, e fulu kiakina kiazala kiakala ye titi ye mwisi wa fomo. Ndonga mun’awana bayenda ko, ke bakala akwa ngemba ko, e miziki mpe ke miakala miambote ko. Kansi, muna lukutakanu lwa mvivu, yakala kumosi ye wantu a kiese ana batoma kuntambula kana una vo tuka kolo ke twamonananga diaka ko. E fulu kiavelela kiakala ye malongi mpe mambote. Vava yamona nluta miambote mitukanga muna malongi ma Nkand’a Nzambi, yakiyuvula: Ekuma yabembolwela malongi mama!—Yesaya 48:17, 18.

Vava kiafokoka lukutakanu lwa mvivu, vana vau yabaka nzengo zavutuka muna nkutakani ya Kikristu. Ampangi zame mpe, mana bamona yo wá kuna lukutakanu lwa mvivu, mabafila mu vutuka muna nkutakani. Yeto tatu twayantika longoka Nkand’a Nzambi.

E sono kia Nkand’a Nzambi kiatoma simba o ntim’ame i Yakobo 4:8 kivovanga vo: “Nufinama Nzambi, oyandi mpe okunufinama.” Yabakula vo, avo nzolele finama Nzambi, mfwete velelesa e zingu kiame. Mfwete soba mambu mayingi mu zingu kiame, nze yambula nua fomo, kolwa malavu ye fomo zangolo.—2 Korinto 7:1.

Yayambula akundi awonso a nza yakala yau yo vanga kikundi ye asambidi a Yave. Mpangi walongokanga yame una vo nkuluntu, lusadisu lwayingi kampana. Nkumbu miayingi wambokelanga muna telefone yo kunkingula mu zaya mavimpi mame. Owau, yandi una se mosi muna akundi ame azolwa.

Muna mvu a 2001, kumosi ye mpangi zame zole twakiyekola yo vubwa. Ekwe kiese bamona mase mame ye mbunzi ame vava yeto awonso twayikakiana diaka muna sambila Yave.

Yayindulanga vo e nsiku mia Nkand’a Nzambi miampasi, kansi owau yibadikilanga mio vo ke miampasi ko kansi mia lutaninu. E nsiku mia Nkand’a Nzambi miansadisa mu yambula nua yo teka fomo zangolo yo kituka se muntu ambote.

Owau, ngina y’elau diakala mu kintwadi kia wan’angudi besambilanga Yave omu nza yawonso. Wantu awaya bezolanga muntu yo nkw’andi yo sadila Nzambi entwadi. (Yoane 13:34, 35) Nsambu zayingi ivwanga muna kintwadi kiaki, yasompana yo Adrianne wa nzolw’ame ona itoma zolanga kikilu. Kiese kiayingi tumonanga muna sadila Mvangi eto kumosi.

Vana fulu kia kuyivana mu zingu kia mavwa, ikuyivananga mu salu kia ntangwa ke ntangwa kia longa wantu e ludi mu kuma kia Nzambi kimana yau mpe bavwa e nluta mia malongi ma Nkand’a Nzambi. Muna salu yawonso yasadidinge, ekiaki i salu kilutidi kumpana e kiese. Ndenda vova ye ziku kiawonso vo o Nkand’a Nzambi wasoba e zingu kiame. Owau, yasolola luvevoko lwakieleka.