Kaniaka yina baguvernema kesalaka kele diambu yina kesalamaka na yinza ya mvimba mpe yakena kunatina bantu mpasi. a Na kifuani, na ntangu ya maladi ya yimbi ya COVID-19, bafundaka bamfumu ya Leta ya babuala mingi ti bakukikumisaka bamvuama na kusadilaka mbongo yina tindamaka samu na kusadisa bantu yina kutanaka na maladi ya COVID-19. Kaniaka ya mutindu yina salaka ti bantu mingi bika baka lusadusu ya munganga yina bavuandaka na yau nsatu, yau salaka ti bantu mingi niokuama mpe bakufua.

 Mambu ya mpasi yina kaniaka yina baguvernema kebimisaka kele mingi. David Cameron, yina vuandaka Premier ministre na buala ya Grande Bretagne, yandi tubaka: “Kaniaka kele lokola ntambu ya nene yina babuala ya yinza ya mvimba kele ya kukangama na yau.”

 Kasi, beto lenda kukindimisa ti ntama mingi ve kaniaka nionso ya baguvernema kemanisa. Samu na yinki? Tala mambu yina Nzambi kesala, na kutadila Biblia.

 Biblia kele na bampova yayi ya Nzambi: ‘Samu munu, Yehova, munu kezolaka lunungu; Munu keyinaka kimuyibi mpe kukondua lunungu.’ b (Yezaya 61:8) Ntangu bantu kena kuniokuama samu na kaniaka yina bantu yankaka kesalaka, Nzambi kezabaka yau. (Bingana 14:31) Yandi melaka ti: ‘Lokola bakena kuniokola bantu yina kena kumona mpasi, . . . Munu ketelema samu na kusala diambu.’—Nkunga 12:5.

 Yinki Nzambi kesala? Yandi kebongisa ve baguvernema ya bubu yayi, kasi yandi kekatula yau, mpe yandi ketula guvernema na yandi ya dizulu yina bamebokidila “Kimfumu ya Nzambi.” (Marko 1:14, 15; Matayo 6:10) Biblia metuba: ‘Nzambi ya dizulu ketula kimfumu mosi yina . . . kebebisa mpe yakesukisa bimfumu yango nionso [yankaka], mpe yau mosi kebikana mvimbamvimba.’ (Daniele 2:44) Na mutindu yina nde Nzambi kesukisa kaniaka yina beto kena kumona bubu yayi.

 Yinki mutindu beto mezaba ti guvernema ya Kimfumu ya Nzambi kesala kuma ve na kaniaka? Beto tadila mambu yayi melanda.

1.  1. Kilendo na yau. Kilendo ya Kimfumu yango mekatuka na Nzambi Nkua-ngolo-Nionso.—Kusonga 11:15.

    Samu na yinki yakele na mfunu?: Samu baguvernema ya bantu sala, baketudilaka mbongo ya bantu yina bakena kuyadila ntima. Yau ketindaka bau na kaniaka, na kuyiba, mpe na kuvuna bantu. Kasi, samu na Kimfumu ya Nzambi, Nzambi Nkua-ngolo-Nionso kepesaka yau maboko, na yau yakevuanda ntangu nionso na mitindu ya kukokisa bansatu ya bantu yina yakeyadila.—Nkunga 145:16.

2.  2. Mfumu na yau. Nzambi ponaka Yesu Klisto lokola N’yadi ya Kimfumu na yandi.—Daniele 7:13, 14.

    Samu na yinki yakele na mfunu?: Ata ban’yadi ya mbote ya bimfumu ya ntoto lenda bika nzila na mambu ya yimbi. (Longi 7:20) Nzokande, Yesu monisaka ti balenda tinda yandi ve na kusala mambu ya yimbi. (Matayo 4:8-11) Diaka, nzola samu na bantu yina yandi keyadila ketinda yandi yandi sala mambu, yandi kesepela bavuanda mbote.—Nkunga 72:12-14.

3.  3. Bansiku na yau. Bansiku ya Kimfumu ya Nzambi kele ya kukoka, ata mpe samu na mambote ya bantu.—Nkunga 19:7, 8.

    Samu na yinki yakele na mfunu?: Mbala mingi bansiku ya bantu kevuandaka mpasi, kilo, to bakezitisaka yau ve, yau kebimisaka kaniaka. Nzokande, bansiku ya Nzambi kele pete mpe samu na mambote ya bantu. (Yezaya 48:17, 18) Diaka, bansiku yango ketadilaka kaka ve mambu yina bantu fueti sala, kasi mpe makanisi ya bantu. (Matayo 22:37, 39) Mpe lokola Nzambi ketangaka bantima, na ntima ya kiadi nionso yandi lenda sala ti bantu sadila bansiku yango.—Yeremia 17:10.

 Beto melomba nge nge longuka bansilulu ya Biblia yina metadila luzingu na bilumbu kena kuiza na yinsi ya lutuadusu ya guvernema yina mekondua kaniaka.

•   Tanga disolo “Bokonzi ya Nzambe—Guvɛrnema oyo ezangi kanyaka” samu na kulonguka bamfunu tatu yina kesala ti Kimfumu ya Nzambi bika kuma na kaniaka.

•   Tala video Bokonzi ya Nzambe ezali nini? samu na kuzaba mambu yankaka yina metadila guvernema ya Nzambi mpe mambu yina yakesala na ntoto.

•   Meka ndongokolo na beto ya Biblia ya ofele samu na kumona mutindu nge lenda baka mambote na bansilulu ya Biblia.