Samu “nsangu ya mbote” samunua na mutindu mebonga na “bantu ya makanda yonso, ti ya bandinga yonso, ti ya bansi yonso,” beto kena kubimisa mikanda na bandinga kuluta 750. (Kusonga 14:6) Yinki mutindu beto kesalaka kisalu ya nene mutindu yina? Beto ke salaka yau na lusadisu ya kimvuka ya bansoniki yina kele na ntoto ya mvimba mpe kimvuka ya bambangudi ya luzolo—bau nionso kele Bambangi ya Yehowa.

Yau kesonamaka ntete na Kingelesi. Bampangi ya Kimvuka ya Ntuadisi ketuadisaka kisalu ya Departema ya Bansoniki na biro ya nene ya Bambangi ya Yehova. Departema yango ketadilaka kisalu ya bansoniki yina kele na Biro ya nene mpe babiro ya bafiliale yankaka. Lokola bansoniki ya beto kele bantu ya babuala ya mutindu na mutindu, baketubilaka mimesano ya mutindu na mutindu, mpe yau kesalaka ti mikanda na beto yangidika bantu ya yinza mvimba.

Na manima, yau ketindamaka na bambangudi. Na manima ya kusonika disolo mosi, bau kebongisaka yau diaka mpe, kana yamendimama, yaketindamaka na baekipi ya bambangudi ya yinza ya mvimba na nzila ya Internet. Bampangi yango kebangulaka disolo yango, ketalaka na dikebi mpenza kana bangindu yango mebangulua mbote, mpe na nsuka, bau ketangaka yau samu na kumona kana yau mewizana mbote na bansiku ya ndinga. Bambangudi yango kesalaka nionso bapona ‘bampova ya sikisiki ya kedika’ samu babimisa mpenza ngindu ya mvimba ya Kingelesi na ndinga yina bau kena kubangula.​—Longi 12:10.

Baordinatere kesadisaka samu kisalu kuenda malumalu. Ordinatere lenda baka ve kisika ya bansoniki to ya bambangudi. Nzokande, kisalu ya bau lenda salama malumalu kana bau kena kusadila badiksionere, bima ya kusosilasosila mpe bima ya kusadila yankaka yina kele na ordinatere. Bambangi ya Yehova mebimisaka programi mosi ya ordinatere mebokudulua MEPS (Système électronique d’édition multilingue), yina kesadisaka samu na kubongisa masonukua mpe bafoto na bandinga mingi samu yau bimisama na imprimérie.

Samu na yinki beto kesalaka ngolo mutindu yina, ata samu na bandinga yina ketubamaka kaka na bantu fioti? Samu luzolo ya Yehova kele ti “bantu ya mutindu nionso bavuka mpe babaka nzayilu ya sikisiki ya kedika.”​—1 Timoteo 2:3, 4.

• Yinki mutindu mikanda ya beto kesonaminaka?

• Samu na yinki beto kebangulaka mikanda ya beto na bandinga mingi mutindu yayi?