Biblia samunaka ti na manima ya lufua ya Klisto, banlongi ya luvunu kebima na kati ya baklisto ya ntete mpe bakebebisa malongi ya kedika. (Bisalu 20:29, 30) Na manima, yau salamaka mpenza mutindu yina. Banlongi yango ya luvunu basangisaka malongi ya Yesu na bangindu ya bapakano, mpe yau bimisaka buklisto ya luvunu. (2 Timoteo 4:3, 4) Kasi bubu yayi, yinki mutindu beto lenda mpenza kuzaba yina Biblia kelongaka?

Ntangu fuanaka samu Yehova monisa kedika. Yehova samunaka ti na ‘ntangu ya nsuka, nzayilu ya kedika kekuma mingi.’ (Daniele 12:4) Na mvula 1870, mua kimvuka ya bantu yina vuandaka kusosa kuzaba kedika bamonaka ti malongi mingi ya mabundu katukaka na Biblia ve. Yau yina babandaka kusosa kuzaba mutindu malongi ya Biblia vuandilaka mpenza na ebandeli, mpe Yehova sadisaka bau babakusa mfunu ya Masonukua.

Bantu yina longukaka Biblia mbotembote na ntima mosi. Banlonguki yina ya luvema basadilaka mutindu mosi ya kulonguka Biblia yina beto diaka kesadilaka bubu yayi. Bau vuandaka longuka Biblia dilongi mosimosi. Kana babakusa ve dilongi mosi ya Biblia, bau vuandaka tadila baverse yankaka samu na kubakusa mbangudulu na yau. Kana bau nionso mendima ti mbangudulu yina bamebaka yakele na nguizani na bitini yankaka ya Biblia, bavuandaka sonika yau. Lokola bau vuandaka bika Biblia yakikubangula yau mosi, bakuizaka zaba kedika metala nkumbu ya Nzambi mpe Kimfumu na yandi, luzolo na yandi samu na bantu mpe ntoto, kedika samu na bantu ya kufua mpe kivuvu ya futumukunu. Nzayilu yina babakaka na kusosasosa na bau yakatulaka bau na kinanga ya bindimeli mpe bisalu mingi ya luvunu.​—Yoane 8:31, 32.

Na 1879, Banlonguki ya Biblia bakusaka ti ntangu fuanaka samu na kusamuna kedika na yinza mvimba. Yau yina na mvula yango babimisaka mukanda Nkengidi Yau Ketubilaka Kimfumu ya Yehova, yina beto kebimisaka tii bubu yayi. Bubu yayi, beto kena kuzabisa kedika ya Biblia na babuala kuluta 239 mpe na bandinga kuluta 700. Nzayilu ya kedika mesalaka kuma ntete mingi mutindu yayi ve!

• Yinki kuminaka malongi ya kedika ya Biblia na manima ya lufua ya Klisto?

• Yinki sadisaka beto beto mona diaka kedika ya Mpova ya Nzambi?