အဆိ​ကတၢၢ်​န့ၣ် တၢ်အၢ​တၢ်သီ​စးထီၣ်​ဝဲ​ဖဲ မုၣ်ကီၤလံၢ်​ကတိၤ​လီတၢ်​အခါ​လီၤ. လၢ​အ​ခီၣ်ထံး​န့ၣ် မုၣ်ကီၤလံၢ်​မ့ၢ်​မူခိၣ်​ကလူး​လၢ အလၢ​အပှဲၤ​တဂၤ​ဘၣ်ဆၣ် “တ​ဆၢထၢၣ်​ဘၣ်​လၢ တၢ်မ့ၢ်​တၢ်တီ​အ​ပူၤ​ဘၣ်.” (ယိၤဟၣ် ၈:၄၄) အဝဲ​သးလီဝဲ တၢ်​ဘူၣ်ထီၣ်​ဘါထီၣ်​လၢ ယွၤ​ကြၢး​ဒိးန့ၢ်​ဘၣ်​ဝဲ​ထဲ​တဂၤဧိၤ​န့ၣ်​လီၤ. မုၣ်ကီၤလံၢ်​လီန့ၢ် ပိာ်မုၣ်​အဆိ​ကတၢၢ်​နီၢ်​အံၣ်အု​ဒီး ကွဲန့ၢ်​လွဲန့ၢ်​အီၤ​လၢ က​ဒိကနၣ်​အီၤ​လၢ​ယွၤ​အလီၢ်​န့ၣ်​လီၤ. ဒ်​နီၢ်​အံၣ်အု တ​ဒိကနၣ် ယွၤ​အ​ကလုၢ်​အသိး​န့ၣ် စီၤ​အၤဒၣ်​တ​ဒိကနၣ်​စ့ၢ်ကီး​ဘၣ်. စီၤ​အၤဒၣ်​အ​တၢ်​ဃုထၢ​အံၤ ဒုးအိၣ်​ထီၣ်​တၢ်နး​တၢ်ဖှီၣ်​ဒီး တၢ်သံ​လီၤ.—ဖး ၁ မိၤၡ့ ၃:၁–၆, ၁၉ တက့ၢ်.

 ကစၢ်​ယွၤ​အိၣ်ဒီး​တၢ်ခွဲး တၢ်ယာ်​လၢ​က​ပၢတၢ် ဘၣ်ဆၣ်​မုၣ်ကီၤလံၢ်​ပူထီၣ်ဝဲ​တၢ်အံၤ ဖဲ​ဟ့ၣ်ကူၣ်​ဝဲ​နီၢ်​အံၣ်အု ဒ်သိး​အ​သု​တ​ဒိကနၣ် ယွၤ​အ​ကလုၢ်​တဂ့ၤ​အဆၢ​ကတီၢ်​န့ၣ်​လီၤ. ပှၤ​ဟီၣ်ခိၣ်​ဖိ​အါတက့ၢ် ပၣ်ဃုာ်​လၢ မုၣ်ကီၤလံၢ်​အ​အိၣ်ဒီး တ​တူၢ်လိာ်ဝဲ​ယွၤ​ဒ် အဝဲသ့ၣ်​အ​တၢ်ပၢ​ကစၢ်​လၢၤဘၣ်. လၢတၢ်န့ၣ်​အဃိ မုၣ်ကီၤလံၢ်​ကဲထီၣ် “ဟီၣ်ခိၣ်​အခိၣ်” န့ၣ်​လီၤ.—ဖး ယိၤဟၣ် ၁၄:၃၀; ၁ ယိၤဟၣ် ၅:၁၉ တက့ၢ်.

 ယွၤ​အ​တၢ်ဘၣ်တ့​ခဲလၢာ်​န့ၣ် လၢ​ဝဲ​ပှဲၤဝဲ​လီၤ. လၢတၢ်န့ၣ်​အဃိ ပှၤ​ဟီၣ်ခိၣ်​ဖိ​ဒီး မူခိၣ်​ကလူး​တဖၣ်​လၢ​ကစၢ်​ယွၤ​တ့လီၤဝဲ​န့ၣ် မ့ၢ်​အဲၣ်ဒိး ဒိကနၣ်​ကစၢ်​ယွၤ​အ​ကလုၢ်​န့ၣ် ဒိကနၣ်​ဝဲ​သ့​လီၤ. (၅ မိၤၡ့ ၃၂:၄, ၅) ကစၢ်​ယွၤ​တ့လီၤ​ပှၤ​ဃုာ်ဒီး​တၢ်သဘျ့​ဒ်သိး ပ​က​ဃုထၢ​လၢ​ပ​က​မၤ​တၢ်ဂ့ၤ မ့တမ့ၢ် တၢ်အၢ​န့ၣ်​လီၤ. တၢ်သဘျ့​အံၤ ဟ့ၣ်​ပှၤ​တၢ်ခွဲး​တၢ်ယာ်​လၢ ပ​က​ပာ်ဖျါ​ထီၣ်​ပ​တၢ်အဲၣ်​ယွၤ​န့ၣ်​လီၤ.—ဖး ယၤကိာ် ၁:၁၃–၁၅; ၁ ယိၤဟၣ် ၅:၃ တက့ၢ်.

 ကစၢ်​ယွၤ​အိၣ်ဒီး တၢ်ခွဲး​တၢ်ယာ်​လၢ​က​ပၢတၢ်​ဘၣ်ဆၣ် စးထီၣ်​လၢ ဧ့ၤဒ့ၣ်​ပူၤ​လံၤ​လံၤ​န့ၣ် ဘၣ်​မနုၤ​အဃိ ယဟိဝၤ​ယွၤ​ဟ့ၣ်​ဝဲ ပှၤပူထီၣ်တၢ်​တဖၣ်​အံၤ​အခွဲး​လဲၣ်. မ့ၢ်​ဒ်သိး​က​ပာ်ဖျါ​ထီၣ်ဝဲ​လၢ တၢ်ပၢ​တၢ်ပြး​တခါဂ့ၤ​တခါဂ့ၤ မ့ၢ်​တ​ဟဲ​လၢ​ယွၤ​န့ၣ် တ​ကဲဘျုး​လၢ ပှၤ​ဟီၣ်ခိၣ်​ဖိ​အဂီၢ်​ဘၣ်​လီၤ. (စံၣ်တဲၤ​တဲလီၤ ၇:၂၉; ၈:၉) ဒီး​ပှၤကညီ​အ​တၢ်စံၣ်စိၤတဲစိၤ လၢ​အ​နံၣ် ၆,၀၀ဝ အတီၢ်ပူၤ​အံၤ ပာ်ဖျါ ထီၣ်​တၢ်​အံၤန့ၣ်​လီၤ. ပှၤ​ဟီၣ်ခိၣ်​ဖိ​အ​တၢ်ပၢ​တၢ်ပြး​တဖၣ် မၤ​ဟါမၢ်ကွံာ် ဝဲ​တၢ်ဒုး​တၢ်ယၤ, ကွီၢ်မ့ၣ်, တၢ်​တတီ​တလိၤ ဒီး​တၢ်ဆူး​တၢ်ဆါ​တ​န့ၢ် လၢ​လၢပှဲၤပှဲၤ​ဘၣ်.—ဖး ယံးရမံယၤ ၁၀:၂၃; ရိမ့ၤ ၉:၁၇ တက့ၢ်.

 ပ​မ့ၢ်​ထိၣ်သတြီၤ​ကွၢ် ပှၤ​ဟီၣ်ခိၣ်​ဖိ​အ​တၢ်ပၢ​ဒီး​ကစၢ်​ယွၤ​အ​တၢ်ပၢ​န့ၣ် ပှၤလၢ​အ​တူၢ်လိာ် ယွၤ​အ​တၢ်ပၢ​န့ၣ်​ဒိးန့ၢ်​ဘၣ်​ဝဲ တၢ်​အဘျုး​အဖှိၣ်​အါမး​လီၤ. (ယၡါယၤ ၄၈:၁၇, ၁၈) တ​ယံာ်လၢၤဘၣ်​ဒီး ယဟိဝၤ​ယွၤ​က​မၤ​ကတၢၢ်​ကွံာ် ပှၤ​ဟီၣ်ခိၣ်​ဖိ​အ​တၢ်ပၢ​တၢ်ပြး​ခဲလၢာ်​လီၤ. ထဲဒၣ်​ပှၤလၢ​အ​ဃုထၢ​လၢ က​ဒိးပၢ​အသး​လၢ ယွၤ​အ​တၢ်ပၢ​အ​ဖီလာ်​န့ၣ် က​အိၣ်မူ​ဘၣ်​လၢ ဟီၣ်ခိၣ်​ချၢ​လီၤ.—ယၡါယၤ ၁၁:၉.—ဖး ဒၤနံးယ့လး ၂:၄၄ တက့ၢ်.

 ကွၢ်​တၢ်ဂီၤမူ​လၢ​အမ့ၢ် ဘၣ်​မနုၤ​အဃိ ယွၤ​ပျဲ​တၢ်နး​တၢ်ဖှီၣ်​အခွဲး​လဲၣ်

 မုၣ်ကီၤလံၢ်​စံး​ဝဲ​လၢ ပှၤ​ဟီၣ်ခိၣ်​ဖိ​တဖၣ်​ဘူၣ်ထီၣ်​ဘါထီၣ် ယဟိဝၤ​ယွၤ​လၢ အ​နီၢ်ကစၢ်​အဘျုး​အဂီၢ်​လီၤ. မ့ၢ်​န​အဲၣ်ဒိး​ပာ်ဖျါ​ထီၣ်​လၢ တၢ်ကတိၤ​အံၤန့ၣ် မ့ၢ်​တၢ်ကတိၤ​လၢ​အ​ကမၣ်​ဧါ. န​ပာ်ဖျါ​ထီၣ်​သ့ဝဲ​လီၤ. ခီဖျိ​လၢ​ယွၤ​အ​တၢ်သးစူၤ​အဃိ ပ​အိၣ်ဒီး​တၢ်ခွဲး​တၢ်ယာ်​လၢ ပ​က​ပာ်ဖျါ​ထီၣ် မ့ၢ်​ပ​ဘၣ်သူၣ်​ဘၣ်သး ယွၤ​အ​တၢ်ပၢ​ဧါ မ့တမ့ၢ် ပှၤ​ဟီၣ်ခိၣ်​ဖိ​အ​တၢ်ပၢ​ဧါ​န့ၣ်​လီၤ. ပ​ပာ်ဖျါ​ထီၣ်​ပ​တၢ်​ဃုထၢ​ခီဖျိ​လၢ ပ​တၢ်အိၣ်မူ​လုၢ်လၢ်​သကဲာ်ပဝး​လီၤ.—ဖး ယိၤဘး ၁:၈–၁၂; ကတိၤဒိ ၂၇:၁၁ တက့ၢ်.

 ပ​ဃုထၢ​ယွၤ​ဒ် ပ​တၢ်ပၢ​ကစၢ်​အသိး​သ့​ခီဖျိ​လၢ ပ​ဃု​သ့ၣ်ညါ​တၢ်ဘူၣ်​တၢ်ဘါ အမ့ၢ်​အတီ​လၢ သန့ၤ​ထီၣ်​အသး​လၢ ယွၤ​အ​ကလုၢ်​ကထါ လံာ်စီဆှံ​အ​ပူၤ​ဒီး ပ​ပၣ်ဃုာ်​လၢ​တၢ်ဘူၣ်​တၢ်ဘါ​အံၤ အ​ပူၤ​န့ၣ်​လီၤ. (ယိၤဟၣ် ၄:၂၃) ပ​ဂ့ၢ်လိာ်​မုၣ်ကီၤလံၢ်​လၢ ပ​တၢ်ပၢ​ကစၢ်​သ့​ခီဖျိ ပ​တ​မၤ​ဘၣ်ဃး​ပ​သး​ဒီး ထံဂ့ၢ်ကီၢ်ဂ့ၢ် ဒီး​တၢ်ဒုး​တၢ်ယၤ​ဒ် ယ့ၣ်ၡူး​အသိး​န့ၣ်​လီၤ.—ဖး ယိၤဟၣ် ၁၇:၁၄ တက့ၢ်.

 မုၣ်ကီၤလံၢ်​သူဝဲ​အစိကမီၤ​လၢ က​မၤ​ဒိၣ်ထီၣ်​ထီထီၣ်​လုၢ်လၢ်​လၢ အအၢ​အသီ​န့ၣ်​လီၤ. ဖဲ​ပ​ဟးဆှဲး လုၢ်လၢ်​ဒ်အံၤ​အခါ တံၤသကိး​ဒီး​ဘူးတံၢ်​တနီၤ​န့ၣ် က​ဒုၣ်ဒွဲၣ်​စံးအၢ​ပှၤ မ့တမ့ၢ်​က​ထီဒါ​ပှၤလီၤ. (၁ ပ့းတရူး ၄:၃, ၄) လၢတၢ်န့ၣ်​အဃိ ပ​က​ဘၣ်​ဆၢတဲာ်​လီၤ​ပ​သးလီၤ. မ့ၢ်​ပ​က​ရ့​ဒီး​ပှၤလၢ အ​အဲၣ်​ယွၤ​နီၢ်နီၢ်​ဧါ. ယွၤ​အ​တၢ်သိၣ်​တၢ်သီ​လၢ​အပှဲၤ​ဒီး တၢ်ကူၣ်သ့​ဒီး​တၢ်အဲၣ်​န့ၣ် မ့ၢ်​ပ​ဒိကနၣ်​စ့ၢ်ကီး​ဧါ. ပ​မ့ၢ်​မၤ​ဒ်​န့ၣ်​န့ၣ် ပ​ပာ်ဖျါ​ထီၣ်​လၢ မုၣ်ကီၤလံၢ်​အ​တၢ်ကတိၤ​တဖၣ်​န့ၣ်​မ့ၢ်​တၢ်​လၢ​အ​ကမၣ်​န့ၣ်​လီၤ.—ဖး ၁ ကရံၣ်သူး ၆:၉, ၁၀; ၁၅:၃၃ တက့ၢ်.

 မ့ၢ်​လၢ​ကစၢ်​ယွၤ​အဲၣ် ပှၤ​ဟီၣ်ခိၣ်​ဖိ​အဃိ ပ​သ့ၣ်ညါ​သပှၢ်တၢၢ်​လၢ ကစၢ်​က​မၤ​ကတၢၢ်​ကွံာ်ဝဲ တၢ်အၢ​တၢ်သီ ဒီး​တၢ်နး​တၢ်ဖှီၣ်​လီၤ. ပှၤလၢ​ပာ်ဖျါ​ထီၣ်​တၢ်နာ် ခီဖျိ​လၢ​အ​တၢ်မၤ​န့ၣ် က​အိၣ်မူ​ဘၣ်​လီၤထူ​လီၤယိာ် လၢ​ဟီၣ်ခိၣ်​ချၢ​ပှဲၤ​ဒီး​တၢ်သးခု​လီၤ.—ဖး ယိၤဟၣ် ၃:၁၆ တက့ၢ်.