တၢ်မၤလိ ၁၀၃
“နဘီနမုၢ်န့ၣ် မ်အဟဲတက့ၢ်”
ယဟိဝၤယွၤ အၢၣ်လီၤအီလီၤဝဲလၢ– ‘ကယဲၢ်တၢ်ဟီၣ်တၢ်ယၢၤ, တၢ်သူၣ်အုးသးအုး, တၢ်ဆူးတၢ်ဆါ ဒီးတၢ်သံန့ၣ် ကလီၤမၢ်ကွံာ်ခဲလၢာ်လီၤ. ယကထွါကွံာ်ပှၤမဲာ်ထံခဲလၢာ် ဒီးကယဲၢ်တၢ်အၢတၢ်သီ ခဲလၢာ်န့ၣ် ကလီၤမၢ်ကွံာ်ဝဲလီၤ.’
ယဟိဝၤယွၤ ပာ်လီၤနီၢ်အံၣ်အုဒီးစီၤအၤဒၣ်လၢ ဧ့ၤဒ့ၣ်တၤသၣ်အလီၢ်လီၤ. အဝဲသ့ၣ် အတၢ်အိၣ်မူပှဲၤဝဲဒီး တၢ်မုာ်တၢ်ခုၣ် ဒီးတၢ်သူၣ်ဖှံသးညီန့ၣ်လီၤ. အဝဲသ့ၣ်ဘူၣ်ထီၣ်ဘါထီၣ်ဘၣ် ယဟိဝၤယွၤ ဒီးကစၢ်ယွၤတိာ်ပာ်ဝဲလၢ အဝဲသ့ၣ်အဖိအလံၤ ကအိၣ်ပှဲၤလၢဟီၣ်ခိၣ်ဒီဘ့ၣ်န့ၣ်လီၤ. နီၢ်အံၣ်အုဒီးစီၤအၤဒၣ် တဒိကနၣ် ယဟိဝၤယွၤအကလုၢ် သနာ်က့ ကစၢ်ယွၤအတၢ်တိာ်ပာ်န့ၣ် ကဟဲလၢထီၣ်ပှဲၤထီၣ်ဝဲလီၤ. လၢလံာ်အံၤအပူၤ ပထံၣ်ဘၣ်လၢကယဲၢ်တၢ်လၢ ကစၢ်ယွၤအၢၣ်လီၤအီလီၤဝဲန့ၣ် ဟဲလၢထီၣ်ပှဲၤထီၣ်ဝဲလီၤ. ဒ်ကစၢ်ယွၤအၢၣ်လီၤပာ် စီၤအၤဘြၤဟၣ်အသိး ပှၤဟီၣ်ခိၣ်ဖိ ကဒိးန့ၢ်ဘၣ်တၢ်ဆိၣ်ဂ့ၤခီဖျိလၢ ယွၤအဘီအမုၢ်အဃိလီၤ.
တယံာ်လၢၤဘၣ်န့ၣ် မုၣ်ကီၤလံၢ်, အတၢ်ဝံတၢ်နါတဖၣ် ဒီးပှၤအၢပှၤသီန့ၣ် ကလီၤမၢ်ကွံာ်ဝဲခဲလၢာ်လီၤ. ပှၤကိးဂၤဒဲးန့ၣ် ကဘူၣ်ထီၣ်ဘါထီၣ် ယဟိဝၤယွၤလီၤ. ပတတူၢ်ဘၣ်တၢ်ဆူးတၢ်ဆါဒီး
ပတသံလၢၤဘၣ်. လၢတၢ်န့ၣ်အလီၢ် ကိးနံၤဒဲးဖဲပမံဂဲၤဆၢထၢၣ်အခါ ပကပှဲၤဒီးတၢ်ဂံၢ်တၢ်ဘါ ဒီးတၢ်သူၣ်ခုသးခုလၢ ပတၢ်အိၣ်မူအပူၤလီၤ. ဟီၣ်ခိၣ်ဒီဘ့ၣ်ကကဲထီၣ် ပၤရဒံစူးလီၤ. ပှၤခဲလၢာ် ကအီၣ်ဘၣ်တၢ်အီၣ်တၢ်အီလၢအဂ့ၤ ဒီးအဝဲသ့ၣ်ကအိၣ်ဘၣ်ဝဲ မုာ်မုာ်ခုၣ်ခုၣ်လီၤ. ပှၤဟီၣ်ခိၣ်ဖိတဖၣ် ကမၤတၢ်ဂ့ၤလီၤ. ဒီးအဝဲသ့ၣ် အသူၣ်တအၢသးတသီလၢၤဘၣ် ဒီးတမၤအၢမၤသီတၢ်လၢၤဘၣ်.ဖဲယဟိဝၤယွၤ မၤဂဲၤဆၢထၢၣ်သမူထီၣ်က့ၤပှၤသံအခါ ကလီၤသးခုဝဲထဲလဲၣ်. ပကထံၣ်ဘၣ်ပှၤလၢပျၢၤတဖၣ် ဒ်သိးဒီးစီၤဟ့းဘ့းလး, စီၤနိအၤ, စီၤအၤဘြၤဟၣ်, နီၢ်စၤရါ, စီၤမိၤၡ့, နီၢ်ရူၤသး, နီၢ်အ့ၤစတၢ် ဒီးစီၤဒၤဝံးလီၤ. အဝဲသ့ၣ်ကမၤသကိးတၢ်ဒီးပှၤလၢ ဟီၣ်ခိၣ်ပၤရဒံစူးအပူၤလီၤ. ဒီးလၢဟီၣ်ခိၣ်ပၤရဒံစူးအပူၤန့ၣ် ပကဘၣ်မၤတၢ်မၤ အိၣ်ဒံးဝဲဒီဒူၣ်ညါ.
ယဟိဝၤယွၤအဲၣ်ဒိးဝဲလၢ နကအိၣ်ဘၣ်ဖဲန့ၣ်လီၤ. ဖဲန့ၣ်အခါ နကသ့ၣ်ညါအါထီၣ် ယဟိဝၤယွၤအဂ့ၢ်လၢ ကျဲအကလုာ်ကလုာ်လီၤ. ခဲအံၤမ့ၢ်ဂ့ၤ ခါဆူညါမ့ၢ်ဂ့ၤ မ်ပသုးဘူးပသးဆူ ယဟိဝၤယွၤအအိၣ်ထီဘိတက့ၢ်.
“ယွၤပကစၢ်ဧၢ, နဂ့ၤဒိးန့ၢ်တၢ်လၤကပီၤ, ဒီးတၢ်ယူးတၢ်ယီၣ်, ဒီးတၢ်စိတၢ်ကမီၤလီၤ. အဂ့ၢ်ဒ်အံၤ, နတ့လီၤတၢ်ခဲလၢာ်” လီၤ.—လီၣ်ဖျါ ၄:၁၁