ယ့ၣ်ၡူး​မၤဘျါ ပှၤဆူး​ပှၤဆါ ဒီး​မၤ​သမူထီၣ်​က့ၤ​ပှၤသံ တကးဒံးဘၣ် အဝဲ​မၤ​ပတုာ်ဝဲ ကလံၤမုၢ် ဒီး​တၢ်စူၤ​သ့ဝဲ​စ့ၢ်ကီး​လီၤ. ဖဲ​ယ့ၣ်ၡူး​ဃ့​ဘါ​ထုကဖၣ်​တၢ်​လၢ ကစၢၢ်​ခိၣ်​ဝံၤ​အလီၢ်​ခံ အဝဲ​ကွၢ်လီၤ​တၢ်​ဆူ ပီၣ်လဲၣ်​ကၤလံၤလါ ဒီး​ထံၣ်ဘၣ်​ဝဲ​ကလံၤမုၢ်​လီၤ. ယ့ၣ်ၡူး​အ​တၢ်မၢဖိ​တဖၣ် အိၣ်​လၢ​ကဘီ​ပူၤ​ဒီး​ကွၢ်ဆၢၣ်မဲာ်​ဘၣ်​ဝဲ ကလံၤမုၢ်​ဖးဒိၣ်​အံၤ​လီၤ. လၢတၢ်န့ၣ်​အဃိ ယ့ၣ်ၡူး​ဟဲက့ၤ​လီၤ​လၢ ကစၢၢ်​အ​ခီၣ်ထံး​လီၤ. အဝဲ​စးထီၣ်​ဟးဝဲ​လၢ​ထံဖီခိၣ်​ဒီး လဲၤဝဲ​လၢ အ​တၢ်မၢဖိ​တဖၣ် အ​ကဘီ​အ​အိၣ်​လီၤ. ဖဲ​တၢ်မၢဖိ​တဖၣ်​ထံၣ်ဘၣ်​ဝဲ ပှၤ​တဂၤ​ဟး​လၢ​ထံဖီခိၣ်​အခါ အဝဲသ့ၣ်​ပျံၤတၢ်​ဒိၣ်မး​လီၤ. ဘၣ်ဆၣ် ယ့ၣ်ၡူး​တဲဘၣ်​အဝဲသ့ၣ်​လၢ– ‘ယၤ​လီၤ, ပျံၤတၢ်​တဂ့ၤ.’

စီၤ​ပ့းတရူး​တဲဝဲ​လၢ– ‘ကစၢ်​ဧၢ, မ့မ့ၢ်​နၤ​နီၢ်ကီၢ်​န့ၣ် မၢ​ယ​ဟဲ​ဆူ​န​အိၣ်​တက့ၢ်.’ ယ့ၣ်ၡူး​တဲဘၣ်​စီၤ​ပ့းတရူး​လၢ– ‘ဟဲ​လၢ​ယ​အိၣ်.’ ဖဲ​ကလံၤမုၢ်​ဖးဒိၣ် အူ​တၢ်​အဆၢ​ကတီၢ် စီၤ​ပ့းတရူး​ဟးထီၣ်​လၢ​ကဘီ​ပူၤ ဒီး​လဲၤဝဲ​ဆူ​ယ့ၣ်ၡူး​အ​အိၣ်​လီၤ. ဘၣ်ဆၣ် ဖဲ​အဝဲ​လဲၤ​ဘူးထီၣ်​လၢ ယ့ၣ်ၡူး​အိၣ်​အခါ စီၤ​ပ့းတရူး​ကွၢ်ဝဲ​ကလံၤမုၢ် ဒီး​ပျံၤတၢ်​လီၤ. ဒီး​စီၤ​ပ့းတရူး​စးထီၣ်​လီၤ​အုးဝဲ​လၢ​ထံ​ကျါ​လီၤ. စီၤ​ပ့းတရူး​ကိးပသူထီၣ်​ဝဲ​လၢ– ‘ကစၢ်​ဧၢ, မၤစၢၤ​ယၤ​သၢၣ်.’ ယ့ၣ်ၡူး​ဖီၣ်​စီၤ​ပ့းတရူး​အ​စု​ဒီး တဲဘၣ်​အီၤ​လၢ– ‘ဘၣ်​မနုၤ​အဃိ န​သးဒ့ဒီ​လဲၣ်. န​တၢ်နာ်​အိၣ်​ဖဲလဲၣ်.’

ယ့ၣ်ၡူး​ဒီး​စီၤ​ပ့းတရူး လဲၤနုာ်​လီၤ​လၢ​ကဘီ​ပူၤ ဒီး​တဘျီဃီ​န့ၣ် ကလံၤမုၢ်​အိၣ်​ပတုာ်ဝဲ​လီၤ. တၢ်မၢဖိ​တဖၣ်​တူၢ်ဘၣ်​ဝဲ​ဒ်လဲၣ်. အဝဲသ့ၣ်​တဲဝဲ​လၢ– ‘န​မ့ၢ်​ကစၢ်​ယွၤ​အ​ဖိခွါ​နီၢ်ကီၢ်​လီၤ.’

ယ့ၣ်ၡူး​မၤ​ပတုာ်ဝဲ​ကလံၤမုၢ်​ဖးဒိၣ်​န့ၣ် တမ့ၢ်​ထဲ​တဘျီ​အံၤ​ဘၣ်. ဘၣ်​တဘျီ ဖဲ​ယ့ၣ်ၡူး​ဒီး အ​တၢ်မၢဖိ​တဖၣ် ဒိးဝဲ​ကဘီ​လၢ က​လဲၤ​ဆူ​ပီၣ်လဲၣ်​ဝၢ်ဘးခီ​အခါ ယ့ၣ်ၡူး​မံ​ဘၣ်​အသး​လၢ ကဘီ​လီၢ်ခံ​လီၤ. ဖဲ​န့ၣ်​အဆၢ​ကတီၢ်​န့ၣ် ကလံၤမုၢ်​ဖးဒိၣ်​ဟဲဝဲ​လီၤ. လပီ​တဖၣ် ဟဲ​ဒိ​ဘၣ် ကဘီ ဒီး​ထံ​နုာ်လီၤ​ဝဲ​လၢ​ကဘီ​ပူၤ​လီၤ. တၢ်မၢဖိ​တဖၣ် ကိး​ဂဲၤဆၢထၢၣ်​ယ့ၣ်ၡူး ဒီး​တဲဝဲ​လၢ အ​ကလုၢ်​ဖးဒိၣ်​လၢ– ‘သရၣ်​ဧၢ, ပ​က​သံ​လီၤ. ဝံသးစူၤ​မၤစၢၤ​ပှၤ​သၢၣ်.’ ယ့ၣ်ၡူး​ဂဲၤဆၢထၢၣ်​ဒီး တဲဘၣ်​ပီၣ်လဲၣ်​လၢ– ‘အိၣ်​ဃိကလာ်.’ တဘျီဃီ​န့ၣ် ကလံၤ​ဒီး​လပီ​အိၣ်ဂၢၢ်​က့ၤဝဲ​လီၤ. ယ့ၣ်ၡူး​သံကွၢ်​အ​တၢ်မၢဖိ​တဖၣ်​လၢ– ‘သု​တၢ်နာ်​အိၣ်​ဖဲလဲၣ်.’ အဝဲသ့ၣ်​တဲ​လိာ်အသး တဂၤ​ဒီး​တဂၤ​လၢ– “ကလံၤ, ဒီး​ပီၣ်လဲၣ်​ဒၣ်လဲာ်, ဒိကနၣ်​မး​အ​ကလုၢ်​လဲၣ်.” တၢ်မၢဖိ​တဖၣ် န့ၢ်ဘၣ်​တၢ်​မၤလိ​လၢ အဝဲသ့ၣ်​မ့ၢ်​နာ်န့ၢ်​ယ့ၣ်ၡူး​လၢ အသး​ဒီဖျၢၣ်​န့ၣ် တ​လိၣ်​ပျံၤတၢ်​နီတမံၤ​ဘၣ်.