အိၣ်ပလီၢ်သးထီဘိ
ကီၢ်ရၢၡါ လဲၤဒုးဝဲ ကီၢ်ယူၣ်ခြ့
ခိၣ်နၢ်လၢထံကီၢ်အဂၤတဖၣ် ဂုာ်ကျဲးစၢးတြီဝဲဒ်သိး တၢ်ဒုး တကဲထီၣ်တဂ့ၤအဂီၢ် ဘၣ်ဆၣ်ဖဲ ၂၀၂၂ လါဖ့ၤဘြူၤအါရံၤ ၂၄ သီ, ဂီၤခီဂီၤဂီၤန့ၣ် ကီၢ်ရၢၡါ လဲၤဒုးဝဲ ကီၢ်ယူၣ်ခြ့. ခီဖျိလၢ တၢ်ဒုးတခါအံၤအဃိ တၢ်ဘၣ်ဒိဘၣ်ထံးအိၣ်ထီၣ်ဒ်လဲၣ်. တချုးလၢ တၢ်ဒုးကဲထီၣ်ဒံးဘၣ် စှၤကီးသီန့ၣ် ဘီမုၢ်စၢဖှိၣ်ကရၢအခိၣ် အဲၤထိနံၤယိၤ ကူထါရဲၤ တဲဝဲလၢ “တၢ်ဒုးမ့ၢ်ကဲထီၣ်န့ၣ် ပှၤထံဖိကီၢ်ဖိတဖၣ် ကဘၣ်ကီဘၣ်ခဲ ဒီးတၢ်ဟးဂူာ်ဟးဂီၤ ကအိၣ်ထီၣ်ဝဲ. တကးဒံးဘၣ် ကမၤဘၣ်ဒိစ့ၢ်ကီး တၢ်ဘံၣ်တၢ်ဘၢလၢ ကီၢ်ယူရပၤ ဒီးဟီၣ်ခိၣ်ဒီဘ့ၣ်ညါ.”
တၢ်ကဲထီၣ်အသးဒ်အံၤန့ၣ် လံာ်စီဆှံတဲဝဲဒ်လဲၣ်
ယ့ၣ်ၡူးတဲဆိပာ်စၢၤဝဲလၢ “ပှၤကလုာ် တဒူၣ်ဒီးတဒူၣ် ကဒုးလိာ်အသး ဒီးဘီမုၢ်တဘ့ၣ်ဒီးတဘ့ၣ် ကဒုးလိာ်အသး.” (မးသဲ ၂၄:၇) ဒ်သိးနကထံၣ်ဘၣ်လၢ တၢ်လၢယ့ၣ်ၡူးတဲဆိပာ်စၢၤဝဲ ဘၣ်ဃးဒီးတၢ်ဒုးအဂ့ၢ်န့ၣ် ဟဲလၢထီၣ်ပှဲၤထီၣ်ဝဲ လၢဆၢကတီၢ်ခဲအံၤအဂီၢ် ဖးတၢ်ဂ့ၢ်လၢအမ့ၢ် “‘‘မုၢ်နံၤခံကတၢၢ်တဖၣ်အပူၤ’ လၢအမ့ၢ် ‘တၢ်အကတၢၢ် အဆၢကတီၢ်’ အတၢ်ပနီၣ်န့ၣ် မ့ၢ်မနုၤလဲၣ်..”
လၢလံာ်လီၣ်ဖျါအပူၤ တၢ်ဒုးန့ၣ် လံာ်စီဆှံဒိလီၤဝဲဒ် ပှၤတဂၤလၢအဒိး “ကသ့ၣ်အဂၤတဒုလၢ အလွဲၢ်ဂီၤ . . . ဒ်သိး အကထုးထီၣ်ကွံာ် တၢ်မုာ်တၢ်ခုၣ်လၢ ဟီၣ်ခိၣ်ချၢ.” (လီၣ်ဖျါ ၆:၄) ဖးတၢ်ဂ့ၢ်လၢပယီၤကျီာ်လၢအမ့ၢ် “ပှၤဒိးကသ့ၣ်လွံၢ်ဂၤန့ၣ် လံာ်စီဆှံဒိလီၤဝဲလၢ မနုၤလဲၣ်.” ဖဲန့ၣ် နကထံၣ်ဘၣ်လၢ ဝံအတၢ်စံးပာ်တခါအံၤ အဘၣ်ထွဲဒီးတၢ်ဒုးလၢ ဆၢကတီၢ်ခဲအံၤအဂ့ၢ်.
လံာ်ဒၤနံးယ့လး တဲဆိပာ်စၢၤဝဲလၢ “ကလံၤစိးအစီၤပၤ” ဒီး “ကလံၤထံးအစီၤပၤ.” ကထီဒါလိာ်သးအဂ့ၢ်. (ဒၤနံးယ့လး ၁၁:၂၅-၄၅) ကွၢ်တၢ်ဂီၤမူလၢအမ့ၢ် ဝံအတၢ်စံးပာ်လၢထီၣ်ပှဲၤထီၣ်ဝဲ— ဒၤနံးယ့လးအဆၢဒိၣ် ၁၁. ဖဲန့ၣ် နကသ့ၣ်ညါဘၣ်လၢ ကီၢ်ရၢၡါဒီးပှၤလၢအဖီၣ်လိာ်သးစုဒီးအီၤတဖၣ်န့ၣ် အကဲဝဲ ကလံၤစိးအစီၤပၤအဂ့ၢ်. a
လံာ်လီၣ်ဖျါ ပာ်ဖျါထီၣ်ဝဲလၢ “တၢ်ဒုးလၢ အကမၤအသး ဖဲသ့တၢ်လၢာ်ကစၢ်ယွၤ အမုၢ်နံၤဖးဒိၣ်” အဂ့ၢ်. (လီၣ်ဖျါ ၁၆:၁၄, ၁၆) ဘၣ်ဆၣ် တၢ်ဒုးတခါအံၤ တမ့ၢ်တၢ်ဒုးလၢ ပထံၣ်ဘၣ်အီၤလၢ ဆၢကတီၢ်ခဲအံၤတဖၣ်ဘၣ်. ဒ်သိးပကသ့ၣ်ညါအါထီၣ် တၢ်ကမၤအသးလၢ ခါဆူညါအဂီၢ် ဖးတၢ်ဂ့ၢ်လၢအမ့ၢ် “အၢ်မက့းဒိၣ် အတၢ်ဒုးန့ၣ် မ့ၢ်မနုၤလဲၣ်.”
ဘၣ်မနုၤအဃိ ပနာ်လၢ ခါဆူညါန့ၣ် တၢ်ကမုာ်ထီၣ်လဲၣ်
လံာ်စီဆှံတဲဝဲလၢ ကစၢ်ယွၤက “ဒုးအိၣ်ကတီၢ် တၢ်ဒုးတၢ်ယၤတဖၣ် တုၤလၢဟီၣ်ခိၣ်အကတၢၢ်.” (စံးထီၣ်ပတြၢၤ ၄၆:၉) ဒ်သိးပကသ့ၣ်ညါအါထီၣ် ကစၢ်ယွၤအတၢ်အၢၣ်လီၤလၢ ခါဆူညါအဂီၢ် ဖးတၢ်ဂ့ၢ်လၢပယီၤကျီာ်လၢအမ့ၢ် “တၢ်မုၢ်လၢ်လၢ ကဟဲလၢပှဲၤထီၣ်နီၢ်ကီၢ် လၢခါဆူညါအဂီၢ်.”
ယ့ၣ်ၡူးသိၣ်လိ အပျဲၢ်အဘီၣ်တဖၣ်လၢ ကဃ့ဘါထုကဖၣ်လၢ ကစၢ်ယွၤအဘီမုၢ်ကဟဲအဂီၢ်. (မးသဲ ၆:၉, ၁၀) ကစၢ်ယွၤအဘီမုၢ်န့ၣ် မ့ၢ်တၢ်ပၢတၢ်ပြးလၢ မူခိၣ် ဒီးကစၢ်ယွၤကသူဝဲ ဘီမုၢ်အံၤဒ်သိး ကမၤလၢပှဲၤထီၣ် အတၢ်ဘၣ်သးလၢဟီၣ်ခိၣ်ချၢ. လၢကစၢ်ယွၤအတၢ်ဘၣ်သးအကျါတခါန့ၣ် မ့ၢ်ဝဲ တၢ်မုာ်တၢ်ခုၣ်ကအိၣ်ဝဲလၢ ဟီၣ်ခိၣ်ချၢ. ဒ်သိး နကသ့ၣ်ညါလၢ ကစၢ်ယွၤအဘီမုၢ် ကကဲဘျုးလၢနဂီၢ် ဒ်လဲၣ်န့ၣ် ကွၢ်တၢ်ဂီၤမူလၢအမ့ၢ် ယွၤအဘီအမုၢ်န့ၣ်မ့ၢ်မနုၤလဲၣ်.
လၢကီၢ်ယူၣ်ခြ့န့ၣ် ယဟိဝၤပှၤအုၣ်အသးတဖၣ်အိၣ်ဝဲအဂၤ ၁၂၉,၀၀၀ ဘျဲၣ်ညါ. အဝဲသ့ၣ် ကွၢ်လိယ့ၣ်ၡူး ဒ်သိးဒီး ယဟိဝၤပှၤအုၣ်အသးလၢထံကီၢ်အဂၤတဖၣ်. အဝဲသ့ၣ်ကွၢ်လိ ယ့ၣ်ၡူးခီဖျိ တမၤဘၣ်ဃးအသးဒီး ထံဂ့ၢ်ကီၢ်ဂ့ၢ် ဒီး တပၣ်ဃုာ်လၢ တၢ်ဒုးတၢ်ယၤအပူၤဘၣ်. (ယိၤဟၣ် ၁၈:၃၆) လၢဟီၣ်ခိၣ်ဒီဘ့ၣ်န့ၣ် ယဟိဝၤပှၤအုၣ်အသးတဖၣ် ဆဲးစံၣ်တဲၤတဲလီၤဝဲလၢ ထဲဒၣ် “ဘီမုၢ် တၢ်သးခုကစီၣ်” န့ၣ်ကမၤဘၣ်ဂီၢ်ထီၣ်က့ၤ ပှၤဟီၣ်ခိၣ်ဖိ အတၢ်ကီတၢ်ခဲတဖၣ်. လၢအကျါန့ၣ် အပၣ်ဃုာ်ဒီးတၢ်ဒုး. (မးသဲ ၂၄:၁၄) နမ့ၢ်အဲၣ်ဒိးသ့ၣ်ညါအါထီၣ် လံာ်စီဆှံ အတၢ်သးခုကစီၣ်န့ၣ် ဆဲးကျိးဒီးပှၤ.
a ဒ်သိး နကသ့ၣ်ညါ ဝံအတၢ်စံးပာ်တခါအံၤအဂီၢ် ကွၢ်တၢ်မၤလိလၢအမ့ၢ် “ဖဲတၢ်အကတၢၢ်အဆၢကတီၢ် “ကလံၤစိးအစီၤပၤ” န့ၣ် မ့ၢ်မတၤလဲၣ်” ဒီး ““ကလံၤစိးအစီၤပၤ” လၢမုၢ်မဆါတနံၤအံၤန့ၣ် မ့ၢ်မတၤလဲၣ်.”