ជំពូកទី៧
ពួកអ្នកចេះហោរាសាស្ត្រទៅជួបកូនតូចយេស៊ូ
-
ពួកអ្នកចេះហោរាសាស្ត្រធ្វើដំណើរតាម«ផ្កាយ»មួយ ទៅក្រុងយេរូសាឡិម រួចមកទៅជួបកូនតូចយេស៊ូ
នៅថ្ងៃមួយមានបុរសខ្លះមកពីតំបន់ខាងកើត ពួកគេជាអ្នកចេះហោរាសាស្ត្រ។ អ្នកចេះហោរាសាស្ត្រគឺអ្នកដែលសិក្សាអំពីទិសផ្កាយ ដោយអះអាងថា ពួកគេអាចទាយប្រាប់អំពីអត្ថន័យនៃព្រឹត្ដិការណ៍ផ្សេងៗក្នុងជីវិតរបស់មនុស្ស។ (អេសាយ ៤៧:១៣) ពេលពួកគេនៅតំបន់ខាងកើត ពួកគេបានឃើញ«ផ្កាយ»មួយ ហើយពួកគេធ្វើដំណើរតាមផ្កាយនោះអស់រាប់រយគីឡូម៉ែត្រទៅក្រុងយេរូសាឡិម មិនមែនទៅភូមិបេថ្លេហិមទេ។
នៅពេលដែលពួកអ្នកចេះហោរាសាស្ត្រទៅដល់ក្រុងយេរូសាឡិម ពួកគេសួរថា៖ «តើស្តេចនៃជនជាតិយូដាដែលទើបតែកើតមកនោះនៅឯណា? ព្រោះយើងបានឃើញផ្កាយរបស់លោកពេលដែលយើងនៅតំបន់ខាងកើត ហើយយើងបានមកទីនេះដើម្បីលំឱនកាយគោរពលោក»។—ម៉ាថាយ ២:១, ២
កាលដែលស្តេចហេរ៉ូឌនៃក្រុងយេរូសាឡិមឮអំពីរឿងនេះ គាត់ចាប់ផ្ដើមជ្រួលច្របល់ក្នុងចិត្ត។ ដូច្នេះ ហេរ៉ូឌហៅពួកសង្ឃនាយកនិងពួកអ្នកដឹកនាំសាសនាយូដាឯទៀតឲ្យមក ដើម្បីសួរពួកគេអំពីកន្លែងដែលគ្រិស្តត្រូវកើតមក។ ដោយសារពួកគេស្គាល់ទំនាយក្នុងគម្ពីរ ពួកគេឆ្លើយថា៖ «ភូមិបេថ្លេហិម»។ (ម៉ាថាយ ២:៥; មីកា ៥:១) ពេលឮដូច្នេះ ហេរ៉ូឌហៅពួកអ្នកចេះហោរាសាស្ត្រទាំងនោះ ហើយប្រាប់ដោយសម្ងាត់ថា៖ «ចូរទៅរកកូនតូចនោះទាល់តែឃើញ។ ពេលដែលឃើញហើយ ចូរត្រឡប់មកប្រាប់ខ្ញុំវិញ ដើម្បីឲ្យខ្ញុំអាចទៅលំឱនកាយគោរពកូនតូចនោះដែរ»។ (ម៉ាថាយ ២:៨) តាមពិត ហេរ៉ូឌចង់រកកូនតូចនោះដើម្បីសម្លាប់វិញ!
ក្រោយពីពួកអ្នកចេះហោរាសាស្ត្រទាំងនោះចេញទៅ មានអ្វីមួយដ៏អស្ចារ្យកើតឡើង។ «ផ្កាយ»ដែលពួកគេបានឃើញតាំងពីតំបន់ខាងកើតនោះកំពុងនាំផ្លូវពួកគេ។ ពិតណាស់ នេះមិនមែនជាផ្កាយធម្មតាឡើយ ប៉ុន្តែផ្កាយនេះបានត្រូវផ្ដល់ឲ្យជាពិសេសដើម្បីនាំផ្លូវពួកគេ។ ពួកអ្នកចេះហោរាសាស្ត្របានធ្វើដំណើរតាមផ្កាយនោះ រហូតដល់ផ្កាយឈប់ចំពីលើផ្ទះដែលយ៉ូសែបនិងម៉ារៀកំពុងស្នាក់នៅជាមួយនឹងកូនប្រុសតូច។
ពេលពួកអ្នកចេះហោរាសាស្ត្រចូលទៅក្នុងផ្ទះនោះ ពួកគេឃើញម៉ារៀនិងកូនតូចយេស៊ូ។ ភ្លាមនោះពួកគេលំឱនកាយគោរពកូនតូចនោះ។ បន្ទាប់មក ពួកគេធ្វើអំណោយជូនកូនតូចនោះ ដោយបើកយកមាស ធូបស និងម្សៅក្រអូបម្យ៉ាងហៅថាជ័រល្វីងទេស។ ក្រោយមក កាលដែលពួកគេបម្រុងត្រឡប់ទៅជួបហេរ៉ូឌ ព្រះបានព្រមានពួកគេតាមរយៈសុបិនមិនឲ្យត្រឡប់ទៅជួបហេរ៉ូឌឡើយ។ ដូច្នេះ ពួកគេក៏ត្រឡប់ទៅស្រុករបស់ខ្លួនតាមផ្លូវផ្សេងវិញ។
តើអ្នកគិតថាអ្នកណាដែលបានប្រើ«ផ្កាយ»នោះ ដើម្បីនាំផ្លូវពួកអ្នកចេះហោរាសាស្ត្រ? សូមចាំថា ផ្កាយនោះមិនបាននាំពួកគេទៅជួបកូនតូចយេស៊ូនៅភូមិបេថ្លេហិមភ្លាមៗទេ។ ប៉ុន្តែ ផ្កាយនោះបាននាំពួកគេទៅក្រុងយេរូសាឡិមវិញ។ នៅទីនោះពួកគេបានជួបស្តេចហេរ៉ូឌដែលក្រោយមកចង់សម្លាប់កូនតូចយេស៊ូ។ បើព្រះមិនបានរារាំងពួកអ្នកចេះហោរាសាស្ត្រមិនឲ្យប្រាប់អំពីទីលំនៅរបស់កូនតូចយេស៊ូទេ នោះហេរ៉ូឌច្បាស់ជាបានសម្លាប់កូនតូចនោះមែន។ ពិតណាស់ អ្នកដែលចង់សម្លាប់កូនតូចយេស៊ូ គឺសាថានដែលជាសត្រូវរបស់ព្រះ ហើយវាបានប្រើវិធីទាំងនោះដើម្បីសម្រេចគោលបំណងរបស់វា។