Nuna paratiisiusoq qanittukkut atuutilissaaq

„Ataatarput qilanniittutit! Aqqit illernartitaali, naalagaaffiit tikiulli, piumasat qilammisut nunamissaaq pili.“ — Matthæusi 6:9, 10.

QINNUT taanna ilisimaneqarluartoq, amerlasuunit ataatarpuumik taaneqartartoq, inuiannut neriuutissiivoq. Qanoq ililluni?

Soorlu qinnummi ersertoq, Guutip piumasaata maanna qilammi pineratulli nunami pinissaa Guutip naalagaaffianit isumagineqassaaq. Guutillu piumasaraa Paratiisi atulerseqqinneqassasoq. (Saqqummersitat 21:1-5) Guutip naalagaaffia sorpiaava, qanorlu nunarsuarmi Paratiisimik atulersitseqqissava?

Naalagaaffik piviusoq

Guutip naalagaaffia tassaavoq naalagaaffik piviusoq. Naalagaaffinni tamani naalakkersuisoqartariaqarlunilu inatsiseqartariaqarlunilu innuttaasoqartariaqarpoq. Guutip naalagaaffiani aamma taamaattoqarpa? Apeqqutinut pingasunut tulliuttunut Biibilimi akissutigineqartut maluginiakkit:

Guutip naalagaaffiani kikkut naalakkersuissappat? Jehova kisimi oqartussaasuuvoq. (Esaja 33:22) Jehovap Guutip ernini, Jiisusi Kristusi, naalagaaffimmini siuttuusussatut toqqarpaa. (Matthæusi 28:18) Jehovap siulersuineratigut Jiisusip inuit „naggueqatigiinnit immikkullu oqaasilinnit inuiannillu inuiaqatigiinnillu tamanit pisut“ killilimmik amerlassusillit ’nunamut kunngitut’ (1936) naalakkersueqatissamisut toqqarsimavai. — Saqqummersitat 5:9, 10.

Guutip naalagaaffia innuttaasunut sunik inatsisiliorsimava? Guutip naalagaaffiani inatsisit ilaanni innuttaasut eqeersimaarlutik ajunngitsumik iliuuseqarnissaat piumasaqaatigineqarpoq. Inatsisini taakkunani sorliit pingaarnerpaanersut Jiisusip oqaluttuarai: „’[Jehova] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.’ Tassa inassutit annersaat siullersaallu, aappaatali taamaaqatigaa: ’Tullit ilittut asassavat.’“ — Matthæusi 22:37-39.

Inatsisini allani piumasaqaatigineqarpoq Guutip naalagaaffiani innuttaasut iliuutsinik aalajangersimasunik iliuuseqarnaveersaarnissaat. Assersuutigalugu Biibilimi erseqqissumik ima allassimavoq: „Tammaqinasi! Kinguaassiuutitigut inuunerluttut guutipilussiortulluunniit, allasiortut anguteqatiminnoortartulluunniit, tillittut piumatuulluunniit, imerajuttut mitaatilliisulluunniit piiaasulluunniit Guutip naalagaaffia kingornussarsiarissanngilaat.“ — 1 Korinthimiut 6:9, 10.

Guutip naalagaaffiani kikkut innuttaappat? Jiisusip Guutip naalagaaffiani innuttaasut savanut assersuuppai. Taanna oqarpoq: „Nipiga tusassavaat; tassaalissappullu savaatit katersat ataatsit, paarsisoq ataaseq.“ (Johannesi 10:16) Guutip naalagaaffiani innuttaarusukkaanni, Jiisusimik  savanik paarsisumik ilumoortumik malinninnerarnissaq naammanngilaq — aamma oqaasii malillugit iliuuseqarnissaq pisariaqarpoq. Jiisusi ima oqarpoq: „Imaanngilaq kinaluunniit uannut oqartoq: Naalagaq, Naalagaq! Qilaap Naalagaaffianut isissasoq, Ataatamali qilanniittup piumasaanik iliortoq kisimi.“ — Matthæusi 7:21.

Taamaattumik Guutip naalagaaffiani innuttaasut, Jiisusip pisimaneratut, Guutip aqqa atorlugulu ataqqisarpaat. (Johannesi 17:26) Taakkua Jiisusip allanik „naalagaaffimmik iivangkiiliu“ pillugu ilinniartitsinissamik peqqussutaa naalappaat. (Matthæusi 24:14; 28:19, 20) Aamma ilumoortumik asaqatigiipput. — Johannesi 13:35.

Guutip ’nunarsuarmik aseruisut aserussavai’

Silarsuarmi pissutsinit maanna atuuttunit erserpoq Guutip naalagaaffia qanittukkut nunarsuarmi allannguerujussuarumaartoq. Qanoq ililluta nalunngilarput? Ukiut 2000-it matuma siorna Jiisusip oqaluttuarai pisussat assigiinngitsorpassuit ’Guutip naalagaaffiata qanillineranut’ nalunaaqutaasut. (Lukasi 21:31) Soorlu allaaserisamit matuma siulianit ersertoq, nalunaaqutip immikkoortui assigiinngitsut nunarsuarmi tamarmi erseqqissumik takuneqarsinnaapput.

Taava qanoq pisoqassava? Jiisusip apeqqummut tamatumunnga akissutaa imaappoq: „Taamaannerani naalliunnartoqangaassaaq silarsuup pileqqaarneraniit maannamut asseqanngitsumik nalliuteqqinngisaannassasumillu.“ (Matthæusi 24:21) Matumani ajunaarnersuaq inunnit pilersinneqartoq eqqartorneqanngilaq. Guutiuna ’nunarsuarmik aseruisunik aseruiniarluni’ akuliunniartoq. (Saqqummeritat 11:18) Inuit ajortut, namminissarsiorlutik iliuutsimikkut nunarsuarmik aserorterisut, „nunamit piiagaassapput“. Assuarnaatsulli, Guutip iluarisaanik kiffartortut, „kisimik tassaniilissapput“. — Ussatit 2:21, 22.

Jehova Guuti taama sukannertigisumik iliuuseqarnissaminut pissutissaqarluarpoq. Sooq? Assersuut una eqqarsaatigeriaruk: Takorlooriaruk inissiaataateqarlutit. Inissianik attartortut ilaat pissuserissaarput ineqartunullu allanut innimisullutik; akiligassaminnik akiliisarput angerlarsimaffitsillu paarilluarlugu. Attartortulli allat akornusersuisarput namminissarsiortuullutillu; akiligassaminnik akiliiumasanngillat illumilu inissianik attartorfimminni aserorteringaatsiartarlutik. Mianersoqquneqaqattaaraluarlutik ajoqutaasumik pissuseqartuarput. Qanoq iliussavit? Inissianik piginnittuugavit, qularnanngitsumik attartuisut aserorterisut taakkua anisissavatit.

Jehova Guuti nunarsuarmik tassaniittunillu tamanik pinngortitsisuugami aamma kikkut tassani najugaqarsinnaanerannik aalajangiisinnaatitaavoq. (Saqqummersitat 4:11) Jehova nalunaarsimavoq inuit ajortut piumasaminik soqutiginninngitsut inuillu allat pisinnaatitaaffiinik suusupaginnittut piiarniarlugit. — Tussiaat 37:9-11.

Paratiisi atulerseqqinneqassaaq

Qanittukkut Guutip naalagaaffia Jiisusip Kristusip siulersuineratigut nunarsuarmut naalakkersuilissaaq. Jiisusip nutaamik aallartinnissaq tamanna „sunik tamanik nutarterinissaq“-mik taavaa. (Matthæusi 19:28, New International Version) Taamanikkussamut nunarsuarmi pissutsit qanoq issappat? Biibilimi neriorsuutigineqartut uku maluginiakkit:

Tussiaat 46:10. — „Nunarsuarmi tamarmi sorsunnerit [Jehovap] soraarsikkumaarpai.“

Esaja 35:1. — „Inoqajuitsoq nunalu panertoq tipaatsussapput. Inuilaaq qiimmattassaaq naasunillunilu.“

Esaja 65:21-23. — „Qinikkama nerissammatigit namminneq suliamik inerititaat. Sulilussinnassanngillat qitorniussanatillu tassanngaannaq toqusussanik.“

 Johannesi 5:28, 29. — „Piffissaq nalliukkumaarpoq ilivermiittut tamarmik [Jiisusip] nipaanik tusarumaarfissaat.“

Saqqummersitat 21:4. — „[Guutip] qulliit tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq.“

Uppernissamut pissutissat

Biibilimi neriorsuutigineqartut upperaagit? Biibilimi siulittuutigineqarpoq amerlasuut uppernavianngitsut. Ima allassimavoq: „Ullussani kingullerni [tikiukkumaarput] mitallersut pilerissusertik maliinnarlugu inuusut mitallerlutillu ima oqartut: ’Tikiunnissaaninguna neriorsuut qanoq piniartoq? Siuaasat toqummatali suut tamarmik pinngortinneqaqqaarnermissut ittuaannarsimapput.’“ (2 Petrusi 3:3, 4) Taamatulli mitallersut kukkorujussuarput. Biibilimi allassimasut upperinissaannut pissutissat sisamaannaat aajuku:

(1) Guuti nunarsuarmi pissutsinut siornatigut akuliuttareersimavoq. Noap nalaani ulersuaq tamatumunnga assersuutissaqqissuuvoq. — 2 Petrusi 3:5-7.

(2) Silarsuarmi pissutsit maanna atuuttut Guutip oqaasiani eqqorluartumik siulittuutigineqarput.

(3) „Suut tamarmik pinngortinneqaqqaarnermissut“ ittuaannarsimanngillat. Nunarsuarput innuttaaqatigiinnikkut, ileqqussatigut avatangiisitigullu aatsaat taama aseroriartortinneqartigaaq.

(4) „Naalagaaffimmik iivangkiiliu“ nunarsuaq tamakkerlugu oqaluussissutigineqarmat „naggatissaq“ qanittuararsuakkut „nalliutissaaq“. — Matthæusi 24:14.

Jehovap Nalunaajaasuisa Guutip oqaasianik Biibilimik atuaqqissaaqatigiumavaatsit, Guutip naalagaaffiata naalakkersuinerani naassaanngitsumik inuunissamik neriuut pillugu ilinniarneruniassagavit. (Johannesi 17:3) Aap, inuiaat nuanningaartumik siunissaqarput. Qanittukkut piffissaq nuannernerpaaq nalliutissaaq! Siunissaq tamanna misigerusuppiuk? (wp08 08/01-E)

[Qupp. 7-mi issuagaq]

Pissutsinik qangatut ittuaannassaneraasut kukkorujussuarput

[Qupp. 8-mi assiliartaq]

Siunissaq tamanna misigerusuppiuk?