جاراتقانعا جاقىنداتاتىن ٴبىلىم
ٴبىزدىڭ جاراتۋشىمىز — قۇدىرەتتى كۇشتىڭ يەسى. دەسە دە ونىڭ باسقا دا كوركەم قاسيەتتەرى بار. قۇداي ونى تانىپ-بىلگەنىمىزدى، وعان جاقىنداعانىمىزدى قالايدى (جوحان 17:3؛ جاقىپ 4:8). مىنە، سوندىقتان دا ول ٶزى جايلى كوپ نارسەنى اشىپ بەرگەن.
جاراتۋشىمىزدىڭ ەسىمى بار
«ادامدار سەنىڭ ەسىمىڭ ەحوبا ەكەنىن، بۇكىل جەر بەتىن بيلەيتىن جالعىز قۇداي تاعالا ەكەنىڭدى ٴبىلسىن» (ٴزابۇر 83:18).
كيەلى جازبالاردا ەحوبانىڭ جالعىز شىنايى قۇداي ەكەنى ايتىلعان. ول بۇكىل عالام مەن كۇللى تىرشىلىكتى جاراتقان. سوندىقتان قۇلشىلىعىمىزعا سول عانا لايىق (ايان 4:11).
ەحوبا — ٴسۇيۋشى قۇداي
«قۇداي — سۇيىسپەنشىلىك» (جوحاننىڭ 1-حاتى 4:8).
ەحوبا قۇداي اسىل قاسيەتتەرىن ٶزىنىڭ ٴسوزى — كيەلى كىتاپ ارقىلى جانە تابيعات الەمى ارقىلى اشادى. سول قاسيەتتەردىڭ ىشىندەگى ەڭ باستىسى — سۇيىسپەنشىلىك. ونىڭ ٵربىر ٸسى سۇيىسپەنشىلىكتەن تۋىندايدى. ەحوبانى جاقىن تاني كەلە، ونى جاقسى كورىپ كەتەسىز.
ەحوبا — كەشىرىمشىل قۇداي
«سەن كەشىرىمشىل... قۇدايسىڭ» (نەحەميا 9:17).
ەحوبا ٴبىزدىڭ كۇناكار پەندە ەكەنىمىزدى بىلەدى. سوندىقتان ول جاساعان قاتە-كۇنالارىمىزدى كەشىرۋگە دايىن. وعان كۇنامىزدى مويىنداپ، كەشىرىم سۇراساق جانە ونى قايتالاماۋ ٷشىن بارىمىزدى سالساق، قۇدايدىڭ كەشىرىمىن الامىز. ول ٴبىزدى بۇرىنعى كۇنالارىمىز ٷشىن جازالامايدى (ٴزابۇر 103:12، 13).
ەحوبا تىلەك-دۇعامىزدى قابىل الادى
«ەحوبا ٶزىن شاقىراتىنداردىڭ ٴبارىنىڭ قاسىندا... كومەك سۇراعان ۇندەرىن ەستيدى» (ٴزابۇر 145:18، 19).
ەحوبا دۇعامىزدى قابىل الۋ ٷشىن، عيباداتىمىزدا بىزگە قانداي دا ٴبىر ٴدىني جورالار جاساۋدىڭ يا قاسيەتتى زاتتارعا تابىنۋدىڭ قاجەتى جوق. ول مۇنداي شارت قويمايدى. بالالارىنىڭ ايتقانىن قۇلاق سالىپ تىڭدايتىن مەيىربان اتا-اناداي، ەحوبا دا ٴبىزدى بار زەيىنىمەن تىڭدايدى.